Genesis 6
แกแยเห่ขุพู๊ อาเตมู๊แหม่รีแจ่
1เบ๊อะ แกแยเห่ขุพู๊ เป๊อแถ่ โอ่โหร่โอ่เอ๊แฮ เฮ๊อ เร๊อ โอ่ปีชีจว๊า ลอเฮ๊อ เด๊อ เห่ขุ ต๊าบ่าลอ เร๊อ อู พู๊โอ่แลหนิ เฮ๊อ พู๊เพรเหมาะ ซีเต๊เห่ เบ๊อะเนอ, 2จอแปแหร่ดุ อาเตเน่วพู๊ ซีเต๊เห่ แม๊เถอะ แกแยเห่ขุพู๊ อาพู๊เหมาะ เต๊เห่ โหมะตว่าโหมะแซแร แหน่เจ๊อ เร๊อ อา นว๊าพย๊า แลแค เน๊อ อาเม. 3เร๊อ จอแปแหร่ ตูจูเพร เฮ๊ เน๊อ, “แว ปลวา โอ่ ตื๊อดื่อ หนิเกอ แวแหย่โยเซอเพร เน๊อ แกแยเห่ขุพู๊ เออเต๊เห่ ตูจูเพร หม่า อาแร๊ โต่. เมเตเฮ๊เร๊อ เหย่ซี โอ่ เน๊อ พ๊าหย่าสุ่ยเทอ เด๊อ อา เซอ แจ่ แพ๊ อาขว่าอาคยา, เหย่ซี เบ่ โอ่เซอเพร แพ๊ อาหน่า เตเย เน๊อ เนอเชอ แพ๊.” 4เบ๊อะเนอ ตือทือเค เบ่เบ่, ทือเค เด๊อ คยาเนอ เบ่เบ่, จอแปแหร่ดุ อาเตเน่วพู๊ เต๊เห่ เน๊อ แกแยเห่ขุพู๊ อาพู๊เหมาะ เต๊เห่ พย๊าลู เร๊อ อา พู๊โอ่แลหนิ แกแยฉว่าแกแยชอ แกแยดุทู เต๊เห่. เร๊อ อามุยดุ โลเทอโลเก่ แลแค เด๊อ งย๊าเค เนอเต๊เห่ เฮ๊อ. a 5จอแปแหร่ ตูจูเพร แม๊เถอะ แกแยเห่ขุพู๊ ซีเต๊เห่ เน๊อ อาจาอาจือ อา, มู๊แหม่รีแจ่ อาก่าอาแปล่ แหน่เจ๊อ, โทโต่ เหย่ซีซิปล่อ เต๊เห่เนอ อา เตเนเครเม โชชื่อ เตมู๊แหม่รีแจ่ ่ ปว๋า โตโพ๊ เจ๊อ. b 6เด๊อ จอแปแหร่ ตูจูเพร แบ๊ หนิ แกแยเห่ขุพู๊ เบ๊อะ เห่ขุเออ อาขว่าอาคยา, อา เตเนโม เกอเร๊อ ตีกี๋ โต่ เร๊อ อา โซแร แหน่เจ๊อ ลูซิปล่อ. 7เร๊อ จอแปแหร่ ตูจูเพร เฮ๊ เน๊อ, “ล๋อ แกแยเห่ขุพู๊ เน๊อ เตมีเตดอ เด๊อ อาดุดุ อาปีตี๊ตี๊ เนอเต๊เห่ เน๊อ ถู่พู๊โหย่พู๊ เด๊อ แว แบ๊ตา ลอ เหย่ซี เต๊เห่เนอ, แว เมโอ่เหม่แก ลอ เหย่ซี เบ๊อะ เห่ขุ เออเนอ ปา. เมเตเฮ๊เรอ เด๊อ แว แบ๊ตาหนิ เหย่ซี อาขว่าอาคยา, อา โซแร แหน่เจ๊อ แวซิปล่อ.” 8หม่าแน๊เรอ คูโนอาห์ พย๊าหนิ โค๊ดื่อ จอแปแหร่ ตูจูเพร อาบุ๊ยดุ อาเตอเรอทู.เพโนอาห์ อาหรี่อาแก
