Luke 3:1-18
เพรเจเทอ คูยอห์น อา เตเฮ๊โฉ่โด่แน
(มัทธิว ๓:๑-๑๒, มาระโก ๑:๑-๘, ยอห์น ๑:๑๙-๒๘)
1เบ๊อะ จ๊อแผ่ดุ ทิเบริอัส เป๊อะเทอเป๊อะเก่ บาแถ่ เฮ๊อ เช๊อแง หน่า เบ๊อะเนอ, ปอนทิอัสปีลาต ทวาแถ่ คุ๊ยดุ เด๊อ ยูดาห์เก่. เร๊อ เพรเป๊อ กาลิลีเก่ หม่า คุ๊ยเฮโรด. เร๊อ คุ๊ยเฮโรด อาโป่ คูฟีลิป หม่า เพรเป๊อ อิทูเรียเก่ เร๊อ ตราโคนิติสเก่. คุ๊ยลีซาเนีย เร๊อ อา เป๊อหนิ เก่ อาบีเลนเก่. 2เพร่หลู่แต ดุเล๊ออู หม่า เพอันนาส เร๊อ เพคายาฟาส เฮ๊อ. เบ๊อะเนออาเค เพเศคาริยาห์ อาพู๊คู คูยอห์น โอ่ เด๊อ เก่เชเทอแก หล่อตาม๊าขุ. เร๊อ จอแปแหร่ แด๊โฉ่โลตาเป่ อาลาอาโหง่ เด๊อ คูยอห์น อา โอ่. 3ฮู๊เนอ อาขว่าอาคยา, ล๋อ ดอ โอ่ผื่อ ตีวี๊ตาวา เบ๊อะเทอแลโหมะจอร์แดน อาช๊า เต๊เห่เนอ, คูยอห์น จว๊าเล แด๊โฉ่โด่แน ลอ อู เร๊อ ถู่แหล่แต๊แกละ แลแค ซีซิปล่อ แลแค เร๊อ เจ แลแค ซีเหน่ เร๊อ เทอ ตื๊อเรอ จอแปแหร่ ปลวาแก ซี เตซื๊อ เนอเต๊เห่ แพ๊. 4ฮู๊ จอแปแหร่ อาลาอาโหง่ ราหนื่ออื่อ โทเฮ๊อ เด๊อ เพรโพร อิสยาห์ อา ลีกูเนอ, เร๊อ อา เฮ๊ เนอ, a “แกแย เตเพร เอ๊โทแถ่ เด๊อ เก่เชเทอแก หล่อตาม๊าขุ เร๊อ อา เฮ๊ เน๊อ, ‘ตี๊หรี่แตแร หนื่ออื่อ แลแค แกล๊ เด๊อ แบ่เจ่ อาเง. เมจ๊อเมเต แลแค แบ่เจ่ แกล๊เหล่แฮแกล๊ อาเง โตโบ๊ นี๋. 5ล๋อ เก่จ๊ออ่อกู เต๊เห่เนอ, เบ่ โท๊บา ลอ. ล๊อ โกโลขุ เน๊อ โฉ่ดุโฉ่ทู เต๊เห่เนอ, เบ่ เมรือดือ ลอ. เมจ๊อ ลอ แกล๊ เด๊อ อา ตี๊กิตากา เนอเต๊เห่. เร๊อ เบ่ เมส่า ลอ แกล๊ เด๊อ อา ตีพรีตูพรู๊ เนอเต๊เห่. 6แกแย ปว๋า เตเพร เก่ แม๊เถอะ ลอ จอแปแหร่ นว๊าแถ่ เพรเมแลเปล๊กา แกแย เห่ขุ เออเนอ เตเพร ปา.’” b 7แกแย เต๊เห่ เตเร แฮ เจ แลแค อาเหน่ เร๊อ เทอ เร๊อ อา แฮโหร่แฮเอ๊ แหน่เจ๊อ เด๊อ คูยอห์น อา โอ่. เร๊อ คูยอห์น เฮ๊ เหย่ซี เน๊อ, “หรู่ ซี๋! ซี เก่ เหล่แลเปล๊ เร๊อ จอแปแหร่ อา เต เด๊อะจา เด๊อ อา เก่ แฮปา เออเนอ อูเป เตเพร เด๊อะรอเด๊อะเร ซี เป? c 8ซี เก่ ถู่แหล่เต๊เปล่หม่าแหน่เฮ๊อซิปล่อเฮ๊อ เก่เฮ๊เรอ เด๊อะโล แลแค ซี เตโอ่เซอเพร เต๊เห่ เร๊อ ซี เตแด่ ซี ซิปล่อสู่เทอ เต๊เห่. เฮ๊โทเฮ๊แล แต่ ซีเหน่ เน๊อ, ‘เป หม่า เพอับราฮัม อากลุยอาแล’ เนอแต่เม. แว เฮ๊ ซี, จอแปแหร่ เมทวาแถ่ หล่อเออเต๊เห่ เร๊อ เพอับราฮัม อาพู๊ หม่า อา เมแจ่ แพ๊. d 9กวา เต๊เบ่ โอ่เฮ๊อ เด๊อ ส่อแก่ช๊าเฮ๊อ เร๊อ อู เก่ กวาเก่ แลคื๊อเฮ๊อ ส่อเหมาะ เต๊เห่ ปา e, เร๊อ อู เก่ จุ่ยตือ โต่ เจ๊อ เด๊อ อาหรุ่ยอาถว่า ปา. ส่อเหมาะ ต๊อเหมาะเหมาะ เด๊อ อาเส่อาโพ ตว่าแร๊ โต่ เนอ, อู เก่ กวาเก่ แลคื๊อแก อา ปา เร๊อ อู เก่ วีโนแก อา เด๊อ หมิกู ปา.” 10เร๊อ แกแย แด๊เฮอ คูยอห์น เอ๊ ลา เน๊อ, “เก่ เฮ๊ ฮู๊เนอเรอ เป โตเบ่ เมฮู๊เต?” 11เร๊อ อา เฮ๊ฉื่อ เหย่ซี เน๊อ, “แกแย เด๊อ อาจา โอ่ เนอปือเนอ เบ่ เด๊อ เป่ เกอ แกแย เด๊อ อาจา โอ่ เกออู ตือปื๋อ โต่ เนอเตเห่. โทเร๊อ แกแย เด๊อ อา เหล่เอ่เหล่โอ โอ่ เต๊เห่เนอ, เบเอ่เบโอ เป่ เกออู.” 12เพรกุยอาหมู่อาร๊า เต๊เห่ เก่ เจ เกอ แลแค อาเหน่ เร๊อ เทอ เร๊อ อา แฮ เด๊อ คูยอห์น อา โอ่ เร๊อ อา แฮ แด๊เฮอ ลู เน๊อ, “ซ๊าร๊า, เป โตเบ่ เมฮู๊เต?” f 13เร๊อ อา เฮ๊ฉื่อ เหย่ซี เน๊อ, “กุย แลแค อาหมู่อาร๊า ฮู๊ อู นอกุย ซีเนอ, กุยเล๊อกุยปา แต่ เร๊อ อู นอกุย ซี เนอ แต่เหม่.” 14เกลอฮู๊ เต๊เห่ แด๊เฮอเกอ ลู เน๊อ, “เป ล๊า? เป โตเบ่ เมฮู๊เต?” เร๊อ อา เฮ๊ฉื่อ เหย่ซี เน๊อ, “เบ่ ปื่อเผ่ พย๊าเผ่ หนิ อูรืออูเท โต่. เกบู เกบย่า แต่ อู เตเพร๊ แต่เหม่ โตซิปล่อ หนิ แลแค เร๊อ คว๊าเก่ เด๊อ ซี พย๊าหนิ เนอเต๊เห่.” 15แกแย แม๊ชือ ซิเล, เร๊อ เตเน โหร่ เอ๊ ลา แลแค คูยอห์น เน๊อ, “แตแร๋ หม่า ครี๊ เด๊อ จอแปแหร่ น๊อ แถ่ อา เด๊อ อา เก่ แฮ เมแลเปล๊กา แกแย เห่ขุ เฮ๊เนอหม่า อา เฮ๊อ ก๋อ.” 16ฮู๊เนอ อาขว่าอาคยา, คูยอห์น เฮ๊ เหย่ซี ปว๋า เตเพร เน๊อ, “แว เจ ซี เร๊อ เทอ แพ๊, หม่าแน๊เรอ เพร เด๊อ อา เตอเรออาโพร ฉว่าชอ เล๊อเล๊อ เจ๊อ เร๊อ แว เตเพรเนอ อา เก่ แฮ ปา. แว ฉิโล๊ เป่แพ๊ อา แข่แด๊พ๊า เปลอ แพ๊ เน๋อ แว ต่า เร๊อ อา โต่. อา เก่ แฮ เจ ซี เร๊อ แหย่โยบูโพ๊แบ่เจ่ เร๊อ หมิ ปา ▼▼“หมิ” อาโหง่แลช๊า หม่า, เตเจแม๊ หม่า อาหม่าหม่า เตเมปลีเมโพ๊ หม่า อาหม่าหม่า
17อา เออเนอ อาแซ่เน๊อ แกแย เตเพร เด๊อ อา อิเคร๊เช๊แก โบ๊สู่ เร๊อ โบ๊เช๊ เนอ. อาโบ๊เช๊ เต๊เห่เนอ อา เก่ กากลอปล๊อ เด๊อ อาแจกู ปา, ตื๊อดื่อเรอ โบ๊สู่ เต๊เห่เนอ อา เก่ ชื๊ออือแก เร๊อ หมิ เด๊อ อา ปีเป่ แจ่ ปา โตโพ๋ โต่ เออเต๊เผ่ อากู เนอ ปา.” 18คูยอห์น เอ๊โทแด๊โฉ่โด่แน เป่ อู เตซิครือมีลา อา แกล๊ อาโกล เอ๊โล เร๊อ อา เด๊อะอ๊าเด๊อะเหร่ เร๊อดื่อ แกแย เบ๊หมู่ เนอเต๊เห่.
Copyright information for
EkySCThai