Joh 18:15-27 | EkySCThai | STEP | คูซีโมน เปโตร เร๊อ เหย่ซู่ อา โคเจ่ เด๊อ อาโร เตเพรเน๊อ, อา ครวาจว๊าเกอ แบ่เจ่ อาคยา. อา โคเจ่ เด๊อ อาโร เออเตเพรเนอ, เพรหลู่แต กู่กล๊อดุเล๊อ เออเตเพร ซิเง ตาเต ลู อาขว่าอาคยา, อา จว๊าโนเกอ เร๊อ แบ่เจ่ เหย่ซู่ เด๊อ เพรหลู่แต กู่กล๊อดุเล๊อ เออเตเพร อาหี่ เตเร๊รากู.

John 18:15-27

เปโตร โชโม๊บิแก เร๊อ แว ซิเงน๊อ เหย่ซู่ โต่

(มัทธิว ๒๖:๖๙-๗๐, มาระโก ๑๔:๖๖-๖๘, ลูกา ๒๒:๕๕-๕๗)

15 คูซีโมน เปโตร เร๊อ เหย่ซู่ อา โคเจ่ เด๊อ อาโร เตเพรเน๊อ, อา ครวาจว๊าเกอ แบ่เจ่ อาคยา. อา โคเจ่ เด๊อ อาโร เออเตเพรเนอ, เพรหลู่แต กู่กล๊อดุเล๊อ เออเตเพร ซิเง ตาเต ลู อาขว่าอาคยา, อา จว๊าโนเกอ เร๊อ แบ่เจ่ เหย่ซู่ เด๊อ เพรหลู่แต กู่กล๊อดุเล๊อ เออเตเพร อาหี่ เตเร๊รากู. 16 หม่าแน๊เรอ คูเปโตร ก๊อถ่อ โอ่แก เด๊อ ลูกู่ดากลอ แพ๊. อา โคเจ่ เด๊อ อาโร เด๊อ เพรหลู่แต กู่กล๊อดุเล๊อ ซิเง ลู เออเตเพรเนอ, อา เถ่คยา เร๊อ อา เถ่เฮ๊ เพรโอ่ป่อ กู่ดา เพรเหมาะพู๊ เออเตเพร เร๊อ อา เอ๊โน คูเปโตร เออ เด๊อ หี่เตเร๊รากู.

17 เพรเหมาะพู๊ โอ่ป่อ กู่ดา เออเตเพร เฮ๊ คูเปโตร เน๊อ, “เน หม่า เน โอ่เต่อเกอ เด๊อ เหย่ซู่ เฮ๊เนอ เตเพร อา โคเจ่ เนอเต๊เห่ อาเกล เตเพร เฮ๊อ, แวเฮ๊โต่?” เร๊อ อา เฮ๊ฉื่อ ลู เน๊อ, “แว หม่าโต่.”

18 ย๋อ เก๊โหร่ เร๊อเพร หลู่ เต๊เห่ เร๊อ เกลอฮู๊ เด๊อ อา โอ่ป่อ เตหลู่เเตโฮ เต๊เห่ ก๊อถ่ออิชุ๊ย ตาวา ลอปลี หมิ. เร๊อ คูเปโตร ก๊อถ่ออิชุ๊ย เต่อเกอ หมิ เร๊อ เหย่ซี.

เพรหลู่แต กู่กล๊อดุเล๊อ เตเพร เจแม๊ เหย่ซู่

(มัทธิว ๒๖:๕๙-๖๖, มาระโก ๑๔:๕๕-๖๔, ลูกา ๒๒:๖๖-๗๑)

19 เพรหลู่แต กู่กล๊อดุเล๊อ เนอเตเพร แด๊เฮอแม๊ เหย่ซู่ เร๊อ อา โคเจ่ เต๊เห่ อาหรี่อาแก เร๊อ อา เตอิซว๊าอี๊แส่ เต๊เห่ อาหรี่อาแก.

