‏ Acts 16

1Bulus n Sila yi ɓa lo Darbe, n sayi ɓa lo Listra aba nu ɓa ɓo gye Timatawus. Timatawus n wo aza mayi ɓa ɓei zhin a Yesu viyi nu! Owo ʼya ɓo zhin Yahudiyi nu amma owo dada ɓo zhin Heleniyi nu. 2Timatawus ɓo zhin oza manayi nu, har ai kpe wo ye n Listra ɓedo n Ikoniya yi ntu wo hali manayi ɓo. Wo ɓo n seida manayi yi. 3Ntu wo seida Yesu viyi manayi ɓo, Bulus ɓo gna wo ge wo gni lo n ɓai. Ntu ge to Ayahudiyi ɓa zhi gbo n woyi m, Bulus wa ku wo zhin kaciya gama ozaho-zahoi ɓei kpe ge owo dada ɓo zhin Heleniyi nu. 4Ɓa zan azhi yakwo, ɓai gna a Yesu viyi shaula n na ɓo zhin ntu abyedo ɓo, n Urushelima nyi. 5Ntu deye ɓo, ikklisiya kwa mwa fyegyi-fyegyi dna n gaiciya n begye yi njesun.

6Ɓa zan laɓa fi n Firijiya ʼkni, ɓedo n Galatiya yi. Amma Zafun Gyi-gyi-yi ɓo la hana n ɓai, to ɓa zhin waʼazi n Asiya n sayi yi m. 7Sbi ɓa ɓo ku si Misiya ɓa zhin shaula ɓa lo Bitiniya, amma Zafun Gyi-gyi-yi wa hana n ɓai. 8Cenu ɓo zhin ɓa zan fi n Misiya ʼkni, har ɓa ɓe Turas.

Bulus Ɓewyegye

9N Turas Bulus wa nu ena n sukwoyi. Wa gye Makidoniya yi za woi gna ge, “Piya ɓe n ya ha bma yi zhin.” 10Ɓa zhin shaula ɓa lo Makidoniya ntu ge wo ɓo la tabata Ige Shekwoyi nu tnu n ɓai, ɓo zhin waʼazi nabari manayi nya n bwai.

11Ya kun n Turowas ya lo eya ya lo Samatiras. Ya si Niyapolis n nyipyei bayi yi. 12Ya duya ya lo Filibi, ko ɓo zhin galu nu a Roma yi nya, Ezhi dnagmayi nu dna n Makidoniya, ya ku fi ɓo anyipyei fyewyi.

13N Satiwyi ya lo ednagbe aba nu aza zhin ɓa yezhi ɓa zhin aduwa. Na bayi ya wu anyikwoza Shekwoyi ɓeda. 14Nyikwoza gmanyi a yi wo Lidiya, wo gmi n Tiyatera wo ɓo zhin bwazeyi nu, woi kun aje nakwoyi nu, wa ɓe ntuge wa ci Shekwoyi wa gu wo bugba ya, wa ye abui, ntu waʼazi ɓo n Bulus ɓo zhin nyi. 15Ya zhin wo baptizma n na zayi nwo puwa vinya, wa gyi yi wye ge yi shin fi n wo puwa wa ci ge, “Ngye fye ku ye ge, mi zhin oza gaiciya danu n Dagayi aba, fye ɓe fya shin fi n mi puwa”. Ya ku ye ya lo wo puwa.

16N wyihoi, yi lo aduwa zhin n dnagbe, ya gye ɓinyikwoyi ho nu aljanu yi. Wo ɓei zhin woi da ɓo nɓa ɓa zhin abye, har deye kwoi ɓe owo adagayi n agyiwye yi. 17Wa vi yi ɓe woi ɓewyi, “aza deye Shekwoyi abara nu, ɓa ɓe ntu ge ɓa gna fye, shi aba zhin fye alaifi gafara.”

