Mark 12:13-17
อู แด๊เฮอ เหย่ซู่ เร๊อ โตเบ่ เด๊อ อาหมู่อาร๊า แอ? หม่า โตเบ่ เด๊อ โต่ แอ? อาหรี่อาแก คยา
(มัทธิว ๒๒:๑๕-๒๒, ลูกา ๒๐:๒๐-๒๖)
13อู นอแฮ ฟาริสี เต๊เห่ เด๊อ คุ๊ยเฮโรด อาแกแย เต๊เห่ เด๊อ เหย่ซู่ อา โอ่ เด๊อ อา เก่ จว๊า แม๊ปู ปื่อ แลแค เหย่ซู่ เฮ๊เบ่ซื๊อโหง่ เต๊เห่. 14เหย่ซี จว๊า เด๊อ เหย่ซู่ อา โอ่ เร๊อ อา เฮ๊ แลแค ลู เน๊อ, “ซ๊าร๊าดู๋ เป ซิเง เร๊อ เน หม่า แกแยจ๊อแกแยเตเร๊อ อา เฮ๊เบ่จ๊อแพ๊ โหง่ เตเพร. เน ซิอิเช เกออูเหล่ เตเพร่ว โต่, เน แม๊ดุแม๊ปีตี๊ เกออู เตเพร่ว โต่โต่. เน เก่ อิซว๊าอี๊แส่เฮ๊อ อู เตหมะเตจ๊อ เฮ๊เนอหม่า, เน อิซว๊า เป เจ๊อ อู ฮู๊ จอแปแหร่ ซิหยื่อ นออิซว๊า เน เนอ เจ๊อ. ฮู๊เนอเรอ เป เด๊อ อาหมู่อาร๊า เด๊อ คุ๊ยซีซาร์ อา โอ่ เนอหมา อาโต แอ? หม่า อาซื๊อ แอ? 15เป โตเบ่ เด๊อ อา แอ? หม่า เป โตเบ่ เด๊อ โต่ แอ? แด๊โฉ่ เป่แม๊ เป.” หม่าแน๊เรอ เหย่ซี จว๊า เฮ๊เบ่ โข่บย่า แพ๊ เนอ เหย่ซู่ ซิเง เร๊อ อา เฮ๊ฉื่อ เหย่ซี เน๊อ, “แซ่ฮู๊ ซี เก่ แม๊ปู ปื่อหนิ แว เหล่เฮ๊เบ่ซื๊อ เต๊เห่ เร๊อ ซี จว๊า แด๊เฮอค๊า แด๊เฮอโข่ แม๊บย่า แว ฮู๊เต? แฮเด๊อ เป แม๊ แว ซีรือหย่า เนอเต๊เบ่,” อา เฮ๊ เหย่ซี ฮู๊เนอ. 16เร๊อ เหย่ซี แฮเด๊อ ลู รือหย่า เดนาริอัน เนอเต๊เบ่ เร๊อ อา แด๊เฮอ เหย่ซี เน๊อ, “เออ หม่า อูเป กู่กล๊อแหย่โย เป? อา ราโอ่ เร๊อ อูเป อามุยเป?” เร๊อ เหย่ซี เฮ๊ฉื่อ ลู เน๊อ, “คุ๊ย อา กู่กล๊อแหย่โย เร๊อ คุ๊ย อามุย.” 17โทเรอ เหย่ซู่ เฮ๊ เหย่ซี เน๊อ, “คุ๊ยดุ ซีซาร์ อาเตเก่เฮ๊เรอ เด๊อ เร๊อ คุ๊ยดุเนอ, จอแปแหร่ อาเต่ เก่เฮ๊เรอ เด๊อ เร๊อ จอแปแหร่ เนอ.” เหย่ซู่ เฮ๊ เหย่ซี ฮู๊เนอ เร๊อ เหย่ซี อาคย๊าอายื๊อ ลอปลี เจ๊อ เหย่ซู่ อาเหล่ เจ๊อ.
Copyright information for
EkySCThai