Luke 20:1-8
อู แด๊เฮอ เหย่ซู่ อา เตอเรอฉว่าชอ อาหรี่อาแก
(มัทธิว ๒๑:๒๓-๒๗, มาระโก ๑๑:๒๗-๓๓)
1เตอเนอเค, เหย่ซู่ โอ่ เด๊อ เตเตหลู่แตโฮกู เร๊อ อา อิซว๊าอี๊แส่ตา เอ๊ลา แกแย, เร๊อ อา แด๊โฉ่โด่แน เป่ อู เร๊อ เตซิครือมีลา. เร๊อ เบ๊อะเนอเค, เพร หลู่แต กู่กล๊อ เต๊เห่ เร๊อ เพรอิซว๊า เตซว๊าเตแส่ อาซ๊าร๊า เต๊เห่, เร๊อ แกแยยิวพู๊ อาตู๊หมู่ตอกล๊อ ทวาดุทวาเต เต๊เห่ จว๊า เด๊อ ลูโอ่. 2เร๊อ อา เฮ๊ ลู เน๊อ, “แด๊โฉ่โล เป่ แม๊ เป, เน เมเต เออเต๊เห่ เนอหม่า เน จว๊าเม เร๊อ อูเป อา เตอเรอฉว่าชอ เป? อูเป นอเม เน เป?” 3เร๊อ แบ่เจ่เหย่ซู่ เฮ๊ฉื่อ เหย่ซี เน๊อ, “เก่ เฮ๊ฮู๊เนอเรอ, แว แด๊เฮอ เกอ ซี โหง่ ตือมือ, เร๊อ แด๊โฉ่โล เป่ เกอ แว. 4เพรเจเทอ คูยอห์น เจ เป่ อู เทอ เออเนอหม่า จอแปแหร่ เด๊อะลู เตอเรอฉว่าชอ แอ? หม่าโต่เรอ แกแย เด๊อะลู แอ?” 5เหย่ซี โด่แน เกอเร๊อ เป่ลู เน๊อ, “เป โต เฮ๊ฉื่อ อา ฮู๊เต? เป เก่ เฮ๊ เน๊อ, ‘จอแปแหร่ เด๊อ ลู’ เก่เฮ๊เรอ, อา เกล๊ แด๊เฮอ แหน่ เฮ๊อ เป เน๊อ, ‘เก่เฮ๊ฮู๊เนอเรอ ซี หยื่อเอ่ ลู โต่ เมเต?’ อา เกล๊ เฮ๊ แหน่ เฮ๊อ. 6หม่าโต่เรอ, ‘แกแย เด๊อะ ลู,’ เป เก่ เฮ๊ เรอ ล๋อ แกแย เบ๊หมู่ เบ๊อะเออ เต๊เห่ ลา หยื่อเอ่ เร๊อ คูยอห์น หม่า เพรโพร เตเพร อาขว่าอาคยา, เหย่ซี เก่ ต่าเซอ เป เร๊อ หล่อ ปา.” 7ฮู๊เนอเรอ เหย่ซี เฮ๊ฉื่อ เน๊อ, “อูเป เด๊อ คูยอห์น เตอเรอฉว่าชอ เด๊อ อา เก่ เจ เป่ อู เทอ เออเนอ, เป ซิเงโต่.” 8เร๊อ เหย่ซู่ เฮ๊ฉื่อ เหย่ซี เน๊อ, “เก่เฮ๊ ฮู๊เนอเรอ แว แรเต เออเต๊เห่ เร๊อ อูเป เตอเรอฉว่าชอ เป เนอ แว แด๊โฉ่โล เป่ ซี โต่โต่.”
Copyright information for
EkySCThai