Luke 20:27-40
อู แด๊เฮอ เหย่ซู่ เร๊อ เตเซอ ก๊อถ่อกาคยา อาหรี่อาแก
(มัทธิว ๒๒:๒๓-๓๓, มาระโก ๑๒:๑๕-๒๗)
27สะดูสีพู๊ เด๊อ อา หยื่อเอ่ เร๊อ แกแยเซอ ก๊อถ่อเซอเพร กาคยา โต่ เนอเต๊เห่ จว๊า เด๊อ เหย่ซู่ โอ่ เร๊อ แฮ แด๊เฮอ ลู โหง่ ตือมือ เนอ, a 28“ซ๊าร๊าดุ, คูโมเสส ราแก เตซว๊าเตแส่ ตือมือ เด๊อ เปเง เร๊อ อา เฮ๊ เนอ, แกแย เตพร เพร เก่ เซอแก อาเมเหล่, เร๊อ อาพู๊ อา โอ่แก เตเพร่ว โต่ เฮ๊เนอ, แซ่ฮู๊ อากลุยแล อา โอ่แก เนอเรอ, อา โป่เพรคู เบ่ พย๊าดว้า อาคี โอ่แกเออ, อา เฮ๊ ฮู๊เนอ. b 29กู๊แหน่เร๊อ โป่ เร๊อ แหม่ เพรคู โอ่ โซซว๊าเตเพร. อา แหว่ เพร่วเล๊อ เตเพร พย๊า อาเม เร๊อ เด๊อคยาเนอ อา เซอแก อาเม เหล่, เร๊อ อาพู๊ โอ่แก เตเพร่ว โต่ อาขว่าอาคยา, อาโป่ เด๊อคยา เตเพร เบ่พย๊าดว้า อาคี โอ่แก เออเตเพร. 30เร๊อ อา โป่เพรคู เนอเพรเตเพร พย๊าดว้า คยาแซ๊ อาคีเออ. 31โทเรอ อา โป่เพรคู โซเพรเตเพร โต่เด๊อ โซซว๊าเตเพร เออเนอ เซอแก แซ่เกอ ฮู๊เนอ, เร๊อ อาพู๊ โอ่แก แลแค เตเพร่ว โต่. 32เด๊อคยา เร๊อ เพรเหมาะ เออเตเพร เซอแก เกอเกอ. 33ฮู๊เนอเร๊อ ช๋า เซอเพรกาคยา อาม๊อเนอ ปา เตอเนอเนอ, เพรเหมาะ เออเตเพร อา ทวา เบ๊อะเตเพร อาเม ปาเป? เมเตเฮ๊เรอ เหย่ซี โป่เร๊อแหม่ โซซว๊าเตเพร พย๊าจือลอ ลู เพรเหมาะ เออเตเพร เนอ.” 34เหย่ซู่ เฮ๊ฉื่อ เหย่ซี เน๊อ, “เออตือทือเนอ, อู พย๊าพู๊พย๊าเม แลแค ว๊า. 35หม่าแน๊เรอ แกแย เด๊อ จอแปแหร่ แด่เฮอ เหย่ซี เน๊อ อา โต เฮ๊อ เด๊อ อา เก่ เซอ ก๊อถ่อกาคยา ช๊า โหน่ปา ตือทือ ปา เต๊เห่เนอ, เตพย๊าพู๊พย๊าเม โอ่ปา โต่ เฮ๊อ. 36เหย่ซี เก่ แซ่ เร๊อ เตเน่วม๊อขุ เนอเต๊เห่ ปา เร๊อ อา เซอ แจ่ ปา โต่. เหย่ซี ก๊อถ่อ กาคยา เด๊อ เตเซอ ปา อาขว่าอาคยา, เหย่ซี หม่า จอแปแหร่ อาพู๊ เต๊เห่ เฮ๊อ. 37เร๊อ คูโมเสส แด๊โฉ่ หล่าหล่า ลีลี เจ๊อ เร๊อ แกแย เด๊อ อา เซอ โทเฮ๊อ เต๊เห่เนอ, อา เก่ ก๊อถ่อ เซอเพร กาคยา ปา, เมเตเฮ๊เรอ เพอับราฮัม เร๊อ เพอิสอัค เร๊อ เพยาโคบ เออเต๊เห่เนอ, อา เซอโท อา งย๊า ลาเฮ๊อ ตื๊อดื่อเรอ ลีเทส่อพ๊ากู เฮ๊ โอ่ โต๊โต่ เน๊อ เบ๊อะหมิแกแถ่ แจ๊โจ่ โต๊โจ่ เบ๊อะเนอ, คูโมเสส เอ๊ แบ่เจ่ เออเนอ เน๊อ, ‘เพอับราฮัม อาจอแปแหร่, เพอิสอัด อาจอแปแหร่, เร๊อ เพยาโคบ อาจอแปแหร่,’ ฮู๊เนอ. c 38แกแย ปว๋า เตเพร โอ่เซอเพร ตูจูเพร ลอ เด๊อ จอแปแหร่ อาเป๊เส่เง อาขว่าอาคยา, อา หม่า แกแยเซอ เต๊เห่ อาจอแปแหร่ หม่าโต่, แกแย เซอเพร เต๊เห่ อาจอแป่แหร่.” 39เพรอิซว๊า เตซว๊าเตแส่ อาซ๊าร๊า เต๊เห่ เฮ๊ โป่ อา เน๊อ, “ซ๊าร๋า, เน เฮ๊ฉื่อ แจ่ แหน่เจ๊อ เจ๊อ.” 40เร๊อ เหย่ซี แด๊เฮอ เป่แฮ บื่อ ปา ลู เตอเจ๋อ โต่.
Copyright information for
EkySCThai