‏ Acts 13

1Anabi ɓedo na malami yi ɓei mwa n Antakiya, Barnaba yi ɓei nyi n ɓa mi n Siman yi. Lukiyas n Manaya ɓei nyi n jesun, ɓedo n Bulus yi. 2N wyihoi ɓai zhin aduwa Zafun Gyi-gyi-yi wa cige, “Mi ye Bulus lo n Barnaba yi ntu tnu-tnu ɓo n mi ɓa gaɓa”. 3Shi ɓa ɓo ku aduwa n azumi yi zo, ɓa tuɓa anabarka ɓa ya tnu-tnu yi.

4Zafun Gyi-gyi-yi kwa wa ze ɓa gna bye. Ɓa lo Selusiya n Saparus yi. 5N ezhi ho ai yi ko ge Salamis, ɓa lo a Yahudiyi aduwa nyakun ɓa zhin waʼazi ɓo. Yohanna Markus ɓei knusun n ɓai.

6– 7Ɓa zhin waʼazi n ekniyi vinya. Sanu ɓa ɓei si Pafos ɓa gye anabi katai ho, ai yi wo ge Bar-Yesu. Wo ɓei zhin esu nugundo nu. Esu yi ɓei zhin oza hankali da nu. Wa yi Bulus n Barnaba yi ntu ge ɓa zhin wo waʼazi. 8Amma Elimas anabi katai hi, Owo ye maʼana nu, wa gna su ge wo to gwo ɓa ɓeda m. Wo to ɓei ye ge osu yi wo ga Shekwoyi ɓeda gaiciya m.

9Ntu cenu Bulus wa gyi minagyi sosai. Ntu ge wo ɓei nunuyi n Zafun Gyi-gyi-yi. 10Wa ci wo ge, “Oho shetam ɓi ho zhin oza nukwoyi nu. Ho ta ye anya manayi m. Ho ta fa gaba zhin ɓo n Dagayi m? 11Nsaiye kwa Shekwoyi la kni tu ho. Ho ta gye wyeban har esa fyewyi.” Nsayi-sayi wa ze wyebuayi. Wa laɓa woi zan oza shin wa shi wo busi bwa. 12Shi esu yi ɓo gye lonu, wa ga Shekwoyi gaiciya n sai-sayi. Wa wo Shekwoyi dna n jesun.

Bulus Wa Lo Turki

13Bulus kuwa n wa nugundo yi ɓa fa Pafos ɓa lo Parga n Panfiliya ʼkni, Yohanna Markus ɓei jeze ya nu wa lo Urushelima. 14Amma Bulus n Barnaba yi ɓa godiya lo Antakiya n Bisidiya ʼkni. Ɓa lo aduwa nyakun n Satiwyi yi. Ɓa ɓei zhin ɓa lo aduwa n wyiyi nu. 15Shi aɓo la nya zo ba n ataurat ɓedo n anabawa yi, anya Bulus n wo ɓeda yi lo, wa ɓe wa da.

16Bulus wa lakala gni wa ya ɓeda wa cige, “Ofye a Israilayi n azayi n ɓa ga Shekwoyi mwa-mwa nyi.”

17“Shekwoyi ɓei kni ʼya dada wa gaɓa mwa-mwa dna Masar wo ɓei zhin deye n sayi nu n wo ɓei kun ɓa n Masar nyi. 18Wa kun sun n ɓai har aye shinyi n zhabui. Ɓai zan-zan laɓa n bmana. 19– 20Shi ɓa ɓei lo Kanʼana wa sun kun ga ɓa, har abye ngun-tnaba ku fi kutu-kutu Wa fi ɓa n alkali akun har aye 450. Oza n wo ɓei ya tu ɓa wonu zhin anabi Samuila.

21“Nsayi aza gyi wye nge aga ɓa esu, Shekwoyi wa ga ɓa Saul Kish nugun. Wo ɓei zhin Banyami bye nu. Wa gyi be aye shinyi. 22Anuna Shekwoyi wa shin wo ya wa dna Dauda be. Dauda ɓei zhin ozanu n wo bugba ɓei shi n Shekwoyi aba. 23Njesun Dauda bye nu, wato Yesu ɓei nu Shekwoyi alkawali wa gn Israila.

24“Amma kafin wo ɓe, Yohanna Baptizma zhin yi ɓei la ɓe kpa. Wa zhin waʼazi ge aza ɓa fa ɓa laifi, ɓa pmi ɓe Shekwoyi aba. 25Sanu Yohanna ɓei ye wa fa tnu-tnu wa cige, ‘Fye gye ge mi zhin Kristi nu? Ai wo ɓa ɓe esayi fyewyi. Mi zhin za gbagbayi nu n waba sosai.’

26“Omi azaje Ibrahim a yawyi n fye abye do yi n fye wo Shekwoyi dna nyi, gni-gni ye zmn fye nya nu. 27A Yahudiyi n Urushelima, ɓei nu Shekwoyi ɓeda ɓa Yesu wu. Ɓa to ɓei kpe nya ye n ɓa zhin m. 28Ɓa to ɓei kpe nya ye n ɓa ɓa wu wo tu kwo m. Ntu cenu ɓa gna Bilatus ge wo wu wo kawai. 29Shi ɓa ɓei la wo wu wato ɓai ku anabi ɓeda nu a wo bi.

30“Amma Shekwoyi wa lawo kala n vingwo. 31Aza ku gye wo n jesun, wato aza n ɓa ɓei kun Galili ɓa gni Urushelima lo nwoi oɓanu ɓei da n ɓa gbei pei-pei ge Yesu ɓo la laka n vingwo.

32– 33“Nabari nu kuwa n ya ɓe fye cei, Shekwoyi gni-gni la ɓe ya ba, ntu ge Yesu la laka n vigwo, Zabura sura 2 cige, ‘Nnaiye mila ho ze omi ɓi sosai.’

34“Shekwoyi ɓei zhin alkawali ge, wo ɓa la Yesu kala n vingwo, wo ta shan fi m. Alkawali kwo-kwo yi kwa cige, Miɓa zhin ga ho anya wo-woyi n mi ɓei gna Dauda nyi. 35Zabura cige, Shekwoyi ta fa wo za Gyi-gyi-yi wa bwo m. 36Wo to ɓei da Dauda nu ɓo m. Ai Dawuda ɓo la fi har wa ku bwo dna vingwo. 37Amma wo ɓei da zado nu ɓo. Owo nu n efi to ɓo mi kwa shi wo m. Wato Yesu nu.

38“Omi azaje gafara zhin lo n Yesu aba nu kawai ntu fye alaifi ɓo. 39Zaho-zahoi wa gawo gaiciya aɓa ze wo oza gyi-gyi yi, enya n a Yahudiyi owa ta mi kwa zhin m. 40Oh fye zhin peceiye, mi to cei pma anabi ɓeda ye kwa nu n fya ba m. Ntu ge ɓa ci ge, 41Fye gye, fya bwi, ofye awyegbaciyi, gama mi zhin aɓo wowoyi lo n fya ba, fyei ta ga gaiciya lon, ko ozaho yi wu fye awyega.”

42Aza ɓa fa aduwa nyakun n wyi yi n gye a tu ɓa dole nu ge ɓa kun. Ɓa gna Bulus ge wo ɓei jezeɓe ntu ge ba wo Shekwoyi ɓeda, n satiwyi nkwo ɓe lo nyi. 43Aza n mwabegye n wyiyi ɓa vi Bulus laɓa n Barnabas yi. Bulus wa gna ɓa ge ɓa ga Yesu gaiciya ɓa vi wo. 44Shi Satiwyi ɓei si aza ku nu aduwa nyakun sosai ntu ge ɓa wo Bulus eda.

45Amma shi a Yahudiyi atukwoda ɓei gye aza lonu minagyi kwa gyiɓa. Ɓa kni Bulus akmi ɓa gna ɓa aɓeda nukwoyi.

46Bulus n Barnaba yi kuwa ɓa cige, “Kwo yi zhin dole nu ya ɓe fya ba a Yahudiyi n nabari manayi. Amma n saiye fye la yi ɓo na, fye ta ye yi ɓeda lo m. Ntu cenu yi lo abyedo aba nu.” 47Shekwoyi ɓei gna yi lonu nu, nge ʼmi ku fye ze buzangna n abyedo aba fya kun ɓaya n wyegma.

48Shi abyedo ɓei wo lo nu, ɓa dagma ɓai ci Shekwoyi ntu wo ɓeda ɓo; aza akni-kniyi ntu wye-wyeyi nyalo-nyalo nya ɓo, ɓa bei ku gaiciya ga.

49Ezhi yi vinya kwa wo Shekwoyi ɓeda laɓa.

50Amma a Yahudiyi atukwoda ɓa la gyikici ka. Ɓa zhin a nya Bulus ya n zhi yi. 51Amma Bulus n Barnaba yi, ba kun abutukun ya n ɓa pita. Ɓa kun ɓalo Ikoniya. 52A Yesu viyi kwaɓa bwa bugba bui-bui yi sosai, n nunuyi n Zafun Gyi-gyi-yi.