Mar 5:21-43 | EkySCThai | STEP | เบ๊อะเหย่ซู่ กาคยา คยาแซ๊ เด๊อ เทออ่อดุ เบ๊เร ตา กยา เร๊อ ส่อเกลอ เบ๊อะเนอ, แกแย ตู๊หมู่ดุ จว๊า โอ่ปล๊อโอ่ปลู่ โอ่โร๊ลู แหน่เจ๊อ เด๊อ เทออ่อดุ ทือ เนอ.

Mark 5:21-43

เหย่ซู่ เมโอ่เหม่ เพรเหมาะ เด๊อ อา เตชุ๊ยโอ่ เตเพร เร๊อ เป๊เจ่โหมะ อาเซอ เตเพร

(มัทธิว ๙:๑๘-๒๖, ลูกา ๘:๔๐-๕๖)

21 เบ๊อะเหย่ซู่ กาคยา คยาแซ๊ เด๊อ เทออ่อดุ เบ๊เร ตา กยา เร๊อ ส่อเกลอ เบ๊อะเนอ, แกแย ตู๊หมู่ดุ จว๊า โอ่ปล๊อโอ่ปลู่ โอ่โร๊ลู แหน่เจ๊อ เด๊อ เทออ่อดุ ทือ เนอ. 22 เร๊อ เตจ๊อเบโฮกู กู่กล๊อดุ เตเพร, อามุย เร๊อ คูไยรัส แฮแม๊เถอะ เหย่ซู่ เร๊อ อา แด๊งือแล เด๊อ ลูกู๊โด่ ช๊า. 23 เร๊อ อา กุยซิยอ ลู เน๊อ, “แว พู๊เพรเหมาะ เตเพร เตเร เซอเฮ๊อ. เร๊อ แซ่ฮู๊ อาเตชุ๊ย เก่ อาโอ่เหม่แก เร๊อ อา เก่ เซอเพร เนอ, จว๊า แด๊แถ่ เป่เหร่อ แว เน กู๊ขุ เด๊อ อาโอ่.” 24 เร๊อ เหย่ซู่ ครวากา เกอลู.

แกแย โอ่โหร่โอ่เอ๊ ดุ๊ยแฮยาแฮ จว๊า ลอ เกอ เหย่ซู่. 25 เบ๊อะเนอ อาเกล เพรเหมาะ เด๊อ อา ข่าเบ่ เตชุ๊ยเตเช สุ่ยตา เด๊อ อางยา เจ๊อเฮ๊อ เช๊อเนอหน่า เนอ อา โอ่ เตเพร. 26 เตขุ ซ๊าร๊า แม๊ตู่ เร๊อลู โร๊ลู เฮ๊อ อา หย่าเข่ โต่. อา แหย่ เกอเร๊อ อาเหน่ เร๊อ อารืออาเท ลอเฮ๊อ หม่าแน๊เรอ อา หย่าเข่โต่โต่. อาเตชุ๊ย เออเนอ แตแกล๊ อา เมหน่า เม ฉว่าแฮ แพ๊. 27 อา หนิโฮ เหย่ซู่ อาคยา เร๊อ อา ดุ๊ยแฮโน เด๊อ แกแย โอ่โหร่โอ่เอ๊เกล เร๊อ อา จว๊าโต่ เด๊อ เหย่ซู่ เป๊คยา เร๊อ อา แฮโต่เบ่ ลู จาแก. 28 อา เฮ๊เร๊อ อาเหน่ เน๊อ, “แว เก่ โต่เบ่ แพ๊เบ๊อะอาจาแก เออเนอแพ๊ หม่า แว เตเชสุ่ยตา อา เกล๊ โอ่เหม่แหน่ เฮ๊อ,” อา เฮ๊ เร๊อ, 29 โตโพ๊โต อาสุ่ยแฮ โอ่โก๊ เร๊อ อา ซิเง เกอเร๊อ อาเหน่ เนอ อาเตเช เออเนอ อา โอ่เหม่ แกเฮ๊อ.

30 เออเตอโพ๊เรอ เหย่ซู่ ซิเง เกอเร๊อ อาเหน่ เร๊อ อา เตเตอเรอ เถ่จว๊าแก เด๊อ อาเหน่ลู. อา ตีรี๊โทตีรี๊แล อาเหน่ เด๊อ แกแย โอ่โหร่โอ่เอ๊เกล เนอ, อา แด๊เฮอ อู เน๊อ, “หม่าอูเป โต่เบ่ แว จาแก เป?”

31 เร๊อ อา โคเจ่ เฮ๊ฉื่อ ลู เน๊อ, “เน แม๊เถอะดื่อเฮ๊อ เร๊อ แกแย โอ่ ตาวาปลูตาวาเผ่ ดุ๊ยแฮยาแฮ ลอ เน เร๊อหม่าเมเตเรอ เน จว๊า แด๊เฮอ โต่ เน๊อ, ‘หม่าอูเป โต่เบ่ แว จาแก เป ฮู๊เต?’”

