Mar 10:35-45 | EkySCThai | STEP | เพเศเบดี อาพู๊ คูยากอบ เร๊อ คูยอห์น แฮผื่อ เด๊อ เหย่ซู่ อา โอ่ เร๊อ อา เฮ๊ ลู เน๊อ, “ซ๊าร๋า เป กุย เน อิเตเต๊ เบ่เบ่, เป ซิหยื่อ เด๊อ เน เก่ เม เป่ เป.”

Mark 10:35-45

คูยากอบ เร๊อ คูยอห์น อา เตกุยซิยอ

(มัทธิว ๒๐:๒๐-๒๘)

35 เพเศเบดี อาพู๊ คูยากอบ เร๊อ คูยอห์น แฮผื่อ เด๊อ เหย่ซู่ อา โอ่ เร๊อ อา เฮ๊ ลู เน๊อ, “ซ๊าร๋า เป กุย เน อิเตเต๊ เบ่เบ่, เป ซิหยื่อ เด๊อ เน เก่ เม เป่ เป.”

36 เหย่ซู่ เฮ๊ฉื่อ เหย่ซี เน๊อ, “ซี ซิหยื่อ นอเม แว อิเตเต๊?”

37 เร๊อ เหย่ซี เฮ๊ฉื่อ ลู เน๊อ, “เบ๊อะเน แถ่ โอ่แนเฮ๊อ เด๊อ เนเทอเนเก่ เร๊อ เน โอ่เฮ๊อ เด๊อ เนเตอเรอดุทู อากู เฮ๊อ ปาเนอ, เด๊อะโอ่แน เป่เกอ เป เด๊อ เน กู๊ขุ จ๊อทว๊า ตากยา เตเพร, เร๊อ เด๊อ เน กู๊ขุ จ๊อจิ ตากยา เตเพร ปา นี๋.”

38 เร๊อ เหย่ซู่ เฮ๊ฉื่อ เหย่ซี เน๊อ, “ซี กุย เตเออเนอ ซี ซิเง เกอเร๊อ อาหรี่อาแก คยา โต่. เตจาเตจือ อาเทอเบ เด๊อ แว เตเร โอ เออเนอ ซี โอ่ เบ๊เกอแหน่ ช๊าเหล่ ปาแอ? โทเรอ เหล่จาเหล่จือ เด๊อ แว เตเร ข่าจา เออ ปา เนอหมา ซี ข่าเบ๊ ช๊าเหล่ ปา แอ?” ^a

39 เร๊อ เหย่ซี เฮ๊ฉื่อ ลู เน๊อ, “เป จ่าเพรอเบ๊ แพ๊.”

เร๊อ เหย่ซู่ เฮ๊ฉื่อ เหย่ซี เน๊อ, “เทอเบ เด๊อ แว เตเร โอ เออเนอ ซี เก่ โอน๊อเกอ ปา, โทเรอ เตจาเตจือ เด๊อ แว เตเร ข่าเบ่ เออเนอ ซี เก่ ข่าเบ่น๊อ เกอดื่อ ปา. 40 หม่าแน๊เรอ อาเหล่โอ่แน โอ่ เด๊อ จ๊อจิ ตากยา เนอ เบ่เบ่, เด๊อ จ๊อทว๊า ตากยา เนอ เบ่เบ่, อา โอ่ เด๊อ แว กู๊ยากู หม่าโต่, จอแปแหร่ เก่ เด๊อะโอ่แน เหล่โอ่ เออเนอ เร๊อ แกแย เด๊อ อา ตี๊หรี่แตแร หนื่ออื่อ เป่โทเฮ๊อ ลู เนอเต๊เห่ อาเง ปา.”

41 เบ๊อะ อา โคเจ่ เด๊อ อา โอ่แก เพรเช๊อ เออเต๊เห่ หนิโฮ อา แด๊เฮอ ฮู๊เออเนอ เบ๊อะเนอ, เหย่ซี ซิปล่อดุ คูยากอบ เร๊อ คูยอห์น, 42 ฮู๊เนอเรอ เหย่ซู่ เอ๊แฮ ปล๊อลอ เหย่ซี เด๊อ อา โอ่ เร๊อ อา เฮ๊ เหย่ซี เน๊อ, “ซี ซิเง ดื่อเฮ๊อ เร๊อ แกแยยิวพู๊ หม่าโต่ เต๊เห่เนอ อา โอ่ เร๊อ อา ทวาดุทวาเต เด๊อ อา เป๊อ เกอเร๊อ เหย่ซี เต๊เห่, โทเรอ เทอเก่พู๊ ทวาดุทวาเต เออเนอเต๊เห่ อา นอเอ่ เกอเร๊อ แลแค อา เตอเรอฉว่าชอ เออเนอ เด๊อ เทอพู๊เก่พู๊ เต๊เห่ อาขุ. ^b 43 หม่าแน๊เรอ ล๋อ ซี เออเนอเต๊เห่เนอ ซี โตเบ่ เมฮู๊เนอ โต่. เด๊อ ซีเกลเนอ, แกแย เตเพรเพร อา ซิหยื่อ ทวาดุ เฮ๊เรอ อา โตเบ่ ทวา ซี หลู่เล๊. ^c 44 เด๊อ ซีเกลเนอ, แกแย เตเพรเพร อา ซิหยื่อ ทวา แกแย เด๊อ อู โหล่ดุเล๊อ ลู เก่เฮ๊เรอ อา โตเบ่ ทวา แกแย ล๋อ ปลี หลู่. 45 เมเตเฮ๊เรอ แกแยพู๊คู หม่าเฮ๊อ แวเออ, แว แฮ เด๊อ อู เก่ เม เป่ แวเง เนอ หม่าโต่. แว แฮ เด๊อ แว เก่ เม เป อูเง แพ๊. เร๊อ แซ่ฮู๊ แว เก่ เอ๊ถ่ากาหนิ เหย่ซี อาเงเนอเรอ, แว เด๊อะแลแก แว ซิปล่อ เซอเพร เด๊อ แกแย โอ่โร๊ลู อาเง.”