‏ Acts 14

1N Ikoniya Bulus n Barnaba yi, ɓa lo aduwa nyakun ɓa zhin waʼazi sosai nya. Har aza n mwa ɓa ga gaiciya.

2Amma a Yahudiyi ɓa ku kala ɓa da aɓo nukwoyi tu Bulus tukwo, ɓedo n Barnaba yi. 3Amma Bulus n Barnaba yi, ɓa fi ɓai zhin waʼazi, Shekwoyi kuwa wa gaɓa ikwo har ɓa zhin aɓo wowoyi n mwa. 4Aza n zhiyi kwa ɓa gna jeya, aza ho ɓa ye ge a wu ɓa, aza ho kwa ge a gye ɓa sun-sun.

Zabmazhi La Kagna Bwa

5– 6Sanu Bulus n Barnaba yi, ɓo kpe ge a yelo a luɓa sosai, ɓa busi n zhi yi ɓa lo Listra, Darbe n azhi ɓiyi-ɓiyi n Likaonia kni. 7Ɓa da nabari na zhi ye laɓa.

8N Listra ɓa gye zabmazhi ho, aɓo mawo n wu lonu nu. 9Wa wo Bulus woi zhin waʼazi, Bulus kwa wa kukpe ge zaye n gaiciya gayi lo. 10Bulus wa ciwo ge, “Omi zado lakala.” Wa laka wa ya zan-zan.

11Shi aza ɓo gye lonu ɓa fi aku. Ɓa cige, “A shekwoyi ku ɓe ya naiye.” 12Ɓa yi Barnaba ge Zafas, Bulus kwa ɓa yi wo ge Hamis. Oɓa shekwoyi aye nu lo nu. 13Har ɓa ɓe n nakwo yi ntuge ɓa gba shan.

14– 15Amma shi Bulus n Barnaba yi ɓei gye lonu, ɓa ci ge, “Kai! Fye ku I fa mana! Ai yi zhin aza nu n gye fye. Yi cei pma fya fa shan gba nu fya vi Yesu n wa zhin anyi vinya nyi. 16N sapai Shekwoyi ɓei fa ɓa zhin nya ɓa gye. 17Amma Shekwoyi to ɓei fa wo hin n tna seida m, wa ga nuwan n anya manayi yi.”

18Dudu lonu ɓa ɓo fa dai ca nu, ɓa ɓo ye ɓa gba shan dole.

19Dna anyipyei fyewyi kawai a Yahudiyi ɓa kun n Antakiya ɓedo Ikoniya yi, ɓa la wahala kaia, ɓa kni Bulus akuta har a gni wo gni-gni a biwo ya n zhi mi, ɓai gye ge wo la fi. 20Amma a Yesu viyi ɓo shekna wo, wa lakala wa lo zhi mi n labmi yi ɓa lo Darba.

21Shi a ɓei zhin waʼazi ɓo ɓa jeze ɓe Listra, Ikoniya ɓedo n Antakiya yi. 22Ɓai bma a Yesu viyi zhin n Yesu ɓedayi, ɓa gna ɓa ge ɓa to fa Yesu m. Kwo wahalai nu ɓe, ntuge zokwo nu bwa sun nu n ko ɓa lo n yi n she. 23Ɓa kni abyeda ga ɓa, ɓa zhin aduwa gaɓa n azumi yi sosai, ɓa fi ɓa n jesun n Shekwoyi akun.

24Ɓa je lo ɓa duya Bisidiya ɓa lo Pamfiliya. 25Ɓa zhin waʼazi n Perga ɓa lo Ataliya.

26Ɓa jeze lo Antakiya n eya nuwan nya yi, ɓa ɓei ya, zan-zan ya nu. A ɓo fi ɓa n Shekwoyi akun n ya nu n jesun.

27Sa n ɓa ɓo zhi, ɓa yi a Yesu viyi ɓa wu ɓa lafiya nya n ɓa ɓo zhin. Ɓa gna ɓa shi Shekwoyi ɓei gu zokwo ya ntuge abyedo ɓa kpe Yesu ye. 28Ɓa ku mwasa nkunsun na Yesu viyi n Antakiya.