‏ Acts 11

Bitrus Wa Wu Lafiya

1Safyewyi abara ɓa wo, abye do gaiciya ga ɓo. 2Shi Bitrus ɓo jezeɓe Urushelima, ɓa naɓo n woi. 3Ɓa gna wo ge, “Ho zhin zumunta na ʼbye do yi hoi gyi nyagyi n ɓai.” 4Bitrus wagna ɓa, nabari vinya. 5Wa gna, “Nwyihoi n Joppa ma zhin aduwa ma gye ruya. 6Ma gye kwanu dnagmayi koi shin zhin eshe. Ma gye abu fi gbo-gbo ana, alu, awa nya yi du anya yi n yi ta gyi m. 7Ma wo begye kwoi gna ‘Kni wu ha gyi.’

8“Ma gna awo Dagayi mi to shin anya deye gyi n yi awyidna gna yi to gyi nyin.

9“Amma ma je wo ge to gna ato bmiya lon, Shekwoyi woi ku gna ge a bmiya lom. 10Ko ɓo zhin lo nu har abwa ta, kafin aje kwanu yi la lo cei n she. 11Sa fyewyi aza ɓe ngun-ata ɓai kun n Kaisariya ɓai ɓe mi yi. 12Zafun Gyi-gyi-yi wa gna mi lo, mi to gna ge ɓa zhin abye do nu m. Aza ngun-tnanyi ɓa gni lo mi-i har Kaisariya. 13Ozaho wa gna yi, ngye shi malaika ɓei gna wo ge wo yi mi ɓe cei. 14Zafun Gyi-gyi-yi wa gna wo ngye shi mihin Bitrus ɓa wu-wo gni-gni zokwo.

15“Ma ya nabari manayi da, to mi yi ga zo m, Zafun Gyi-gyi-yi wa yakpe ɓa n ɓa ɓo zhi ɓo nyi. 16Deye kwa zhin mi ma pa Dagayi ɓeda ɓo n wo ɓo gna ge Yohanna ɓo zhin batizma n nuwan yi, amma a ɓa zhin fye batizma n Zafun Gyi-gyi-yi. 17Shi Shekwoyi nu ɓo ga ɓa nyaga ngye yihin nyi, nka nu n miyi ma na ɓoʼa?”

18Shi a zaje ɓo wo lonu ɓa ku ɓa aɓena fa ɓa ci Shekwoyi. Ɓa gna, E, Shekwoyi la dama ga abye do ɓa ɓe wo aba ɓa bwa wye-wyei nyalo-nyalo.

Abui-ye Yi N Antakiya

19Aviyi n ɓa ɓei busi n wahala sa ai la Istifanus wu nyi ɓa lo har Finishiya Saiparus, ɓedo Antakiya yi ɓa da nabari manayi. Amma n na Yahudiyi aba kawai. 20Ama dai a viyi n ɓa ɓo lo Antakiya ɓai kun n Saiparus nyi, ɓa da nabari manayi ye, ga Helleniyi. 21Dagayi ɓo la ɓa ɓeda tu anabarka, har abye deye ɓa ku gaiciya ga.

22Shi ikklisiya Urushelima nya ɓei wo, ɓa tnu n Barnaba yi n Antakiya ntu ge wa bma a Yesu viyi zhin ɓo. 23Wasi Antakiya wagye aɓo wowoyi, n Shekwoyi a zhin nyi, a dawo n mwa, wa mi ɓa zhi, wa gna ɓa ge ɓa la nyima Dagayi. 24Barnaba ɓo zhin oza manayi nu n nunuyi n Zafun Gyi-gyi-yi. Deye kwa zhin har aza mwa begye ɓa ga Dagayi gaiciya.

25Barnaba wa laka wa lo Tarsusu woi ye Bulus. 26Wa ɓe woi n An-takiya ɓa fi ɓo eye yi gmanyi ɓai wu a viyi woi-woi nya. N ɓo nu a ɓei ya a viyi yi ge a Yesu viyi.

27Nsayi anabi ho ɓa kun n Urushelima ɓa ɓe Antakiya. 28Gmanyi n ɓa mi a yi wo Agabus wa laka gni wa zhin anabci shi Zafun Gyi-gyi-yi ɓei wu wo, wa gna mikun ɓe lo n Israila kni. Deye ɓo zhin dna n sa nu Klaudiyus ɓo gyi ebe nyi. 29Ntu cenu a viyi ɓa zhin shawara ɓa tnu n nyagyi yi ga a viyi n Yahudiya, zaho-zahoi wa ga shi wo ɓa mi. 30Ɓa ku anyagyi ye ga Baranaba n Bulus yi ge, ɓa lo atukoda ikklisiya nya cei n Urushelima.