Nɨmogɨm Yoan Leta Yoanɨmna Ɨrɨki Nɨmogɨm Leta
Isɨpkita Yɨtkak
Onggɨtyam leta ɨrɨka rɨga re Yoante. Ton ɨtemb leta yɨrɨk re yɨpa singi iyeni konggam pɨlwa e dɨde kwa ɨtomb konggamna bꞌɨgawar wa pɨlwa e. Ajɨ ɨja e ama rɨka isɨpkita da, “Yɨpa sosim pɨlwa e dɨde onggɨt sosi rɨga wa pɨlwa e.”Sɨ onggɨt letand ton ugoiny re singi bꞌiyena mɨle omnɨkam sosi rɨga wa wɨngɨrɨnd, ɨ kwa nonony amneniny bꞌanygɨnena ouyaena rɨga gatab ɨ dɨde towaina ouyaena gatab.
2 John
Simesime Yɨtkak
1Simesime! Godɨmna obagendi kongga, kon nanyam rɨgate mor ɨtemb leta mɨrɨkaen mor bꞌɨgawar kɨma. Sɨ kon ɨmɨnjog im wen singi eyeninyɨn, ɨ ma kon nenasim, ajɨ toda kwa komkesa rɨgap opima wen singi eyenanj yepim re ɨmɨnjog yɨtkak wumɨr wekeny. 2Sɨ onggɨtyam ɨmɨnjog yɨtkak mop paemb rɨnte re mera pɨlɨnd wɨmena yikeny dɨde men kɨma dadal ngɨrpu kesa ɨbneneny, 3Bꞌu Godɨm pɨlke ɨ Bꞌuɨmna Bꞌɨga Yesu Kerisom pɨlke wurar ɨ kear ɨ dɨde ngɨmbla im wuweneny. Sɨ ton opima men kɨma tekeneny ɨmɨnjog yɨtkakɨm pɨlɨnd dɨde singi bꞌiyena mɨlem pɨlɨnd.Singi Bꞌiyena Mɨle
4Kon kea nɨnda moina bꞌɨgawar adarkinond ɨmɨnjog yɨtkak rɨrɨrɨnd menamenand odede rɨngma na re men bꞌingawa yɨt yokatonda Bꞌuɨm pɨlke. Sɨ onggɨt paemb kon ma sobijog sam na aenond. 5Kongga! Yu kon men metɨrkisɨn da, men bꞌogla mera wɨngɨrɨnd singi bꞌeyeninum, nokɨp kon ma sisɨl bꞌingawa yɨt e mor mɨrɨkaen, ajɨ ɨnta rɨna re men yokatonda re men gar ke utkunda mɨle yotomonda. 6Sɨ ɨtemb jɨ singi bꞌiyena mɨle da men bꞌogla Godɨmna bꞌingawa yɨt rɨrɨrɨnd menon yakatu. Ɨ ɨtemb jɨ bꞌingawa yɨt da wɨn bꞌogla menon okatenya singi bꞌiyena mɨlend. Sɨ ɨja naemb jɨ wɨn utkundenonda re wɨn gar ke utkunda mɨle yotomonda.Bꞌanygɨnena Ouyaena Rɨga gatab Nonony Yɨtkak
7Sɨ jogjog bꞌanygɨnena ouyaena rɨga opima pɨta auka wuweny onggɨt gowukoyɨnd. Ton odede opurena kae Yesu Kerisond yoenenyi da, Ton ma rɨga jɨ kena ikonj. Sɨ odede rɨga re bꞌanygɨnena ouyaena rɨga im dɨde Kerisom geja rɨga im. 8Wɨn walenggyam yɨrgong taukindam, nokɨm da ɨdenat wɨn maka tedamkurindam onggɨtyam mɨra nangga mana re wɨn bꞌasowa tuwot, ajɨ wɨn bꞌogla onggɨtyam rɨrɨrkɨpjog mɨra takasindam Godɨm pɨlke. 9Yet ra maka Kerisomna ouyaena rɨrɨrɨnd wɨmena ikeny ajɨ ɨgoukeny, ton re ma God kɨma e. Ajɨ yet ra onggɨt ouyaena rɨrɨrɨnd wɨmena ikeny, ton re Bꞌu kɨma e dɨde daka kwa Bꞌɨga kɨma e. 10Sɨ ra yɨpa rɨga wa pɨlwa ik dɨde ra ton maka ra onggɨtyam ouyaena yii wɨn goro tin waina met wa ɨngaukya dɨde goro tin simesime omna. 11Ɨ yet ra onggɨt rɨgand simesime omɨny, ton kea tina negɨrjog ouyaena dɨde mɨle emjiny.Undwatapu Yɨtkak
12Kor ma yɨpa kɨma yɨtkak im wanɨm ɨrɨkam, ajɨ kon ma singi en peba ɨrɨka ke wen yɨt omnenam. Ajɨ kon singi en da kon wa pɨlwa neken wen yɨr ongongɨm dɨde tugɨmjog ke wen yɨt tamneninyɨn. Nokɨm da ɨdenat meraina sam yɨndangɨr tawɨk. 13Godɨmna obagendi mor wundoi ma bꞌɨgawarɨp kwa men madaemb yɨt momnyi.
Copyright information for
GDR