Mat 27:45-56 | EkySCThai | STEP | เป๊อแถ่ เบ๊อะเหมาะโถ่ จ๊อเรเน๊ เนอ เร๊อ อา โต่แฮ เด๊อ เหมาะกุ่ยตาแล โซมือ อากูเนอ, เก่ คี๊ตือรือ ตาลอ เจ๊อ เต๊เก่เล เจ๊อ.

Matthew 27:45-56

แบ่เจ่ เหย่ซู่ เซอ

(มาระโก ๑๕:๓๓-๔๑, ลูกา ๒๓:๔๔-๔๙, ยอห์น ๑๙:๒๘-๓๐)

45 เป๊อแถ่ เบ๊อะเหมาะโถ่ จ๊อเรเน๊ เนอ เร๊อ อา โต่แฮ เด๊อ เหมาะกุ่ยตาแล โซมือ อากูเนอ, เก่ คี๊ตือรือ ตาลอ เจ๊อ เต๊เก่เล เจ๊อ. 46 ผื่อผื่อ เบ๊อะเหมาะกุ่ยแล โซมือ เบ๊อะเนอ, เหย่ซู่ จ่าเพรอ เอ๊โทแถ่ เน๊อ, “เอลี, เอลี, ลามา สะบัก ธานี,” อาโหง่แลช๊า หม่า “แว จอแปแหร่, แว จอแปแหร่, เน วีแก แว เมเต?” ^a

47 แกแย ก๊อถ่อโอ่ เบ๊อะเนอ เต๊เห่ หนิโฮ แลแค เหย่ซู่ เอ๊โทแถ่ ฮู๊เออ เร๊อ เหย่ซี เฮ๊ แลแค เน๊อ, “อา เอ๊โทแถ่เฮ๊อ เพรโพร เอลียาห์.”

48 เบ๊อะเหย่ซี อาเกล เนอเตเพร, โตโพ๊โต อา แกล่จว๊าพย๊า แซ่เน๊อ แตแพ๊ เร๊อ อา จว๊าเจโน เด๊อ เทอแยฉ่า โซกู เร๊อ อา จอกลอหม่า เด๊อ เหว่เคอ เร๊อ อา โต๊โหล่แถ่ นอจุ๊ยโอ เร๊อ แบ่เจ่ เหย่ซู่. ^b 49 ล๋อ อา โอ่แก เนอเต๊เห่ เฮ๊ ลู เน๊อ, “อา โอ่ ดื่อเฮ๊อ ฮู๊เนอ, เป โอ่ป่อแม๊ โก๊หลื่อ เตอเปลอฮู๊ โป๊, หม่า เป แม๊เถอะ ช๊าเหล่ เพรโพร เอลียาห์ แฮ เมแลเปล๊ ลู ปา แอ, หม่าโต่แอ,” อา เฮ๊แลแค ฮู๊เนอ.

50 เบ๊อะแบ่เจ่ เอ๊โทแถ่ฉว่าฉว่า คยาแซ๊โป่ โตโพ๊ โทเนอ อาซิปล่อ เซอเพร เถ่จว๊าแก.

51 เบ๊อะเนอเค อิเกบ่าดุ เด๊อ อู จ่อตาตือบี๊ เด๊อ เตหลู่แต โฮกู เนอต๊าบ่า แลยา แก๊แถ่แกแล ปลื๊อแก เนอกยา. เตเน่วท๊อดี โทเรอ หล่อ เต๊เห่ ลูแอ เพ๊ลอ. ^c 52 โลกู เต๊เห่ ลูโมแถ่ ลอ เร๊อ แกแยบูโพ๊พู๊ เด๊อ อา เซอ โทเฮ๊อ เนอเต๊เห่ ก๊อถ่อเซอเพร กาคยา เอ๊ลา. 53 เหย่ซี โอ่ เด๊อ โลกู เร๊อ เถ่กา. โทเรอ เด๊อ คยา เบ๊อะแบ่เจ่ เหย่ซู่ครี๊ เซอ ก๊อถ่อกาคยา โทเนอ เหย่ซี กา กาโน แลแค เด๊อ วีบูโพ๊ เยรูซาเล็ม อากู เร๊อ อู แม๊เถอะ โร๊ลู เหย่ซี. 54 เบ๊อะโรมัน เกลอฮู๊เตเย กู่กล๊อ เออเตเพร เร๊อ แกแย เด๊อ อา โอ่ป่อแม๊เร๊อ เหย่ซู่โล เออเต๊เห่ แม๊เถอะ เตเน่วท๊อดี เร๊อ ล๋อ เตทวาแถ่ อาเหน่ เออเต๊เห่ เบ๊อะเนอ, เหย่ซี ซิอิเช เร๊อ อา เฮ๊ แลแค เน๊อ, “อา หม่า จอแปแหร่ อาพู๊ หม่าแหน่ แหน่ เฮ๊อ.”

55 เพรเหมาะ เด๊อ อา โอ่ป่อ แม๊จว๊าจู เด๊อ อายา เต๊เห่ โอ่โหร่โอ่เอ๊ กู๊ลา เบ๊อะเนอ. เพร เหมาะ เนอเต๊เห่ หม่า อาโอ่ เด๊อ กาลิลีเก่ เรอ ครวา เกอ เร๊อ เหย่ซู่. เร๊อ เหย่ซี เออ เต๊เห่ หม่าเพรเหมาะ เด๊อ อา แม๊ตู่ เมจว่าหนิ เหย่ซู่ เต๊เห่ เฮ๊อ. ^d 56 เด๊อ เหย่ซี เออเต๊เห่ อาเกลเนอ แกแย มักดาลา ดอกูโหมะ เหมาะมารี, คูยอกอบ เร๊อคูโยเซฟ อาโหมะ โหมะ มารีย์ เร๊อ คูเศเบดี อาพู๊ เต๊เห่ อาโหมะ.