Matthew 8:5-13
แบ่เจ่ เหย่ซู่ แหย่โอ่เหม่ โรมัน อา เกลอฮู๊กู่กล๊อ อาหลู่เล๊ เตเพร
(ลูกา ๗:๑-๑๐, ยอห์น ๔:๔๓-๕๔)
5เบ๊อะแบ่เจ่ เหย่ซู่ แฮโน เด๊อ วีคาเปอรนาอูม อากู เบ๊อะเนอ, โรมัน เกลอฮู๊เตเย กู่กล๊อ เตเพร แฮกุย ลู เตเมจว่า. 6เร๊อ อา เฮ๊ ลู เน๊อ, “แบ่เจ่ แวหลู่เล๊ เตเพร อาชุ๊ย เซอ ชิกยา เร๊อ อา โอ่เมอแต่ แพ๊ เด๊อ เหล่โอ่หี่กู ฮู๊เนอ. เร๊อ อาจา แหน่เจ๊อ ลู เฮ๊อ.” 7แบ่เจ่ เหย่ซู่ เฮ๊ฉื่อ ลู เน๊อ, “แว จว๊า แหย่โอ่เหม่ดื่อ ปา.” 8เกลอฮู๊ เตเย อากู่กล๊อ เนอเตเพร เฮ๊ฉื่อ เน๊อ, “แบ่เจ่, เน แฮโนแพ๊ เด๊อ แวหี่กู แพ๊เนอ อาต่า เร๊อ แว โต่. เฮ๊ตาแพ๊ เนโหง่ ตือมือแพ๊ เนอหม่า แวหลู่เล๊ โอ่โมคยา แหน่ ดื่อเฮ๊อ. 9หม่าเมเตเร๊อ แว เฮ๊ ฮู๊เออ เฮ๊เนอเรอ แว แหน่แบ่เจ่ แว เบ่ หนิดา แกแย เด๊อ อาดุเล๊อ เน๊อ แว เต๊เห่ อาโหง่. ฮู๊เนอ เกลอฮู๊ เด๊อ อาโอ่ เด๊อ แวเล เต๊เห่เนอ อา เบ่ หนิดา เกอดื่อ แวโหง่ ฮู๊เนอเนอ. เก่ แว เฮ๊ เกลอฮู๊ เตเพร เพร เน๊อ, ‘จว๊ามอ,’ เฮ๊เนอหม่า อา เบ่จว๊า แพ๊, เก่ แว เฮ๊ ลาติ เด๊อ อาโรเตเพร เน๊อ, ‘แฮมอ,’ เฮ๊เนอหม่า อา เบ่ แฮ แพ๊. โท๊โต่ แว เก่ เฮ๊ แวหลู่ เน๊อ, ‘เมมอเออ,’ เฮ๊เนอหม่า อา เบ่ เม แพ๊.” 10เบ๊อะแบ่เจ่เหย่ซู่ หนิโฮ เตเฮ๊เบ่ เออ เนอ, อา คย๊าอายื๊อ แหน่เจ๊อ เร๊อ อา เฮ๊ แกแย เด๊อ อา ครอครวา ลูคยา เต๊เห่ เน๊อ, “แว เฮ๊จ๊อจ๊อ ซี, เตหยื่อเตแหน่ แซ่ฮู๊เออ เด๊อ อิสราเอล อาเกลเนอ แว แม๊เถอะน๊อ ล๋ายโต่. 11แว เฮ๊ ซี, แกแย โอ่ เด๊อ เก่ซิเถ่ เก่แบ๊โน เต๊เห่ อา แฮ โร๊ลู ปา. เหย่ซี อา แฮ โอ่แน เอ่เต่อเกอ เร๊อ เปโพ อับราฮัม, โพอิสอัค, โพยาโคบ เด๊อ ม๊อขุ อา เทอเลเก่กู ปา. a 12แกแยยิวพู๊ เต๊เห่เนอ, อา โตเบ่ ทวา จอแปแหร่ อาแกแย เด๊อ จอแปแหร่ อาเทออาเก่กู เนอ หม่าแน๊เรอ จอแปแหร่ อา วีโนแก แกแย เหย่ซี เด๊อ เตคี๊ ลอ เหล่โอ่ ปา. เหย่ซี เก่ จว๊า โหง่เอ๊โทเอ๊โม เร๊อ เหย่ซี อะตาจ๊า เกอเร๊อ ลอปลี เจ๊อ อากู่เคอ เบ๊อะเนอ โต๊โผ่ ปา.” b 13โทเรอ อา เฮ๊ เกลอฮู๊กู่กล๊อ เน๊อ, “กามอ, อา เก่ ทวาแถ่ดื่อ ฮู๊ เน หยื่อเอ่ เนอ ปา.” เร๊อ อาหลู่เล๊ เนอเตเพร โอ่โมกา โตตื๊อ เบ๊อะแบ่เจ่ เฮ๊ ลู อา หน่าหลิ กูเนอ เฮ๊อ.
Copyright information for
EkySCThai