Mat 17:1-13 | EkySCThai | STEP | ม๊อเนอ โซซว๊า บาโทเนอ แบ่เจ่ เหย่ซู่ เอ๊หนิ คูเปโตร, คูยากอบ เร๊อ คูยอห์น หม่าเฮ๊อ คูยากอบ อาโป่เออ เร๊อ เหย่ซี จว๊าแถ่ เด๊อ โฉ่แถ่โล เตเม อาลู. เร๊อ อา ซิ หยื่อ จว๊าโอ่ตื้อดื่อ เกอเร๊อ เหย่ซี แพ๊.

Matthew 17:1-13

แบ่เจ่ เหย่ซู่ เฮ๊เบ่ เร๊อ คูโมเสส เร๊อ เพรโพร เอลียาห์

(มาระโก ๙:๒-๑๓, ลูกา ๙:๒๘-๓๖)

1 ม๊อเนอ โซซว๊า บาโทเนอ แบ่เจ่ เหย่ซู่ เอ๊หนิ คูเปโตร, คูยากอบ เร๊อ คูยอห์น หม่าเฮ๊อ คูยากอบ อาโป่เออ เร๊อ เหย่ซี จว๊าแถ่ เด๊อ โฉ่แถ่โล เตเม อาลู. เร๊อ อา ซิ หยื่อ จว๊าโอ่ตื้อดื่อ เกอเร๊อ เหย่ซี แพ๊. 2 เบ๊อะเหย่ซี โอ่ เบ๊อะเนออาเค แบ่เจ่ เหย่ซู่ อาเหน่กล่อ ถู่แหล่ แต๊แกละ โค๊ลอ เด๊อ เหย่ซี อาแบ๊เง. อาเป๊เส่ เต๊เบ่ เนอ อา เตเค แซ่เจ๊อเน๊อ ต๊อเหมาะเนอ, อาเห่อจา เนอ อา บูโซ แปล๊เตเค เจ๊อ. 3 เตอเปลอฮู๊ อากูเนอ, เหย่ซี แม๊เถอะ คูโมเสส เร๊อ เพรโพร เอลียาห์ แฮโอ่โลแถ่ เร๊อ เหย่ซี เฮ๊เบ่ แลแค เร๊อ แบ่เจ่ เหย่ซู่.

4 คูเปโตร เฮ๊ เหย่ซู่ เน๊อ, “แบ่เจ๋, เหล่โอ่ เบ๊อะเออ โต๊โผ่ เร๊อ อาตว่า โมแร๊ ลา. เน เก่ ซิปล่อโอ่ เฮ๊เรอ แว เก่ ช๊อแถ่เป่ ซี เหล่สื่อ โซเม, เตเมเรอ เนเง, เตเมเรอ คูโมเสส อาเง, เตเมเรอ เพรโพร เอลียาห์ อาเง.”

5 เบ๊อะอา เฮ๊เบ่ ปาแพ๊ เบ๊อะเนอ, อ๊อโหล่ อู ตาบา อู ตาบี๊แก เหย่ซี เร๊อ โหง่พราเถ่ ตือมือ เด๊อ อ๊อโหล่ อากู เน๊อ, “เออ หม่า แวพู๊ เด๊อ แว โมหนิเกอเร๊อ อา เร๊อ แว ซิปล่อโอ่ เกอเร๊อ อา เตเพร, หนิดา แลแค อาโหง่ นี๋.” ^a

6 เบ๊อะอา โคเจ่ หนิโฮ ฮู๊เออ เบ๊อะเนอ, เหย่ซี ซิอิเช โกโน๋ โต่, เร๊อ อา วี แลคื๊อ โตโกล ตาลอ อาเหน่ เด๊อ เห่ขุ. 7 หม่าแน๊เรอ, แบ่เจ่ เหย่ซู่ แฮ เด๊อ เหย่ซีโอ่ เร๊อ อา แฮโต่เหย่ซี เน๊อ อา เฮ๊ เหย่ซี เน๊อ, “ก๊อถ่อ แลแค, ซิอิเช แต่เหม่.” 8 เบ๊อะเหย่ซี แม๊แถ่ เนอ, อา แม๊เถอะ ตื๊อ แบ่เจ่ เหย่ซู่ เตเพรเพร่ว แพ๊.

9 เบ๊อะเหย่ซี โอ่ เด๊อ โฉ่ลู กี๊ตา เบ๊อะเนอ, แบ่เจ่ เหย่ซู่ เฮ๊แก หนิ เหย่ซี โหง่ เน๊อ, “แกแย พู๊คู หม่าแว เออ, เก่ เซอ ก๊อถ่อเซอเพร กาคยา ล๋ายโต่เนอ, ล๋อ ซี แม๊เถอะ เตเออเต๊เห่เนอ, จว๊า แด๊โฉ่โล เป่ แต่ อู เตเพร่ว แต่เหม่ นี๋.”

10 อา โคเจ่ เต๊เห่ แด๊เฮอ ลู เน๊อ, “เพรอิซว๊า เตซว๊าเตแส่ อาซ๊าร๊า เต๊เห่ เฮ๊ เร๊อ เพรโพร เอลียาห์ เบ่แฮ เหร่อเล๊อ เร๊อ เมสิยาห์ หม่าเฮ๊อ เพรเมแลเปล๊กา อู เออเนอ เตเพร ปา, เหย่ซี จว๊าเฮ๊โต่ ฮู๊เนอ เมเต?” ^b

11 เร๊อ แบ่เจ่ เหย่ซู่ เฮ๊ฉื่อ เหย่ซี เน๊อ, “เพรโพร เอลียาห์ เบ่ แฮ เหร่อ หม่าแหน่ ปา เร๊อ อา เบ่ แฮ ตี๊หรี่แตแร เมแร๊ กาคยา เต ล๋อ ปลี เนอหม่า อาหม่าแหน่ เจ๊อ ว๋า. 12 หม่าแน๊เรอ แว เฮ๊ ซี, เพรโพร เอลียาห์ แฮ โทเฮ๊อ หม่าแน๊เรอ เหย่ซี ซิเง ลู โต่, เร๊อ แกแย เต๊เห่ เม ลู จู๋ เหย่ซี ซิปล่อ ซิหยื่อ เม ลู เนอแพ๊. แซ่ฮู๊เนอเฮ๊อ, เหย่ซี เก่ เม จาเมจือ แกแยพู๊คู เออ เตเพรปา.” ^c 13 เบ๊อะเนออาเค อา โคเจ่ เต๊เห่ ซิเงโปลแฮ เน๊อ อา เฮ๊ เฮ๊อ เพรเจเทอ คูยอห์น อาหรี่อาแก เออเนอ เฮ๊อ.