18Wo ɓo zhin lonu cici, har anyipyei fyewyi. Bulus wa gyi minagyi wa gnakni aljanu wa gna, “dna Yesu Kristi ye mi ye fya kun nwo.” Nsai-sayi yi aljenu ɓa kun.

19Amma owo a dagayi yi ɓa gyi minagyi n Bulus yi, ntu ge wo la agyiwye zokwo wun ɓaya, ɓa wan Bulus n Sila ɓa lo n ɓai na wadai aba n gnikwo (ntu ge awadayi ɓei zhi ɓo nu).

20Ɓa da ge a Yahudiyi ye n ɓa zhi nyi, ɓa wun yi zhi ya lo. 21Ɓai gna aza ge ɓa to zhin a Romayi awyidna vi m.

Wan-wan Fi N Kurkuku

22Aza gyi minagyi, awadayi ɓa gna za ge ɓa lu Bulus n Sila yi. 23Shi ɓa ɓo ku ɓa lu dai-dai, ɓa ku ɓa gu fi n kurkuku, a gna kurkuku guyi ge wo to ye ge ɓa bu si m.

24Kurkuku guyi wa ku ɓa, wa ku ɓa gufi n mi mi, wa ku ɓa gyi n apita.

25N sukwo sadu yi Bulus n Sila yi ɓa ya anyi kwo ga Dagayi, akurkuku da aje ɓa wo ɓai ko anyi. 26Sa fyewyi ekni kwa ya ashan-shan, kurkuku kwa shan-shan abokunmi ɓa guya agma ɓa kunya nɓa abwa duk na pita yi. 27Shi kurkuku guyi ɓo kun agyewyi wa gye kurkuku abokunmi la guya, wa gye ngye aza wan-wan yi la busi, wa la ebe yakwo ntu ge wa wu wohin. 28Amma Bulus wa sawyi, “To wu hohin, gye yi fi lo ya vinya.”

29Woi gni wo vin ntu edna ɓo, wa gna ge ɓe n na yi. Wa lo ɓe kurkuku wa chakwo-kwo shi n Bulus abye n Sila yi. 30Wa kun ɓa ɓe cei wa nya ɓa ge, amalemi nɓa zhin wuna ma pwoo a?

31Ɓagna wo ge, “Ga Yesu Kristi gaiciya ho ɓa pwo n aza yi n ho puwa vinya.”

32Ɓa gna wo nabari manayi ɓedo azayi n wo puwa vinya. 33N sukwoyi yi wa zhan ɓa a ciya, owohin n wa ʼzayi vinya nwo puwa a ku ɓa zhin baptizma. 34Wa ku ɓa wa lo ɓai nwo puwa wa ga ɓa nya gyi. Owo puwa vinya kwa dagma, ntu ge ɓa ku ze a Yesu viyi. 35N labmiyi awadayi ɓa tnu n dan-sanda yi ge wo gna kurkuku guyi ge a Bulus ɓa lo. 36Kurkuku guyi wa gna Bulus n Sila yi ge ɓa lo.

37Amma Bulus wa gna “awo, ɓa ku yi lu n aza awye ɓai kuyi fi n kurkuku n tna wada, eyi n yi zhin Romayi, n sayi ɓa ye ya lo fiya kpe-kpe! Ɓa ɓe n ɓahin ɓa loyi ya.”

38Dan-sanda wa jeze lo wa gna awadayi, shi ɓa ɓo wo ge Bulus n Sila yi zhin a Romayi nu ɓa wo dna.

39Ɓa ɓe kurkuku ɓa gyi ɓa wye ge, ɓa la kun nzhi hi ɓa lo ɓa nya.

40Bulus n Sila yi ɓa kun n kurkuku, ɓa lo Lidiya puwa, ɓa gye a Yesu viyi nfi ɓo, ɓa mi ɓa bugba zhi, ɓa kpe kala ku ɓa lo ɓa nya.