Joh 18:28-38 | EkySCThai | STEP | เออโตโพ๊เรอ แกแยยิวพู๊ เต๊เห่ โอ่ เด๊อ เพคายาฟาส หี่ เร๊อ อา เอ๊จว๊า แลแค แบ่เจ่ เหย่ซู่ เด๊อ โรมัน คุ๊ยปีลาต โฮกู. เหย่ซี เอ๊จว๊า ลู เบ๊อะเหมาะลี โรมื่อ เบ๊อะเนอ. แกแยยิวพู๊ เต๊เห่ ซิหยื่อ โอ่ อาโพ๊อาแปละ แลแค อาเหน่ ฮู๊ เหย่ซี เตจ๊อเบ เหล่โกลเหล่แบ่ โอ่ เนอ. ฮู๊เนอเรอ เหย่ซี โน แลแค เด๊อ คุ๊ยปีลาต โฮกู โต่, เมเตเฮ๊เร๊อ เหย่ซี เก่ โน เฮ๊เนอ, อู เด๊อะเอ่ เหย่ซี ป่วยเตจว๊า ตา ลว๊า อาเหล่เอ่ เหมาะเฮ๊ เออเนอ โต่.

John 18:28-38

อู เอจว๊า แบ่เจ่ เหย่ซู่ เด๊อ คุ๊ยปีลาต แบ๊เส่เง

(มัทธิว ๒๗:๑-๒, ๑๑-๑๔, มาระโก ๑๕:๑-๕, ลูกา ๒๓:๑-๕)

28 เออโตโพ๊เรอ แกแยยิวพู๊ เต๊เห่ โอ่ เด๊อ เพคายาฟาส หี่ เร๊อ อา เอ๊จว๊า แลแค แบ่เจ่ เหย่ซู่ เด๊อ โรมัน คุ๊ยปีลาต โฮกู. เหย่ซี เอ๊จว๊า ลู เบ๊อะเหมาะลี โรมื่อ เบ๊อะเนอ. แกแยยิวพู๊ เต๊เห่ ซิหยื่อ โอ่ อาโพ๊อาแปละ แลแค อาเหน่ ฮู๊ เหย่ซี เตจ๊อเบ เหล่โกลเหล่แบ่ โอ่ เนอ. ฮู๊เนอเรอ เหย่ซี โน แลแค เด๊อ คุ๊ยปีลาต โฮกู โต่, เมเตเฮ๊เร๊อ เหย่ซี เก่ โน เฮ๊เนอ, อู เด๊อะเอ่ เหย่ซี ป่วยเตจว๊า ตา ลว๊า อาเหล่เอ่ เหมาะเฮ๊ เออเนอ โต่.

29 ฮู๊เนอ อาขว่าอาคยา, คุ๊ยปีลาต เถ่ เด๊อ โฮกลอ เร๊อ อา แม๊เถอะ เฮ๊เบ่ฉื่อ เร๊อ เหย่ซี เน๊อ อา แด๊เฮอ เหย่ซี เน๊อ, “ซี จว๊า แด่เตซื๊อ ลู เร๊อ อิเต อาขว่าอาคยา เต?”

30 เหย่ซี เฮ๊ฉื่อ เน๊อ, “อา เก่ เมซื๊อ โต่ เร๊อ เป เอ๊แฮ ลู เด๊อ เนโอ่ แตแค๋ โต่,” อา เฮ๊ฉื่อ ลู ฮู๊เนอ.

31 คุ๊ยปีลาต เฮ๊ฉื่อ เหย่ซี เน๊อ, “เอ๊ จว๊า เกอ เร๊อดื่อ แลแค เร๊อ เตเมจากาคยา เกอเร๊อดื่อ แลแค ฮู๊ ซี เตซว๊าเตแส่ โอ่เนอ.” หม่าแน๊เรอ แกแยยิวพู๊ เต๊เห่ เฮ๊ฉื่อ ลู เน๊อ, “เป เตอเรอฉว่าชอ เด๊อ เป เบ่ เมจากาคยา เซอแก แกแย เนอ, อาโอ่โต่,” อา เฮ๊ฉื่อ ฮู๊เนอ.

