Matthew 13:10-17
โหง่ค๊าโข่ อาเซเร แม๊ชือ หนื่ออื่อ
(มาระโก ๔:๑๐-๑๒, ลูกา ๘:๙-๑๐)
10อา โคเจ่ เต๊เห่ แฮ เด๊อ ลูโอ่ เร๊อ แฮแด๊เฮอ ลู เน๊อ, “เบ๊อะเน เฮ๊เบ่ เนอ แกแย เนอเต๊เห่ เนอ เน จว๊า แด๊เป่ โต่ เหย่ซี เน๊อ เตโด่แน ค๊าโข่ เต๊เห่ เมเต?” 11แบ่เจ่ เหย่ซู่ เฮ๊ฉื่อ เหย่ซี เน๊อ, “จอแปแหร่ เด๊อะซิเงโปล เป่เฮ๊อ ซี เร๊อ ม๊อขุ เทอเลเก่กู อา เตซิคว๊าซิเง เด๊อ อา ด๊อโอ๊ด๊อบี๊ เต๊เห่ ตื๊อดื่อเรอ อา เด๊อะซิเง โต่ เป่เกอ เหย่ซี โต่. 12เมเตเฮ๊เรอ แกแย เด๊อ อา โอ่ เร๊อ เตซิคว๊าซิเง หม่าดื่อ ม๊อขุ เทอเลเก่กู อาหรี่อาแก เต๊เห่เนอ จอแปแหร่ เก่ เด๊อะ ซิเง เอ๊แถ่ เล๊อโป่ ลู ปา. แกแย เด๊อ อา โอ่ เกอ เน๊อ เตซิคว๊าซิเง หม่าดื่อ ม๊อขุ เทอเลเก่กู อาหรี่อาแก โต่ เต๊เห่เนอ, อา เก่ โอ่ แพ๊ ตี๊กิแพ๊ เบ่เบ่, จอแปแหร่ เก่ พย๊าแกลอเผ่ ลู ปา. a 13แว เฮ๊เบ่ เหย่ซี เร๊อ โหง่ค๊าโข่ เต๊เห่, เมเตเฮ๊เรอเหย่ซี แม๊ ตื๊อดื่อเรอ อา แม๊เถอะโต่. เหย่ซี หนิดา ตื๊อดื่อเรอ เหย่ซี หนิโฮ โต่. 14“เพรโพร อิสยาห์ เฮ๊หนื่ออื่อ โหง่เนอ อา เล๊อ บาแถ่ เน๊อ เหย่ซี เออเนอ เฮ๊อ. เร๊อ อา เฮ๊ หนื่ออื่อ เน๊อ,
‘ซี หนิโฮโท หนิโฮ แซ๊แซ๊ เจ๊อ ตื๊อดื่อเรอ ซี ซิเงโปล เป่ อา โหง่ แลช๊า ตือมื๋อ โต่, ซี แม๊เถอะโท แม๊เถอะ แซ๊แซ๊ เจ๊อ ตื๊อดื่อเรอ ซี แม๊เถอะโปล อา โหง่ แลช๊า ตือมื๋อ โต่ปา. b 15เมเตเฮ๊เรอ แกแย เออเต๊เห่ หม่า อา กู่กล๊อเพรอ, เหย่ซี กู๊หลิโก่ โอ่ ตื๊อดื่อเรอ อา หนิโฮ โปลโต่, เหย่ซี บ่อครีบี๊ อา เป๊เส่ เร๊อ อาแม๊ เถ่อโต่. เหย่ซี เก่ เมฮู๊เนอโต่เฮ๊เรอ เหย่ซี อาแม๊เถอะ เกอ เร๊อ ดื่อปา, อาเก่ หนิโฮ โปลแวเฮ๊เออเนอปา, อาซิปล่อ เตเนโปล ซิเงแร๊ ดื่อปา, อา เก่ ถู่แหล่แต๊แกละ อาซิปล่อ ปา, เร๊อ แว เก่ แหย่โอ่เหม่ เหย่ซี ปา.’ c 16หม่าแน๊เรอ ซี เออเต๊เห่เนอ, ซีเป๊เส่ แม๊เถอะ, ซีกู๊หลิโก่ หนิโฮ อาขว่าอาคยา, ซี เก่ พย๊าหนิ เตเด๊อะบุ๊ยเด๊อะเตอเรอ. d 17เมเตเฮ๊เรอ, แว เฮ๊จ๊อจ๊อ ซี, เพรโพร โอ่โหร่เอ๊ เน๊อ แกแยจ๊อแกแยเต โอ่โหร่เอ๊ ซีเต๊เห่ เหย่ซี ซิหยื่อ แม๊เถอะเกอ แลแค เต เด๊อ ซี แม๊เถอะ ตื๊อดื่อเรอ เหย่ซี แม๊เถอะน๊อ เกออู โต่. โท๊โต่ เหย่ซี ซิหยื่อ หนิโฮเกอ แลแค เต เด๊อ ซี หนิโฮ ตื๊อดื่อเรอ เหย่ซี หนิโฮน๊อ เกออู โต่.
Copyright information for
EkySCThai