Luk 18:18-30 | EkySCThai | STEP | แกแย ทวา กู่กล๊อ เตเพร แด๊เฮอ เหย่ซู่ เน๊อ, “เก๋อ, ซ๊าร๊าแร๋ แซ่ฮู๊ แว เก่ พย๊าหนิ เกออู ซิปล่อเซอเพร ตูจูเพร ตาแลเคร๊ เนอเรอ, แว โตเบ่ เมแคร๋ หม่าอิเต?”

Luke 18:18-30

แกแย ดุแหย่แถ่เซ เตเพร

(มัทธิว ๑๙:๑๖-๓๐, มาระโก ๑๐:๑๗-๓๑)

18 แกแย ทวา กู่กล๊อ เตเพร แด๊เฮอ เหย่ซู่ เน๊อ, “เก๋อ, ซ๊าร๊าแร๋ แซ่ฮู๊ แว เก่ พย๊าหนิ เกออู ซิปล่อเซอเพร ตูจูเพร ตาแลเคร๊ เนอเรอ, แว โตเบ่ เมแคร๋ หม่าอิเต?”

19 เหย่ซู่ แด๊เฮอ ลู เน๊อ, “เน จว๊าเอ๊ โต่ แว เด๊อ ซ๊าร๊าแร๊ เมเต? แกแยแร๊ โอ่ เตเพร่ว โต่, อา โอ่ แพ๊ตื่อ จอแปแหร่ เตเพรแพ๋. 20 เน ซิเง จอแปแหร่ โหง่เฮ๊แก เต๊เห่ เฮ๊ เน๊อ, ‘จว๊าซื๊อ แต่ อูพู๊อูเม แต่เหม่, ^a เมเซอ แต่ แกแย แต่เหม่, ^b เอ่โห่เอ่ฮี๊ แต่ อูเต่ แต่เหม่, ^c ข่า แลโฮแลแห่ แต่ เต แต่เหม่, ^d เบ่หยื่อเบ่แหน่ เนโหมะเนเพ ^e.’”

21 เร๊อ แกแยเพ เออเตเพร เฮ๊ฉื่อ ลู เน๊อ, “ล๋อ เออเต๊เห่เนอ แว โตม๊าโทลอเฮ๊อ เร๊อ แว ครวาเม โทลอเฮ๊อ เด๊อ แว พู๊เจ่เค เนอ ปา เจ๊อเฮ๊อ.”

22 เบ๊อะเหย่ซู่ หนิโฮ อา เฮ๊ ฮู๊เออ เบ๊อะเนอ, อา เฮ๊ ลู เน๊อ, “เต เด๊อ เน โหล่เม เนอ อา โอ่ปา เต๊อเจ่อ. กา อิเชแกลอ เน ตาหมื่อตาเต เนอเต๊เห่ เร๊อ เด๊อะจว๊า เป่ ลอ เร๊อ แกแย โซพ๊าโซแรพู๊ เนอเต๊เห่. เน เก่ เมฮู๊เนอ เฮ๊เรอ เน เก่ พย๊าหนิ เตดุแหย่แถ่เซ เด๊อ ม๊อขุ ปา. กาเมโท ฮู๊เนอ เร๊อ แฮ ครวา เกอแวคยา.”

23 แกแยเพ เออเตเพรเนอ, อา ย๋อ ดุแหย่ ตาป่อตาเป เจ๊อ อาขว่าอาคยา, เบ๊อะอา หนิโฮ โหง่ เออตือมือ เบ๊อะเนอ, อา ซิเปล แหน่เจ๊อ. 24 เหย่ซู่ แม๊ตาต๊า โท ลู เร๊อ อา เฮ๊ เน๊อ, “แกแย ดุแหย่แถ่เซ เต๊เห่ เตเร โน เด๊อ จอแปแหร่ อาเทออาเก่กู เนอ, อาแหย่ แหน่เจ๊อ เด๊อ เหยซีเง เจ๊อ! 25 ตีซิโบดุ โตโด เตเร ปย๊าโน เด๊อ เท๊หลิกูเนอ อายู เล๊อปา เจ๊อ เร๊อ แกแย ดุแหย่แถ่เซ เตเพร เตเร โน เด๊อ ม๊อขุ เทอเลเก่กู เนอ เจ๊อ.”

26 แกแย เด๊อ อา หนิโฮ เหย่ซู่ เตเฮ๊เบ่ เออเต๊เห่เนอ, อา แด๊เฮอ ลู เน๊อ, “เก่ เมฮู๊เนอเรอ อูเป เตเพร เตเร พย๊าหนิ แจ่ปา เตเมแลเปล๊กา เป?”

27 เร๊อ เหย่ซู่ เฮ๊ฉื่อ เน๊อ, “เต เด๊อ แกแย เมแจ่โต่เนอ, จอแปแหร่ เมแจ่ แพ๊.”

28 คูเปโตร เฮ๊ เน๊อ, “แม๊มอ, เป แด่แก ลอ เจ๊อ เฮ๊อ เปหี่เปแพ เต๊เห่ เร๊อ เป ครวาเกอเฮ๊อ เนคยา เฮ๊อ.”

29 เร๊อ เหย่ซู่ เฮ๊ เหย่ซี เน๊อ, “แว เฮ๊หม่าแหน่ เจ๊อ ซี เจ๊อ, เด๊อ จอแปแหร่ อาเทออาเก่ อาเงเนอ, แกแย เตพร เพร เก่ แด่แก อาหี่อาแพ เบ่เบ่, อาพู๊อาเม เบ่เบ่, อาโป่อาแหม่ เต๊เห่ เบ่เบ่, อาโหมะอาเพ เบ่เบ่ เฮ๊เนอหม่า, 30 จอแปแหร่ อา เด๊อะปลูเด๊อเผ่ เอ๊เล๊อ ปา เจ๊อ ซี เน๊อ เออตือทือเนอ ปา. โท๊โต่ ช๋า เนอปา ตือทือเนอ, จอแปแหร่ เก่ เด๊อะ ลู ซิปล่อเซอเพร ตูจูเพร ตาแลเคร๊ ปา.”