Mar 12:15-27 | EkySCThai | STEP | เป โตเบ่ เด๊อ อา แอ? หม่า เป โตเบ่ เด๊อ โต่ แอ? แด๊โฉ่ เป่แม๊ เป.” หม่าแน๊เรอ เหย่ซี จว๊า เฮ๊เบ่ โข่บย่า แพ๊ เนอ เหย่ซู่ ซิเง เร๊อ อา เฮ๊ฉื่อ เหย่ซี เน๊อ, “แซ่ฮู๊ ซี เก่ แม๊ปู ปื่อหนิ แว เหล่เฮ๊เบ่ซื๊อ เต๊เห่ เร๊อ ซี จว๊า แด๊เฮอค๊า แด๊เฮอโข่ แม๊บย่า แว ฮู๊เต? แฮเด๊อ เป แม๊ แว ซีรือหย่า เนอเต๊เบ่,” อา เฮ๊ เหย่ซี ฮู๊เนอ.

Mark 12:15-27

15 เป โตเบ่ เด๊อ อา แอ? หม่า เป โตเบ่ เด๊อ โต่ แอ? แด๊โฉ่ เป่แม๊ เป.”

หม่าแน๊เรอ เหย่ซี จว๊า เฮ๊เบ่ โข่บย่า แพ๊ เนอ เหย่ซู่ ซิเง เร๊อ อา เฮ๊ฉื่อ เหย่ซี เน๊อ, “แซ่ฮู๊ ซี เก่ แม๊ปู ปื่อหนิ แว เหล่เฮ๊เบ่ซื๊อ เต๊เห่ เร๊อ ซี จว๊า แด๊เฮอค๊า แด๊เฮอโข่ แม๊บย่า แว ฮู๊เต? แฮเด๊อ เป แม๊ แว ซีรือหย่า เนอเต๊เบ่,” อา เฮ๊ เหย่ซี ฮู๊เนอ.

16 เร๊อ เหย่ซี แฮเด๊อ ลู รือหย่า เดนาริอัน เนอเต๊เบ่ เร๊อ อา แด๊เฮอ เหย่ซี เน๊อ, “เออ หม่า อูเป กู่กล๊อแหย่โย เป? อา ราโอ่ เร๊อ อูเป อามุยเป?”

เร๊อ เหย่ซี เฮ๊ฉื่อ ลู เน๊อ, “คุ๊ย อา กู่กล๊อแหย่โย เร๊อ คุ๊ย อามุย.”

17 โทเรอ เหย่ซู่ เฮ๊ เหย่ซี เน๊อ, “คุ๊ยดุ ซีซาร์ อาเตเก่เฮ๊เรอ เด๊อ เร๊อ คุ๊ยดุเนอ, จอแปแหร่ อาเต่ เก่เฮ๊เรอ เด๊อ เร๊อ จอแปแหร่ เนอ.” เหย่ซู่ เฮ๊ เหย่ซี ฮู๊เนอ เร๊อ เหย่ซี อาคย๊าอายื๊อ ลอปลี เจ๊อ เหย่ซู่ อาเหล่ เจ๊อ.

อู แด๊เฮอ เหย่ซู่ เร๊อ เตเซอ ก๊อถ่อเซอเพร กาคยา

(มัทธิว ๒๒:๒๓-๓๓, ลูกา ๒๐:๒๗-๔๐)

18 สะดูสี เนอเต๊เห่ เหล่โกล เฮ๊ แลแค เร๊อ อู เซอโท เนอ อู เซอเพร กาคยา แจ่ ปา แตแค๋ โต่ ฮู๊เนอ. เร๊อ เหย่ซี จว๊า เด๊อ เหย่ซู่ อา โอ่ เร๊อ แด๊เฮอ ลู เนอ, ^a

19 “ซ๊าร๊าดู๋, คูโมเสส ราแก เตซว๊าเตแส่ ตือมือ เด๊อ เปเง เร๊อ อา เฮ๊ เนอ, แกแย เตเพรเพร เก่ เซอแก อาเม เบ๊อะเนอ, เร๊อ อาพู๊ เก่ โอ่แก เตเพร่ว โต่ เฮ๊เนอ, แซ่ฮู๊ อากลุยอาแล เก่ โอ่แกเกอ เนอเรอ, อา โป่เพรคู เบ่ พย๊าดว้า อาคี โอ่แกเออ, อา เฮ๊ ฮู๊เนอ. ^b

20 โตโพ๊เนอ โป่ เร๊อ แหม่ เพรคู โอ่ โซซว๊าเตเพร, อา แหว่เพร่วเล๊อ เตเพร พย๊า อาเม เร๊อ เบ๊อะอา เซอเบ๊อะเนอ อาพู๊ โอ่แก เตเพร่ว โต่.