9เออหม่า อู ราม๊า โอ่หนิ เพโนอาห์ อาหรี่อาแก. เบ๊อะ เพโนอาห์ อาทือเคเนอ, อา หม่า แกแยจ๊อแกแยเต เตเพร, อา โอ่เซอเพร ลว๊า เน๊อ อู แด่ ลู เตซื๊อ. โท๊โต่ อาแบ๊ซว๊าแบ๊โค จว๊าเต่อเคเต่อ เน๊อ จอแปแหร่ดุ. c 10เพโนอาห์ อาพู๊เพรคู โอ่ ซิโซ. เร๊อ เหย่ซี มุย เน๊อ คูเชม, คูฮาม เน๊อ คูยาเฟท. 11จอแปแหร่ดุ แม๊เถอะ ซิเงลอ เน๊อ แกแยเห่ขุพู๊ อาซิปล่อเนอ อา มู๊แหม่รีแจ่ ่ จา แหน่เจ๊อ, เบ๊อะเต โต๊โผะ เต๋ เบ่เบ่ อาจามู๊แหม่รีแจ่ ่ ลอปลี เจ๊อ. 12จอแปแหร่ดุ แม๊ตา เบ๊อะ เห่ขุ เออ เร๊อ อา มู๊แหม่รีแจ่ ่ จาจือ ลอปลี เจ๊อ. แกแยเห่ขุพู๊ เบ๊อะ เห่ขุ เออเนอ อา เมลอปลีเจ๊อ เตซื๊อเตปล๊า ปว๋า เตเพรเจ๊อ. 13จอแปแหร่ดุ เฮ๊ เพโนอาห์ เน๊อ, “แว แด่แล เฮ๊อ แว ซิปล่อ เน๊อ แว เก่ เมจา เมปย๊า แก ลอเฮ๊อ แกแย เห่ขุพู๊ ปว๋า เตเพร ปา. เมเตเฮ๊เร๊อ เห่ขุเออ อาเล๋อ บาลอ เจ๊อเฮ๊อ เน๊อ เตจาเตมู๊แหม่ เฮ๊อ. เมเตเฮ๊เรอ เด๊อ เหย่ซี อาขว่าอาคยา, แว เก่ เมปย๊าแก เต่อ ลอ เหย่ซี เน๊อ เห่ขุ ปา. 14เร๊อ พย๊า มอ ส่อเหล่เห่อ ▼▼อู เม ส่อเกลอดุ เน๊อ ส่อ อิ เต เนอ เตเพร่ว ซิเง ตาเต เน๊อ โต่.
เร๊อ เมแถ่มอ เน๊อ ส่อเกลอดุ เนอนี๋. ด๊อตาตือ ลู โต๊โต่ เน๊อ โต๊โต่ เร๊อ อากูกู อากลอกลอ โปล่บี๊ ลอปลี อา เน๊อ โตโซเนอ นี๊. 15เมดุลู บ๊าเต เฮ๊เร๊อ, เมทู ลู อาเปล่ โซเย. เมแหล่ ลู อาเปล่ แงเชอ เร๊อ เมแถ่โลอา อาเปล่ โซเชอ นี๊. 16เน เบ่ เต หนิ อากู่กล๊อ, อากู่กล๊อเล เน๊อ ด๊อตือเคอ เนอ แด่โอ่ดา แก อา เต๊เปล่ นี๊. เด๊อ อารอเกลเนอ แด่โอ่ กู่ดา ตูกู เร๊อ เมโอ่ แถ่โล เร๊อ ลู อาแกเด โต๊โต่, อากล่าเมกู โต๊โต่ เน๊อ อาขุเล๊อ โต๊โต่ นี๊. 