Luke 6:6-11
เหย่ซู่ แหย่โอ่เหม่ แกแย กู๊ขุเซอ โตโค๊ เตเพร
(มัทธิว ๑๒:๙-๑๔, มาระโก ๓:๑-๖)
6เบ๊อะแกแยยิวพู๊ อา ม๊อเนอโด่ เด๊อ อาโร เตอเนอ เกอเนอ, เหย่ซู่ จว๊าโน เด๊อ เตจ๊อเบโฮกู เร๊อ จว๊าโน อิซว๊าอี๊แส่หนิ อู เบ๊อะเนอ. เบ๊อะเตจ๊อเบโฮกูเนอ แกแยเพ กู๊ขุเซอ เด๊อ จ๊อทว๊า โตโค๊ โอ่ เตเพร. 7เพรอิซว๊า เตซว๊าเตแส่ อาซ๊าร๊า เต๊เห่ เร๊อ ฟาริสี เต๊เห่ แม๊ปู แลแค เตหรี่เตแก เต๊อเจ่อเจ่อ เด๊อ อา เก่ ปื่อหนิ แลแค แบ่เจ่ เหย่ซู่ อา เตซื๊อ. ฮู๊เนอ อาขว่าอาคยา เหย่ซี โอ่ป่อแม๊ แลแค เด๊อ แกแยยิวพู๊ อา ม๊อเนอโด่ เออเนอหม่า อา แหย่โอ่เหม่ เป่ อูเตชุ๊ย ปา แอ? หม่า โต่ แอ? ฮู๊เนอ. 8หม่าแน๊เรอ เหย่ซู่ ซิเง เหย่ซี อาเต เตเน เต๊เห่ อาขว่าอาคยา อา เฮ๊ แกแย กู๊ขุเซอ โตโค๊ เออเตเพร เน๊อ, “แฮก๊อถ่อโอ่ เด๊อ อู กล่าเมกูเออ,” เร๊อ แกแย เนอเตเพร แฮก๊อถ่อโอ่ เบ๊อะเนอ. 9ฮู๊เนอโทเร๊อ เหย่ซู่ เฮ๊ เหย่ซี เน๊อ, “แว แด๊เฮอ โป่ ซี โหง่ ตือมื๊อ, เป เตซว๊าเตแส่ เฮ๊ เป เร๊อ เบ๊อะแกแยยิวพู๊ อา ม๊อเนอโด่ เบ๊อะเนอหม่า, เป โตเบ่ เม จว่า อู แอ? หม่าโต่เร๊อ เป โตเบ่ เมหน่าเมจา อู แอ? เป โตเบ่ เตเมแลเปล๊กา แกแย เตเพรเพร อาซิปล่อ เซอเพร แฮ? หม่าโต่หม่า เป โตเบ่ เมปย๊าเมหลู่แก อู แอ?” 10อา แม๊ ตีรี๊ตาวา โทลอ เหย่ซี เร๊อ อา เฮ๊ แกแย กู๊ขุเซอ โตโค๊ เออเตเพร เน๊อ, “บ๊อเถ่ เน กู๊ขุเนอ,” เร๊อ อา ครวาเม เกอฮู๊ เหย่ซู่ เฮ๊ ลู เนอ, เร๊อ อากู๊ขุ แร๊กาคยา ปลื๊อลอ คยาแซ๊. 11หม่าแน๊เรอ เพรอิซว๊า เตซว๊าเตแส่ อาซ๊าร๊า เต๊เห่ เร๊อ ฟาริสี เต๊เห่ ซิปล่อดุ แหน่เจ๊อ แบ่เจ่ เร๊อ เหย่ซี โตเบ่ เม แบ่เจ่เหย่ซู่ ฮู๊เตเนอ, เหย่ซี จว๊า โอ่กู๊ เฮ๊เบ่ เกอเร๊อ ลู.
Copyright information for
EkySCThai