Gen 28:11-22 | EkySCThai | STEP | เบ๊อะ อา จว๊าโต่ เด๊อ เหล่โอ่ โต๊โผะ เบ๊อะเนอ, เหมาะเฮ๊เหมาะตา เล๊ เฮ๊อ ลู อาขว่าอาคยา, อา โอ่เมอแก เบ๊อะเนอ เตเซ. เร๊อ อา พย๊า หล่อ เตเม เร๊อ อา เม เน๊อ อาเหล่โอ่เมอโก่ เร๊อ อา โอ่เมอโอ่ เบ๊อะเนอ.

Genesis 28:11-22

11 เบ๊อะ อา จว๊าโต่ เด๊อ เหล่โอ่ โต๊โผะ เบ๊อะเนอ, เหมาะเฮ๊เหมาะตา เล๊ เฮ๊อ ลู อาขว่าอาคยา, อา โอ่เมอแก เบ๊อะเนอ เตเซ. เร๊อ อา พย๊า หล่อ เตเม เร๊อ อา เม เน๊อ อาเหล่โอ่เมอโก่ เร๊อ อา โอ่เมอโอ่ เบ๊อะเนอ. 12 เร๊อ อา โอ่เมอแหม่ เน๊อ อา แม๊เถอะ กู่โบ ตู๊ขู่ โอ่ เด๊อ เห่ขุ เร๊อ อา แป แถ่โต่ เจ๊อ เด๊อ ม๊อขุ, เร๊อ จอแปแหร่ดุ อาเตเน่วพู๊ ซีเต๊เห่ แก๊แถ่แกแล แลแค เบ๊อะเนอ. ^a 13 เร๊อ จอแปแหร่ ตูจูเพร ก๊อถ่อ โอ่ เด๊อ กู่โบเคอ เร๊อ อา เฮ๊ เน๊อ, “แว หม่า จอแปแหร่ ตูจูเพร เด๊อ อา หม่าเฮ๊อ เนโพ เพอับราฮัม อาจอแปแหร่ดุ เน๊อ เนเพ เพอิสอัค อาจอแปแหร่ดุ เตเพรเฮ๊อ. เก่ เด๊อ เน โอ่เมอ เกอเร๊อ อา กู๊แหน่เออ เต๊เก่เนอ, แว เก่ เด๊อะ เน๊อ เน เน๊อ เนกลุยเนลุ๊ย เต๊เห่ ปา. ^b 14 เนกลุยแลเออ อา เก่ โอ่โหร่โอ่เอ๊ แซ่เจ๊อเน๊อ เห่หมื่อ เบ๊อะ เห่ขุเออ เนอเต๊เห่ ปา. เหย่ซี เก่ โอ่ปีชี จว๊า ลอดื่อ เด๊อ ซิโท ซิแล ซิเถ่ ซิโน ปา. เร๊อ เด๊อ เน เน๊อ เนกลุยแลเออ อาขว่าอาคยา, ล๋อ เมวเจ่อ เด๊อ เห่ขุ เออเต๊เห่ เก่ พย๊าหนิ แฮเง เกอดื่อ เตบุ๊ยเตเตอเรอ ปา. ^c 15 เร๊อ เนจว๊า เบ๊อะเต โต๊โผะ เต๋ เบ่เบ่, แว โอ่เกอดื่อ เน๊อ เน ปา, แว ตอกอเตเก เร๊อดื่อ เน ปา. แว เก่ เอ๊กา คยาแซ๊ดื่อ เน เบ๊อะ เก่เออ เต๊เก่ ปา. ฮู๊ แว อ๊อแล โทเฮ๊อ เน เออเนอ, อา เก่ เล๊อบาแถ่ แต่ล๋ายโต่ เฮ๊หม่า, แว วีแก เน๊อ เน โต่,” จอแปแหร่ดุ เฮ๊ คูยาโคบ ฮู๊เนอ.

16 เร๊อ เบ๊อะ คูยาโคบ ซิเหน่แถ่ เบ๊อะเนอ, อา เฮ๊ เน๊อ, “เก๋อ จอแปแหร่ ตูจูเพร โอ่ หม่าแหน่เกอเจ๊อ เบ๊อะเออ ว๊า, อา โอ่ เบ๊อะเออ เร๊อ แว ซิเง โต่โต่.” 17 อา ซิอิเช เร๊อ อา เฮ๊ เน๊อ, “เอ๋อ เหล่โอ่ เบ๊อะเออ โต๊โผะ หม่า อา ต๊อหร่อเซ๊ ซิอิเช แหน่เจ๊อ! เออหม่า อาแซ่เจ๊อ แหน่เฮ๊อ เน๊อ จอแปแหร่ดุ อาหี่ เน๊อ ม๊อขุ อากู่ดากู เจ๊อแหน่ เฮ๊อ.”

18 อาโหน่โตโร เหมาะลีโรมื๋อ เบ๊อะเนอ, คูยาโคบ ก๊อถ่อ เร๊อ อา แถ่พย๊า หล่อ เด๊อ อา โอ่เมอโก่ เกอเร๊อ เนอเตเม เร๊อ อาโดก๊อถ่อ ม๊าแก เน๊อ เตซิเงแถ่, เร๊อ เด๊อ เตแด่บูโพ๊ หนิ หล่อ เออเตเม อาเงเนอ, อา แล๊ตา ถ่าเทอ เด๊อ หล่อ เออเตเม อาขุ. 19 เร๊อ อา เอ๊ เกอเร๊อ เหล่โอ่ เบ๊อะเนอ โต๊โผะ อามุย เน๊อ เบธเอล, เร๊อ เด๊อ อาเหร่อเค วี เนอตีวี หม่า อู เอ๊ ลูมุย เน๊อ วีลูส (เบธเอล อาโหง่แลช๊า หม่า จอแปแหร่ดุ อาหี่.)

20 เร๊อ คูยาโคบ แบ อาโหง่ เร๊อ อา เฮ๊ เน๊อ, “จอแปแหร่ดุ เก่ โอ่เกอ เน๊อ แว, อา เก่ ตอกอเตเกหนิ แว เน๊อ แว จว๊าแกล๊ ยาเออโต๊โผะ, เร๊อ อา เก่ เด๊อะ แว เหล่เอ่เหล่โอ เหล่กือเหล่แซ๊, 21 โท๊โต่ แว เก่ กาโตโม กาโต่แร๊ เบ๊ คยาแซ๊ เด๊อ แวเพ อาหี่ เฮ๊หม่า, จอแปแหร่ ตูจูเพร เออ อา เก่ ทวา แวจอแปแหร่ดุ ปา. 22 โทเร๊อ หล่อ เด๊อ แว โดก๊อถ่อ ม๊าแดแก เน๊อ เตซิเหน่แถ่ เนอเตเมเนอ อา เก่ ทวาดื่อ จอแปแหร่ดุ อาหี่ ปา, เร๊อ ล๋อ เต เด๊อ เน เด๊อะ แว เต๊เห่เนอ, แว เก่ เด๊อะ กาคยา คยาแซ๊ เน๊อ เน อาปลูเช๊อ เร๊อ ตูปลู ปา.”