32 แซ่ฮู๊ อา เก่ แม๊เถอะ แกแย เด๊อ อา แฮโน โต่เบ่ ลู เนอเตเพร เร๊อ อา แม๊กาแม๊แฮ ตื๊อดื่อ. 33 เร๊อ เพรเหมาะ เออเนอเตเพรเนอ เบ๊อะอา แฮโต่เบ่ ลู จาแก เบ๊อะเนอ, เตทวาแถ่อาเหน่ เร๊อ อา ฮู๊เตเนอ อา ซิเงลอ เกอเร๊อเร๊อ อาเหน่ อาขว่าอาคยา, อาชี๊เช แตแนแตกยา เจ๊อ. เร๊อ อา แฮแด๊งือแล เด๊อ เหย่ซู่ เป๊เส่เง เร๊อ อา แด๊โฉ่โล ลอ เป่ เจ๊อ เหย่ซู่. 34 เร๊อ เหย่ซู่ เฮ๊ ลู เน๊อ, “พู๊หม๋อ, เน เตหยื่อ เออเนอ, อา แหย่โอ่เหม่แกเฮ๊อ เน เตเชเฮ๊อ, กาโมโม กาแร๊แร๊ ดื่อ นี๋, เน เตเช เออ อา โอ่เหม่ ลาแหน่ ดื่อเฮ๊อ.”

35 เบ๊อะเหย่ซู่ เฮ๊เบ่ปาแพ๊ อาเบ๊อะเนอ, แกแย เต๊เห่ โอ่ เด๊อ เพไยรัส เด๊อ อา ทวา เตจ๊อเบโฮกู กู่กล๊อ เออเตเพร อาหี่ เร๊อ เหย่ซีแฮ, เร๊อ อา แฮแด๊โฉ่ เป่ เพไยรัส เน๊อ, “เนพู๊เหมาะ เซอเฮ๊อ เร๊อ ซี จว๊าเมดู๊แด ตื๊อดื่อ ปา ซ๊าร๊า เมเต?”

36 หม่าแน๊เรอ เหย่ซู่ หนิดา เหย่ซี อาเตเฮ๊เบ่ โต่ อา เฮ๊ เตจ๊อเบโฮกู กู่กล๊อดุ เนอเตเพร เน๊อ, “เบ่ยอ แต่เหม่, ตูรู๊ หยื่อเอ่ แวเนอ นี๋.”

37 โทเรอ อา เอ๊ครวาหนิ แพ๊ตื๊อ คูเปโตร, คูยากอบ เร๊อ อาโป่ คูยอห์น แพ๊ อา เอ๊หนิ แกแย เด๊อ อาโร เตเพร่ว โต่. 38 เหย่ซี จว๊าโต่ เด๊อ เตจ๊อเบโฮกู กู่กล๊อดุ เนอเตเพร อาหี่ เร๊อ อา แม๊เถอะ อู เม พรารื๊อ พราเต๊ เต๊เห่, อูโหง่อูเห่ เต๊เห่. 39 เบ๊อะอา โน เด๊อ หี่ด๊อกู โตโพ๊, อา เฮ๊ เหย่ซี เน๊อ, “ซีโหง่ซีเห่ เมตอปลอแลยอ เมเต? เป๊เจ่โหมะ เออเตเพรหม่า อา อาเซอ หม่าโต่ อา โอ่เมอหนิ ตาปา แพ๊.” 40 เร๊อ เหย่ซี งยาโคร ลอปลี เหย่ซู่.

โทเรอ เหย่ซู่ เหว่เถ่แก ล๋อ แกแย เนอเต๊เห่ เด๊อ อากลอ. เร๊อ อา เอ๊หนิ เป๊เจ่โหมะ เออเตเพร อาโหมะอาเพ เร๊อ อา โคเจ่ ซิโซ เร๊อ อา กาโน เด๊อ เป๊เจ่โหมะ เนอเตเพร อา โอ่. 41 เร๊อ อา ปื่อ เป๊เจ่โหมะ เนอเตเพร อากู๊ขุ เร๊อ อา เฮ๊ ลู เน๊อ, “ทาลิธา คูมิ,” (อาโหง่แลช๊า หม่า, “เก๋อ เป๊เจ่โหมฮู๋, แว เฮ๊ เน๋, ก๊อถ่อมอ.”) 42 เร๊อ โตโพ๊โต เป๊เจ่โหมะ เช๊อเนอหน่า เออเตเพร อาก๊อถ่อจว๊า เร๊อ เหย่ซี อาคย๊าอายื๊อ แหน่เจ๊อ แลแค. 43 เร๊อ เหย่ซู่ เฮ๊แก ตาเต เหย่ซี โหง่ เนอ, โตเบ่ แด๊โฉ่โลหนิ เป่ อู เตเพร่ว โต่. โทเรอ อา เฮ๊ เหย่ซี เน๊อ, “เด๊อะเอ่ เป่ เป๊เจ่โหมะ เนอเตเพร เหล่เอ่เหล่โอ เต๊อเจ่อเจ่อ นี๋.”