Mark 7:1-13
เหย่ซู่ อิซว๊า อู เร๊อ อาโพ๊อาแปละ อา คยา เร๊อ อาโพ๊อาแปละ โต่ อา คยา
(มัทธิว ๑๕:๑-๙)
1เบ๊อะเนอ โตโพ๊ เพร อิซว๊า เตซว๊าเตแส่ อาซ๊าร๊า เร๊อ ฟาริสี เด๊อ อา โอ่ แลแค เด๊อ วีเยรูซาเล็ม อากู แฮ เต๊เห่เนอ, อา แฮ โอ่ปล๊อโอ่ปลู ตาวา ลอปลี เด๊อ เหย่ซู่ อาช๊า. 2เหย่ซี แม๊เถอะ แบ่เจ่ เหย่ซู่ โคเจ่ เต๊เห่ อาเอ่อาโอ เร๊อ อา ซู๊ปลี เกออู อากู๊ขุ โต่. อาโหง่แลช๊า หม่า เหย่ซี ซิหยื่อ เฮ๊ เร๊อ ฮู๊ เตจ๊อบู่จ๊อเบ อาเหล่โกล โอ่ เร๊อ เบ๊อะอาเอ่ แต่ลาเฉ่ โต่ เนอ โตเบ่ ซู๊ปลี เหร่อ กู๊ขุ. หม่าแน๊เรอ อา โคเจ่ เต๊เห่ เมเกอ ฮู๊เนอ โต่. 3(เมเตเฮ๊เนอเรอ ฟาริสี เต๊เห่ เร๊อ ล๋อ แกแยยิวพู๊ เต๊เห่เนอ อา เก่ ซู๊ปลี แลแค อากู๊ขุ โต่เด๊อ กู๊ขุจู๊แก ตื๊อเรอ เหย่ซี พย๊าเอ่ดี หนิ แพ๊. เหย่ซี ปื่อหม่า เมจว๊าโตโคร แลแค เหย่ซี เพอโพ เหล่โกล กู๊เหล่ เต๊เห่. 4เหย่ซี เก่ โอ่ เด๊อ เกล๊เบ่ กา เฮ๊เรอ อา เก่ ซู๊ปลีซู๊เปล่แก อากู๊ขุ โต่ เฮ๊เนอ, เหย่ซี เอ่โอ เตอเจ๋อ โต่. โท๊โต่ เหย่ซี พย๊าดว้าหนิ ตื้อดื่อปา เหล่โกล เด๊อ อาโร เต๊เห่เนอ อา โอ่ เอ๊ลู ปา. หม่าแคร๋ อิเต เฮ๊เรอ, เหย่ซี ซู๊ปลี แร๊ เบเหล่โอ เต๊เห่, ดีอิซุ๊ยปอ เต๊เห่, เร๊อ เบตีลี เต๊เห่.) 5โทเรอ ฟาริสี เต๊เห่ เร๊อ เพรอิซว๊า เตซว๊าเตแส่ อาซ๊าร๊า เต๊เห่ แด๊เฮอ เหย่ซู่ โอ่ เน๊อ, “เน โคเจ่ เต๊เห่ เร๊อ อา ครวาเม เกอ ฮู๊ เพอโพ เหล่โกล กู๊เหล่ อิซว๊าแก อู เนอ โต่ ว๊า? เบ๊อะเหย่ซี เอ่เฉ่โอเทอ เบ๊อะเนอ, อา ซู๊ปลีแก เกอ แลแค อากู๊ขุ โต่ เมเต?” 6เหย่ซู่ เฮ๊ฉื่อ เหย่ซี เน๊อ, “เพรโพร อิสยาห์ เฮ๊หนื่ออื่อซี อาหรี่แกคยาเนอหม่า อา โตตื๊อ เจ๊อ. ซี หม่า เพร จ่าจ๊อจ่าเต อาเหน่ เต๊เห่. เพรโพร อิสยาห์ ราแก เด๊อ หนู่เค เร๊อ อา เฮ๊ เนอ, จอแปแหร่ เฮ๊ เนอ, a‘แกแย เออเต๊เห่ เบ่หยื่อเบ่แหน่ แลแค แว เร๊อ อากู๊อู่ หม่าแน๊เรอ อาซิปล่อ เนอหม่า อา โอ่ตาพา ยา เร๊อ แว แพ๊. 7เหย่ซี จ๊อเบแถ่ แว เออเนอ อาโหง่แลช๊า โอ่ เตอเจ๋อ โต่. เหย่ซี อิซว๊าอี๊แส่ แพ๊ อู เร๊อ แกแย อาเหล่โกล กู๊เหล่ เต๊เห่ แพ๊. หม่าแน๊เรอ อา เฮ๊ เกอเร๊อ แลแค เร๊อ อา อิซว๊าอี๊แส่ เจ๊อ อู เร๊อ จอแปแหร่ อา เตซว๊าเตแส่ เต๊เห่แหน่เจ๊อ.’ b 8ซี แด่ตาพา โค๊แก จอแปแหร่ อา เตซว๊าเตแส่ เต๊เห่ เร๊อ ซี ปื่อหม่า เมจว๊าโตโคร เกอเร๊อ แลแค แกแย อา เพอโพ เหล่โกล กู๊เหล่ เต๊เห่.” 9โทเรอ เหย่ซู่ เฮ๊ เหย่ซี เน๊อ, “แซ่ฮู๊ ซี เก่ ปื่อหม่า เมจว๊าโตโคร เกอเร๊อ ซี เพอโพ เหล่โกล เตซว๊าเตแส่ เต๊เห่ อาเงเนอเรอ, ซี ลีแม เคร๊ฉื่อแก แจ่ แหน่เจ๊อ จอแปแหร่ โหง่เฮ๊แก เต๊เห่ว๊า! 10คูโมเสส เฮ๊ เน๊อ, ‘เบ่หยื่อเบ่แหน่ เปโหมะเปเพ นี๋.’ c เร๊อ ‘แกแย เด๊อ อา อี๊ชอ อาโหมะอาเพ เตเพรเพรเนอ เบ่ เมเซอแก อา.’ d 11หม่าแน๊เรอ ซี นอเฮ๊ อูโหมะอูเพ เน๊อ, ‘เก๋อ โหมะ, เก๋อ เพ, รือเท เด๊อ แว เก่โต แม๊ตู่ เมจว่า เร๊อ ซีเนอ อาโอ่ ว๊า, หม่าแน๊เรอ แว เก่ นอเอ่ อา เร๊อ โกระบาน,’ ▼
▼(โกระบาน อาโหง่แลช๊า หม่า เหล่หลู่ เด๊อ เป เด๊อ เร๊อ จอแปแหร่)
ซี นอเฮ๊ อา เร๊อ อูโหมะอูเพ ฮู๊เนอ. 12โทเรอ ซี นอเมจว่า แม๊ตู่หนิ ปา เหย่ซี เร๊อ อาโหมะอาเพ โต่. 13ฮู๊เนอ อาคยา ซี เมตูพู ปย๊า แกลอ เฮ๊อ จอแปแหร่ อาลาอาโหง่ เฮ๊แก เออเนอเต๊เห่ เฮ๊อ. เมเตเฮ๊เรอ ซี ปื่อหม่า ปื่อหม่า เมจว๊าโตโคร ซี เพอโพ เหล่โกล กู๊เหล่ เร๊อ ซี เด๊อ โดโต่ อู ซี เมแซ่ ฮู๊เออ เด๊อ อาโร เต๊เห่เนอ อา โอ่ เอ๊ ปา แหน่เจ๊อ.”
Copyright information for
EkySCThai