17แวเก่ นอ ดุแถ่ เทอ เด๊อ เห่ขุเออ เร๊อ แว เก่ เมปย๊าแก ล๋อ เต เด๊อ อา โอ่ เด๊อ ม๊อเล เต๊เห่ ปา. ล๋อ เต เด๊อ โอ่ เด๊อ เห่ขุ เออเต๊เห่เนอ อา เก่ เซอ แกลอ ปา. e 18หม่าแน๊เรอ แว เก่ เมหม่าเมกลอ แวเตอ๊อแล เน๊อ เน ปา. เอ๊หนิ เนพู๊ เพรคู เต๊เห่ เน๊อ เนเม, เร๊อ เอ๊หนิ เนแด่ เนอเต๊เห่ เร๊อ โน แลแค เด๊อ ส่อเกลอดุกู เนอนี๋. f 19แซ่ฮู๊ ล๋อ เตมีเตดอ เต๊เห่ เก่ โอ่เซอเพร เป่แฮ โป่ แลแค อาเงเนอ, ปื่อโน แบ๊ซว๊าหนิ เหย่ซี อาโหมะ เน๊อ อาเพ เต๊อเจ่อ เน๊อ ตาซว๊า เด๊อ ส่อเกลอดุกู เนอนี๊. 20ล๋อ ถู่ เน๊อ ถู่กลุย เร๊อดื่อ, เตมีเตดอ เน๊อ เตมีเตดอ อากลุย เร๊อดื่อ, เตมีเตดอ เด๊อ อาดุดุ อาปีตี๊ตี๊ เนอเต๊เห่ อากลุย เน๊อ อากลุย เร๊อดื่อ เก่ แฮโต ลอปลี เด๊อ เนโอ่ ปา เร๊อ แซ่ฮู๊ อา เก่ เซอเพร เป่แฮ โป่ อาเงเนอเร๊อ, ปื่อโน หนิ เหย่ซี อาโหมะ เต๊เบ่ อาเพ เต๊เบ่ นี๊. 21พย๊าโน โอ่ปล๊อ หนิลอ เนเหล่เอ่เหล่โอ ปว๋า เต๊อเจ่อ เน๊อ เตมีเตดอ อา เหล่เอ่เหล่โอ ปว๋า เต๊อเจ่อ นี๊.” 22โทเร๊อ เพโนอาห์ ครวา เมเกอ ฮู๊ จอแปแหร่ดุ เฮ๊แก ลู เนอ ปว๋า เต๊อเจ่อ. Genesis 7
เทอดุแถ่ อาหรี่อาแก
1เร๊อ จอแปแหร่ ตูจูเพร เฮ๊ เพโนอาห์ เน๊อ, “เอ๊ หนิ เนหี่พู๊แพพู๊ เร๊อ โนมอ เด๊อ ส่อเกลอดุกู เนอ นี๋. เด๊อ แกแย เออตือทือ อาเกล เนอ, แว แม๊เถอะ เฮ๊อ เน เน๊อ เน หม่า แกแยจ๊อแกแยเต เตเพร เฮ๊อ. 2ล๋อ เตมีเตดอ เด๊อ อาโพ๊แปละ เต๊เห่เนอ, ปื่อโน แบ๊ซว๊า หนิ ลู อาโหมะ โซซว๊าโตโด เน๊อ อาเพ โซซว๊า โตโด นี๊. เร๊อ เตมีเตดอ เด๊อ อา โพ๊แปละ เกออู โต่ เร๊อ อาโตหลู่แตแถ่ เน๊อ จอแปแหร่ดุ โต่ เนอเต๊เห่, อาโหมะโตโด, อาเพโตโด, ปื่อโนหนิ อา เต๊อเจ่อเร๊อตาซว๊า เนอ แพ๊ นี๊. 3เร๊อ ถู่ เมวเจ่อ ปว๊า เต๊อเจ่อเนอ, ปื่อโน หนิ อา เต๊อเจ่อ เน๊อ อาซว๊า โซซว๊าตาซว๊า, เร๊อ ปว๊า เต๊อเจ่อ ปื่อโนหนิ อาโหมะ เต๊เบ่ อาเพ เต๊เบ่ นี๊. แซ่ฮู๊ เหย่ซี เก่ พู๊เพ๊ โอ่เอ๊แถ่ เป่แฮ เด๊อ เห่ขุ ต๊าบ่าลอ อาเงเนอ, เม ฮู๊เนอ นี๊. 