21 เร๊อ อาโป่ อาฮ๊อเลแล เตเพร พย๊าดว้า คยาแซ๊ อาคีเออ เร๊อ อา เซอแกโป่ เร๊อ อาพู๊อาเลอ โอ่แก เตเพร่ว โต่. อาโป่ แกแลซิโซเนอเตเพร เนอ อา ทวาแถ่ แซ่ เกอลู ฮู๊เนอ.

22 โป่เร๊อแหม่ โซซว๊าเตเพร เออเนอ, อา ทวาแถ่ แซ่ ลอปลี ลู ฮู๊เนอ, เร๊อ เหย่ซี เออ โซซว๊าเตเพร พย๊าจือ ลอปลี ลู อาเม เตเพรเพร่ว แพ๊ เร๊อ อา เซอแก ลอปลี, อาพู๊โอ่แก แลแค เตเพร๊ โต่ เร๊อ เด๊อคยาเล๊อเร๊อ เพร เหมาะ เออเตเพร เซอแก เกอ โป่.

23 ฮู๊เนอเรอ ช๋า อู อาเซอ กาคยาแซ๊ อาม๊อเนอ ปา เตอ เนอเนอ, เพร เหมาะ เออเตเพร เก่ ทวา เบ๊อะเตเพร อาเม ปาเป? เมเตเฮ๊เรอ เหย่ซี โป่เร๊อแหม่ โซซว๊าเตเพร พย๊าจือลอ ลู เพรเหมาะ เออเตเพร แพ๊ เน๋อ.”

24 เหย่ซู่ เฮ๊ฉื่อ เหย่ซี เน๊อ, “ซี หยื่อเอ่ซื๊อ ลอเฮ๊อ. ซี ซิเง ตาเต เกออู ลีเทส่อพ๊า เตเฮ๊ โต่. โท๊โต่ซี ซิเง ตาเต เกออู จอแปแหร่ อา โพรอาฉว่าอาชอ เมแจ่ อู เต เต๊เห่ โต่.

25 เมเตเฮ๊เรอ ช๋า อู เซอ ก๊อถ่อกาคยา ปาเนอ อู พย๊าพู๊พย๊าเม, อู พย๊าพู๊พย๊าเว โอ่ ปาโต่เฮ๊อ, เหย่ซี เก่ แซ่ลอเกอ ฮู๊ ม๊อขุเตเน่วพู๊ เนอเต๊เห่ ปาเฮ๊อ.

26 คูโมเสส ราม๊าแก เตเซอเพร กาคยา อาหรี่อาแก คยา เด๊อ อา ลีอู๊กู เบ๊อะหมิอือ แจ๊โจ่ เตแด๊แก เนอโต๊โต่ อากูเนอ, แว เตเน เร๊อ ซี แด๊น๊อ เฮ๊อ. เบ๊อะลีกูเนอ, จอแปแหร่ เฮ๊ คูโมเสส ฮู๊เต เฮ๊เรอ, ‘แว หม่า เพอับราฮัม อา จอแปแหร่, เพอิสอัด อา จอแปแหร่, เร๊อ เพยาโคบ อา จอแปแหร่,’ ^c คูโมเสส ราแก ฮู๊เนอ.

27 จอแปแหร่ หม่า แกแยเซอ เต๊เห่ อา จอแปแหร่ หม่าโต่, แกแย เซอเพร เต๊เห่ อา จอแปแหร่. ซี หยื่อเอ่ซื๊อลอหล่าตี๊กลิ เจ๊อ,” อา เฮ๊ สะดูสี เนอเต๊เห่ ฮู๊เนอ.