20 แบ่เจ่ เหย่ซู่ เฮ๊ฉื่อ ลู เน๊อ, “แว อิซว๊าโห่ อิซว๊าเซ๊น๊อ เน๊อ อู โต่, แว อิซว๊าหล่าอิซว๊าลี อู เด๊อ แกแย ปว๋า เตเพร อาเป๊เส่เง แพ๊. ล๋อ แกแยยิวพู๊ เต๊เห่ เหล่แฮ แม๊เถอะ ตาฉื่อ หนิเกอ ลู อาเหล่โอ่ เด๊อ เตจ๊อเบ โฮกู เนอ เบ่เบ่, เด๊อ เตหลู่แต โฮกูเนอ เบ่เบ่ แว อิซว๊า อู ปว๋า โตโพ๊ เจ๊อ. 21 ฮู๊เนอเรอ เน จว๊า แด๊เฮอโต่ แว เมเต? แด๊เฮอเกอแกแย เด๊อ อา หนิโฮ แว เตโด่แน เนอเต๊เห่ กอกอ. แว โด่แน เป่ เหย่ซี แคร๋ เมเต เนอ, อา ซิเง ลอปลี แพ๊,” แบ่เจ่ เหย่ซู่ เฮ๊กาคยาฉื่อ เหย่ซี ฮู๊เนอ.

22 เบ๊อะแบ่เจ่ เหย่ซู่ เฮ๊ ฮู๊เออ เบ๊อะเนอ, เกลอฮู๊ โอ่ป่อ เตหลู่เเตโฮ เด๊อ อา โอ่ผื่อ เบ๊อะลูแก่ช๊า เนอเตเพร แปล่ ลู กู๊หลิเล เร๊อ อา เฮ๊ ลู เน๊อ, “เน จว๊า เฮ๊ฉื่อโต่ เพรหลู่แต กู่กล๊อดุเล๊อ เออเตเพร ฮู๊เนอ เมเต?” อา เฮ๊ ลู ฮู๊เนอ.

23 แบ่เจ่ เหย่ซู่ เฮ๊ฉื่อ ลู เน๊อ, “แว เก่ เฮ๊ ซื๊อ เฮ๊เรอ, อา ซื๊อแคร๋ อิเตเนอ, แด๊โฉ่โล เป่แม๊ แว, อา เก่ โต เฮ๊เรอ หม่าเมเตเร๊อ เน จว๊า แปล่โต่ แว กู๊หลิเล เมเต?” อา เฮ๊ฉื่อ ลู ฮู๊เนอ. 24 โทเรอ เพอันนาส จอกลอหม่า ปาแพ๊ ลู เร๊อ อา นอซูจว๊า อู เร๊อ เหย่ซู่ เด๊อ เพรหลู่แต กู่กล๊อดุเล๊อ เพคายาฟาส เฮ๊ เออเตเพร อา โอ่.

คูเปโตรโช่โม๊บี่แก คยา เหย่ซู่

(มัทธิว ๒๖:๗๑-๗๕, มาระโก ๑๔:๖๙-๗๒, ลูกา ๒๒:๕๘-๖๒)

25 คูซีโมน เปโตร อิชุ๊ยเล ตื๊อดื่อปา หมิ เบ๊อะเนอ. เร๊อ แกแย เด๊อ อาโร เตเพร เฮ๊ ลู เน๊อ, “เน หม่า อาโคฮู๊เจ่ แวเฮ๊?” อา แด๊เฮอ ลู เนอ,

อา เฮ๊ กาคยาฉื่อ เน๊อ, “โต๋, แว หม่า น๊อโต่.”

26 เพรหลู่แต กู่กล๊อดุเล๊อ อาหลู่เล๊ เด๊อ อาโป่แหว่ เร๊อ คูเปโตร ปาตือ ลู กู๊หลิโก่ เนอเตเพร แด๊เฮอ ลู เน๊อ, “แว แม๊เถอะน๊อ เน เด๊อ โต๊โฉ่เผ่ เตเร๊รากู เนอเรอ เน โอ่เต่อเกอ เร๊อ เหย่ซู่ แวเฮ๊?” อา แด๊เฮอ ลู ฮู๊เนอ. 27 คูเปโตร เท๊ฉื่อบี๊แก คยาแซ๊ เร๊อ แว หม่าโต่ อา เฮ๊โทโท เร๊อ ชาเพ อี๊อู่แถ่.