‏

Nowam Yoan Leta Yoanɨmna Ɨrɨki Nowam Leta

Isɨpkita Yɨtkak

Onggɨtyam leta ɨrɨka rɨga re ɨtmɨkitijog rɨga Yoante. Ɨ ton onggɨtyam leta yɨrɨkonj re yɨpa sosi mopyamɨm pɨlwa na nyɨ da “Gaiyo”. Sɨ ɨrɨka rɨgat ma sobijog e Gaiyond yesoureny tina yɨm bꞌakawa mɨle map rɨna re ton amnɨkeninonj nɨnda gar ke utkunda rɨga wa pɨlwa. Ɨ ket nonony yɨtkak agoniny yɨpa negɨr rɨga gatab nyɨ da “Diyotrepe”.

‏ 3 John

Simesime Yɨtkak

1 Simesime! Koina singi iyeni Gaiyo, kon nany rɨgate mor ɨtemb leta mɨrɨkaen. Kon ɨmɨnjog e men singi miyenyɨn. 2 Kor rɨga yena re kon singi miyenyɨn! Kon komkesa gatab yɨr opmitenyɨn da, man bꞌogɨl wɨmena okatenyɨt dɨde kopa kesa mɨtɨbnyɨt odede rɨngma re moina wɨngawɨnga bꞌogɨl wɨmena yokateny. 3 Mop nokɨp kon ma sobijog sam na aenond re nɨnda gar ke utkunda nany dɨde yɨngganwar tuwonj dɨde ton ket moina ɨmɨnjog mɨle gatab yɨr ungata yɨt apurento odede da man ɨmɨnjog yɨtkakɨm pɨlnate menon yokatenyɨt. 4 Kon awɨr e kwa nangga gatab ma odede ukoijog sam yomnɨkenenyɨn, ajɨ kon ukoijog sam e yomnɨkenenyɨn, ra kon tutkundenyɨn da koina gar ke utkunda bꞌɨgawar ɨmɨnjog yɨtkakɨm pɨlnasim menon yokatenyi.

Gaiyomna Bꞌogɨl Mɨle

5 Kor rɨga yena re kon singi miyenyɨn! Man ɨmɨnjog bꞌogɨl mɨle e omnɨka yiyenyɨt ɨte re man gar ke utkunda nany dɨde yɨngganwar wa bꞌasowa mekenyɨt. Ɨ dɨde kwa onggɨtyam mɨle ɨte re man obai amneninyɨt ten yepim re God ma bꞌogɨl yɨrkokar bage yɨt pɨtapɨta omnena yiyenyi. 6 Sɨ tonpiya moina singi bꞌiyena mɨle gatab yɨr ungata yɨt usenento dɨkɨnd onggɨt sosind. Man bꞌogla ten bꞌobogɨl yɨm takainyɨt dɨde man Godɨmna singi rɨrɨrɨnd ten nyawɨnd ingaena gasa ke temnɨkeninyɨt ɨ ket tetmɨkeninyɨt nɨnda tungg nata menamenam. 7 Mop nokɨp re ton Kerisomna nyɨ map wuwenonj God ma obagɨki rɨga wa pɨlwa God ma bꞌogɨl yɨrkokar bage yɨt warabag omnɨkam, ton bꞌogla rako towa pɨlke yɨm bꞌakawa akatenento ajɨ ton makwa nangga na emdenento towa pɨlke. 8 Sɨ onggɨt paemb men bꞌogla odede rɨga bꞌobogɨl yɨm kumbɨnd raramiteninum, nokɨm da ɨdenat men ɨmɨnjog yɨtkak map gɨlgɨl wɨko rɨga taindam.

Diyotrepe ake Dimetriyo

9 Kon kea peba yɨrɨkond sosim pɨlwa, ajɨ Diyotrepet onggɨtyam sowaina yɨt maka emjateninonj, nokɨp ton singi na da ton mopyam nyɨ okas onggɨt sosi wɨngɨrɨnd. 10 Sɨ onggɨt paemb ra kon neken, kon ɨta mong ɨdngaen dem tina omnɨki mɨle gatab rɨna re ton negɨrjog yɨt ke sɨn yɨtkar nomnɨkeneninonj. Sɨ ton ma onggɨt mɨle nena kena nony rɨrɨr aukenenonj, ajɨ onggɨt rɨgat kea esaeneninonj gar ke utkunda nany dɨde yɨngganwar obai omnenam yepiya re God ma bꞌogɨl yɨrkokar bage yɨt pɨtapɨta omnena yiyeneno. Ɨ ton kwa rɨga agokeneninonj yepiya re singi aukenento ten obai omnenam, ɨ dɨde ton kwa opimemb obai omnenam singi rɨga sosi ke eaukeneninonj.

11 Kor rɨga yena re kon singi miyenyɨn! Man goro tataikeninɨm negɨrjog mɨle ajɨ ɨna bꞌogɨl mɨle nena. Yet ra bꞌogɨl mɨle omnɨka teyeniny, ton re Godɨm pɨlkae. Ajɨ yet ra negɨrjog mɨle omnɨka teyeniny, ton makwa ke Godɨnd yɨr yongonj. 12 Komkesa rɨgap Demetriyo gatab bꞌobogɨl yɨr ungata yɨt im opurena eyenanj dɨde kwa ɨta God ma ɨmɨnjog yɨtkakɨt bꞌobogɨl emjateniny tina mɨle. Ɨ sɨdaka ti gatab bꞌobogɨl yɨr ungata yɨt im apurenenindam. Sɨ man wumɨr et da sowaina yɨr ungata yɨt re ɨmɨnjog e.

Undwatapu Yɨtkak

13 Kor ma yɨpa kɨma yɨtkak im mornɨm ɨrɨkam, ajɨ kon ma singi en peba ɨrɨka ke men yɨt omnenam. 14 Sɨ kon singi en da kon wanakana neken men yɨr ongongɨm dɨde tugɨmjog ke men yɨt motɨnenyɨn. 15 Ngɨmbla man kɨma. Ɨ kor rɨgawarɨp men madaemb yɨt momnenyi. Sɨ madaka koina madaemb yɨt mera rɨgawar yɨpayɨpa tamneninyɨt.