32 อา เฮ๊ แลแค ฮู๊เออ หม่า แซ่ฮู๊ อา เก่ เล๊อบาแถ่ ฮู๊ แบ่เจ่ เหย่ซู่ เฮ๊หนื่ออื่อ เฮ๊โข่แก เร๊อ อา เตเร เซอ ฮู๊เต เต๊อเจ่อ ปา เนอเฮ๊อ. ^a

33 ฮู๊เนอเรอ คุ๊ยปีลาต โน เด๊อ อาโฮกู เร๊อ อา นอเอ๊โน อู เร๊อ แบ่เจ่ เหย่ซู่ เร๊อ อา แด๊เฮอ ลู เน๊อ, “เน หม่า แกแยยิวพู๊ อาคุ๊ย เตเพร หม่าแหน่ แอ? ฮู๊เนอ.”

34 แบ่เจ่ เหย่ซู่ เฮ๊ฉื่อ ลู เน๊อ, “เออ หม่า เน เหล่เตเน เฮ๊เถ่ เกอเร๊อดื่อ แอ? หม่าโต่เรอ แกแย เตเพรเพร แฮแด๊ เป่ เน เร๊อ แวหรี่แก แอ? อา แด๊เฮอ กาคยาฉื่อ ลู ฮู๊เนอ.”

35 เร๊อ คุ๊ยปีลาต เฮ๊ ลู เน๊อ, “เน เตเน แว เร๊อ แกแยยิวพู๊ แอ? เพร เด๊อ อา ซูแฮ เน เด๊อ แวโอ่ เต๊เห่ เนอหม่า เน แกแยเมวเจอะพู๊ เร๊อดื่อ เร๊อ เน เพรหลู่แต ทวาดุทวาเต เร๊อดื่อ เนอเต๊เห่ แพ๊. เน จว๊าเมซื๊อ แคร๋ อิเตเต?” คุ๊ยปีลาต แด๊เฮอ ลู ฮู๊เนอ.

36 แบ่เจ่ เหย่ซู่ เฮ๊ฉื่อ ลู เน๊อ, “แวเทอแวเก่ หม่า เบ๊อะเห่ขุเออ หม่าโต่. เก่ อา หม่า เบ๊อะเห่ขุเออ เฮ๊เนอ, แซ่ฮู๊ แว เก่ โต่เด๊อ แกแยยิวพู๊ อา ทวาดุทวาเต เออเต๊เห่ อา กู๊ยากู แต่เหม่ เนอ, แวโค เด๊อ อา ครวาเกอ แว เต๊เห่ เก่ วื๊อฉื่อ โทเฮ๊อ เหย่ซี กอ. ฮู๊เนอเรอ แวเทอแวเก่ หม่า เบ๊อะเห่ขุเออเนอ หม่าโต่” อา เฮ๊ ฮู๊เนอ.

37 คุ๊ยปีลาต เฮ๊ ลู เน๊อ, “เก่ เฮ๊ฮู๊เนอ เฮ๊เรอ เน ทวา คุ๊ย เตเพร เฮ๊อ เนอ?” อา แด๊เฮอ ลู ฮู๊เนอ.

แบ่เจ่ เหย่ซู่ เฮ๊ฉื่อ ลู เน๊อ, “แว หม่า คุ๊ย เตเพร หม่าแหน่ ฮู๊ เน เฮ๊ เนอเฮ๊อ. แซ่ฮู๊ แว เก่ เฮ๊โฉ่เป่ อู เร๊อ เตหมะเตจ๊อ เนอเรอ, แว แฮ อากาโอ่พู๊เจแล เด๊อ เห่ขุเออ เฮ๊อ. ล๊อ แกแย โอ่เกอ เด๊อ เตหมะเตจ๊อ ตากยา เต๊เห่เนอ อา เก่ หนิดา แวโหง่ ปา” อา เฮ๊ ฮู๊เนอ.

(มัทธิว ๒๗:๑๕-๓๑, มาระโก ๑๕:๖-๒๐, ลูกา ๒๓:๑๓-๒๕)

38 คุ๊ยปีลาต แด๊เฮอ ลู เน๊อ, “เตหมะเตจ๊อ หม่า อิเตเต?” ฮู๊เนอ. เร๊อ คุ๊ยปีลาต เถ่โต คยาแซ๊ เด๊อ แกแยยิวพู๊ เออเต๊เห่ อา โอ่ เร๊อ อา เฮ๊ เหย่ซี เน๊อ, “แว เตเร เมจากาคยา อา อาเงเนอ. แว แม๊เถอะ อาเตซื๊อ เตอเจ๋อ โต่. อา เฮ๊ เหย่ซี ฮู๊เนอ.