4เมเตเฮ๊เรอ โซซว๊าเตอเนอ บาแถ่ เฮ๊อ ปา เนอ, แว นอ จือตา งยา เจ๊อ เก่ เหมาะคี๊คี๊ เหมาะเกลเกล อาเนอ ลุยเชอ เน๊อ อาเซ ลุยเชอ เจ๊อ ปา. ล๋อ แกแยเห่ขุพู๊ เน๊อ เตมีเตดอ เด๊อ แว แบ๊ตา ลู เบ๊อะ เห่ขุ เออเต๊เห่เนอ แว เก่ เมเซอ แกลอ เหย่ซี ปา.” 5เร๊อ เพโนอาห์ เม ฮู๊ ล๋อ จอแปแหร่ ตูจูเพร เฮ๊ตา ลู เนอเต๊เห่. 6เบ๊อะ เทอ ดุแถ่ เด๊อ เห่ขุเออ เบ๊อะเนอ, เพโนอาห์ หน่า โอ่ เฮ๊อ อาเยโซซว๊า เฮ๊อ. g 7แซ่ฮู๊ เพโนอาห์ เน๊อ อาเม เน๊อ อาพู๊เพรคู เน๊อ อาแด่ ซีเต๊เห่ เก่ แลเปล๊ เน๊อ เทอดุ เออเนอเร๊อ, เหย่ซี โน แลแค เด๊อ ส่อเกลอดุ กู. h 8ล๋อ เตมีเตดอ เด๊อ อาดุดุ อาปีตี๊ตี๊ เน๊อ ถู่พู๊โหย่พู๊ เด๊อ อาโอ่แลแค เด๊อเห่ขุเออต๊าบ่า ล๊อปลีเต๊เห่เนอ, อา โพ๊แปละ เบ่เบ่, อา โพ๊แปละ โต่ เบ่เบ่, 9อาโหมะ เต๊เบ่ อาเพ เต๊เบ่ เหย่ซี โน แบ๊ซว๊า ลอ แลแค เด๊อ ส่อเกลอดุกู ฮู๊ จอแปแหร่ดุ เฮ๊แลแก เพโนอาห์ เนอ. 10โทเรอโซซว๊าเตอเนอ บาแถ่ เฮ๊อ เร๊อ เทอ ดุแถ่ บี๊แก เห่ขุ เฮ๊อ. 11เบ๊อะ เพโนอาห์ หน่า บาแถ่ เฮ๊อ เยโซซว๊า, เนอเล เตเล, เช๊อโซซว๊า เตอเนอ เบ๊อะเนอ, ล๋อ เทอเถ่ขุ เด๊อ เห่เล เนอเต๊เห่ อา ช๊าเถ่ ลอ. เทอกู่ดา เด๊อ ม๊อขุ เนอเต๊เห่ เบ่เบ่, อา โมแอ แซ่เจ๊อเน๊อ กู่ดา ลูโม เนอ เจ๊อ. i 12โทเร๊อ เก่จือตา เหมาะคี๊คี๊ เหมาะเกลเกล เร๊อ อา จือเจ๊อ อาเนอ ลุยเชอ เจ๊อ. 13เร๊อ เพโนอาห์ เน๊อ อาพู๊เพรคู ซิโซ คูเซม, คูฮาม, คูยาเฟท เน๊อ เพโนอาห์ อาเม เน๊อ อาแด่ ซีเต๊เห่ โน แลแค เด๊อ ส่อเกลอดุกู เบ๊อะ เก่จือตา เนอเตอเนอ เจ๊อ เฮ๊อ. 14เร๊อ ล๋อ เตมีเตดอ เด๊อ หมิเกล เนอเต๊เห่ เน๊อ เตมีเตดอ เด๊อ อูโบ่ อา เด๊อะหี่เด๊อะแพ เนอเต๊เห่ เน๊อ ล๋อ เตมีเตดอ เด๊อ อาดุดุ อาปีตี๊ตี๊ เนอเต๊เห่ เน๊อ เตมีเตดอ เด๊อ อา โย เด๊อ ม๊อเล เนอเต๊เห่เนอ, อา โนโอ่ เต่อเกอลอ เน๊อ เหย่ซี. 