‏ Acts 12

Bitrus Wan-wan Nwo Gni-gni Yi

1Dna n sayi esu Hirudus wa laka, woi zhin gaba na gaiciya ga yi. 2Wa bara gmanyi wu, watau Yakub Yohanna zado. 3Wa gye deye kwoi da a Yahudiyi, wa Bitrus wan wa wo gu n Paska sa. 4Wa wo dna n kurkuku, a soja ngun tnanyi ɓai gu wo. Hirudus ɓei n nufi ge wa wu wo nu n Paska avun. 5Amma aduwa zhin n wyenyi yi ɓa gun lo Shekwoyi aba, ikklisiya nu ɓo zhin aduwa ntu ge Shekwoyi wa gu wo dna n kurkuku.

6Amma n sukwoyi kafin a da wo wa, woi wangye dna na soja ngun aba atan-tasin, na gmai fi wo abwa ababa, na soja ajei zhi na bokunmi. 7Safyewyi wa gye buzangna wa gye malaika gni n wa ba wa gna wo, “La pye ha laka.” Shi wo ɓo da lonu a gna kaya zhi n kni. 8Malaika wa gna wo ge, “Ku ha je kpe ha ku abuada fi.” Waku zhin lonu wa je wo gna ge ku ho koti kpe ha vi mi ɓe.

9Bitrus wa gmi n kurkuku woi vi malaika lo. Amma wa gye ngye wo nuna nu. 10Ɓa du abokunmi n gun aba ya, ɓa ɓe abokunmi sunkna nya. Ɓa guya n ɓahin yi, ɓa duya ɓa zan-zan fyewyi malaika wa fawo.

11Bitrus n sayi wa kpe ge, Dagayi la wo malaika tnu, woi gni wo n Hirudus akun. 12Shi wo ɓo gni wa zhin tunani fyewyi, wa laka wa lo Maryamu Yohanna ʼya puwa, aba na aza ɓei yezhi ɓai zhin aduwa nyi.

13Wa je aba, ɓi nyikwoyi ho ai yi wo Roda, wa ɓe ntu ge wa gu aba ya. 14Shi wo ɓo kpe ge Bitrus begye nu, a da wo n mwa sosai. Wa busi lo mi wa gna aza ge Bitrus gni lo na bokunmi. 15To ɓa ga wo gaiciya m, amma to wa fa da ɓo m, sai ɓa gna Bitrus malaika nu.

16Bitrus wa gyi abye woi je aba Ɓa lo ɓa guya ceʼa wo ɓa. 17Wa gna ɓa ge ɓa ku ce pi, wa wu ɓa enya n kwa zhin, “Fye ku gna Yakub na za je yi, enya ko ku zhin.” Wa fa ɓa wa lo wo nya.

18N labmi yi a kurkuku da ku je-je ɓa nya ge Bitrus ma? 19Hirudus wa ku a soja wu. Ntu ge ɓa ɓo fa Bitrus wapwo. Nsayi wa lo Kaisariya wa sase bwai anyipyei fyewyi.

20N Kaisariya azaho ɓa ɓe ɓai kun Taya n Saidon yi, ntu ge ɓa gye Hirudus wo to ɓo dagma n ɓa yi m, amma ɓa ɓo ku ze anugundo ntu gniko gni ɓo. 21Ɓa nyipyei shi ntu ge ɓa wo Hirudus ɓeda. N wyihi wa ku wo asu jekpe wa ɓe wa tu wo asu ku-jara ntu ge wa da ɓo. 22Aza a ɓowyi ɓa gna, “Begye ye to zhin oza nyanu m, amma shekwoyi nyanu.” 23Nsayi-sayi yi malaika Dagayi nya wa ɓe wo n nyasanayi, avin ɓa gyi wo har wa fi, ntu ge wo to ɓei ga Shekwoyi mwa-mwa m.

Barnaba N Bulus Yi N Antakiya

24Shekwoyi ɓeda kwa gyi abye wolo-wolo har a bwa a viyi n mwa begye.

25Barnaba n Bulus yi ɓa lo aza gye n Urushelima. Shi ɓa ɓo ku ɓo zo n ɓa ɓei lo zhin, ɓa jeze ɓe Antakiya n gnisun n Yohanna Marukus yi.