15เร๊อ ล๋อ เตเบ่แบ๊ เด๊อ อาซิปล่อ เซอเพร โอ่ เต๊เห่ เนอ, อาโหมะ โตโด อาเพ โตโด, ตาซว๊า โท ตาซว๊า อา โน โหร่เกอ แลแค เน๊อ เพโนอาห์ เด๊อ ส่อเกลอดุกู. j 16ฮู๊เนอเรอ เตมีเตดอ เต๊อเจ๋อ เน๊อ เต๊อเจ่อ, อาโหมะ เน๊อ อาเพ โน แบ๊ซว๊า แลแค เด๊อ ส่อเกลอดุกู ฮู๊ จอแปแหร่ดุ เฮ๊แก เพโนอาห์เนอ, โทเร๊อ จอแปแหร่ ตูจูเพร เมบี๊แก กู่ดา. 17เก่จือ แฮงยาเฮ๊อ อาเนอลุยเชอ เร๊อ เทอ ดุแถ่ เน๊อ ดุแถ่ เด๊อ เห่ขุเออ เร๊อ อา จอโตโจ แถ่แก ส่อเกลอดุเออ เด๊อ เทอขุ เร๊อ ส่อเกลอดุ โอ่โตโจ แถ่โลเล๊อ แก เน๊อ เห่ขุ. k 18เร๊อ เทอ ดุแถ่ เน๊อ ดุแถ่ เด๊อ เห่ขุเออ เร๊อ ส่อเกลอดุ โลจว๊า เด๊อ เทอขุ. 19เร๊อ เทอ ดุแถ่ ยา แหน่เจ๊อ อาขว่าอาคยา, อา ปลื่อบี๊ ลอปลี เจ๊อ โฉ่ดุโฉ่ทู โต่เด๊อ ม๊อเล เนอเต๊เห่ เจ๊อ. 20โทเรอ เทอ ดุแถ่ เน๊อ ดุแถ่ เร๊อ อา ดุ ปลื่อลอ โฉ่เนอ เต๊เห่, เร๊อ อา แย เจ๊อ เช๊อแง เปล่ เจ๊อ. 21ฮู๊เนอเรอ ถู่พู๊โหย่พู๊ เต๊เห่ เบ่เบ่, เตมีเตดอ อา แน เด๊อ อู โบ่ ลู เด๊อ หี่ เนอเต๊เห่ เบ่เบ่, เตมีเตแหม่ เด๊อ อาแปล เนอเต๊เห่ เบ่เบ่, แกแยเห่ขุพู๊ เบ่เบ่, ล๋อ เต เด๊อ อา ซิปล่อเซอเพร กู๊ก่าหรู่แร เด๊อ เห่ขุ เออ เต๊เห่เนอ, อา เซอแก ลอปลี เจ๊อ. 22ล๋อ เตเบ่แบ๊ เด๊อ อาซิปล่อ เซอเพร โอ่ลอ เด๊อ โคขู่ เออเต๊เห่เนอ, อา เซอแก ลอเจ๊อ. 23ล๋อ เต เด๊อ อา โอ่ เซอเพร กู๊ก่าหรู่แร เด๊อ เห่ขุ เออเต๊เห่เนอ, อา เซอแก ลอปลี เฮ๊อ. แกแยเห่ขุพู๊ เบ่เบ่, ล๋อ เตมีเตดอ เด๊อ อา โอ่ เด๊อ มีเกล เนอเต๊เห่ เบ่เบ่, ล๋อ เตมีเตดอ เด๊อ อู โบ่ เด๊อ หี่ เนอเต๊เห่ เบ่เบ่, ถู่พู๊โหย่พู๊ โย เด๊อ ม๊อเล ซีเต๊เห่ เบ่เบ่, จอแปแหร่ ตูจูเพร เมเซอแก ลอปลี เฮ๊อ. เร๊อ อา โอ่ เซอเพรแก ตื๊อแพ๊ เพโนอาห์ เน๊อ แกแย เด๊อ อา โอ่ เกอ เน๊อ ลู เนอเต๊เห่ แพ๊. l 24เทอดุ เบ๊อะ เห่ขุ เออเนอ อา งยา ม๊อเนอ เตเย เน๊อ แงเชอ.
Copyright information for
EkySCThai