‏ Acts 18

1Bulus wa fa Atina wa lo Korinti. 2N Korinti wagye Akila n wo nyikwoyi Biriskila, ɓa ɓo ku sase n Italiya amma n sayi ɓai fi Korinti nu. A ɓo ma Akila n Pontus nu. Ɓa ɓo fa Italiya ntuge Kaisar Klaudi ɓei la Ayahudiyi nya ya n ɓa ɓo fi n Roma nyi. 3Bulus wa knu tnu-tnu zhin n ɓai, ntu ge oɓa tnu-tnu ɓei zhin gmanyi nu watau alubui zhinyi.

Nɓa Lo Abyedo Aba

4Bulus ɓei zhin wa lo aduwa nyakun n satiwyi doho-doho yi, woi wu a Yahudiyi ɓedo n a Helleniyi ge Yesu nu zhin Kristi. 5Timatawus n Sila yi ɓa fa Makidoniya ɓa ɓe da Bulus n Korinti. Shi ɓa ɓo ku ɓe da wo, Bulus wa gyi abye n waʼazi yi, woi wu a Yahudiyi Yesu nu zhin Kristi. 6Amma a Yahudiyi ɓa na waɓo, wohin ce wa kun wo aje butukun ya wa gna, ofye ami ɓa tu lo nfye, amma mi kni-kniyi lo, n sayi nɓa zhin waʼazi na byedo aba nu.

7Avun wa lo wa shin dna n Titus puwa. Wo ɓei zhin ebye do nu, amma wo ɓo zhin woi ye Shekwoyi, woi ga wo mwa-mwa. Owo puwa ɓei wu vivi n aduwa nyakun yi. 8Krispas nu ɓei zhin aduwa nyakun Itukwoda. Owo puwa vinya ɓa ku vi Yesu, aku ɓa zhin baptizma ɓedo nazadohoi.

9Shekwoyi wa daɓo n Bulus yi dna n ena, wa gna wo ge, “To wo dna kwo ha busi m, daɓo, to ce pi m.” 10Ntu ge mi gnisun lo n hoi, ozaho ta zhin ho nyaho m, mi azayi lo dna n ezhi deye n mwa. 11Elonu Bulus wa gyi abye, woi wu Shekwoyi ɓeda har eye gmanyi n tokun yi.

12Amma esa n Galiyo ɓo gyi gwamna dna Akaya, a Yahudiyi ɓa la gyikici ka n Bulus yi, ɓa zhin wo kala n gwamna aba. 13Ɓa gna ge, Bulus gna aza ge, ɓa ga Shekwoyi mwa-mwa n azokwoyi n ɓa zhin gaba n Romayi awyidna yi. 14Bulus woi ye wa daɓo, amma Galiyo wa gna akala da ge, oza deye ɓo gna wo ku laifi zhin, mo kna fye ɓeda Itnubua. 15Amma shi ko zhin adini ɓo nu nyi, fye da n fyehin yi, omi anuwan to dna lon. 16Wa ɓa kunya j n kotu.

17Sai a Yahudiyi ɓa wan Sostina, ɓa lu wo shi bmi wo nu ɓei zhin tukwoda woi-woyi, amma Galiyo to wa gye wa nuwan.

18Shi aɓo ɓo ku zo, Bulus wa dna ɓo anyipyei n mwa begye, wa kpe piya lo Suriya ɓedo n Biriskila n Akila yi. Bulus wa tukwo wun n Kankiriya ntu ge wo ɓo la nyasi si. A Yahudiyi knunu nu ɓa zhin lo nu. 19Shi yi ɓei si aya lo ɓa n Afisusu wa fa yi fi n eya wa lo aduwa nyakun wa daɓo n a Yahudiyi n ɓo. 20Ɓa gna wo ge wo la gni nɓai, amma esa to ɓei nyi m.

21Wa gna dole ma lo mi sun dna Urushelima. Amma wa zhin ɓa alkawali ge, wo ɓa je ɓe ndei Shekwoyi waye, ya lo yi nya.

22Ya kpe zhi n jesun aya lo ɓa n Kaisariya, Wa lo wa ɓi ikklisiya gna ya kpe duya lo Antakiya. 23Ya ku sun sa fi ɓo, avun wa laka wa lo Turki njesun, Wa duya n Galatiya ɓedo n Firijiya yi, Wa zhin ziyara woi bma a Kristi yi zhin, ɓa mwa dna n Dagayi.

24N sayi Apollos ɓei dna n Afisus, wo ɓei zhin malami dnagmayi nu Shekwoyi ɓeda nya, Wo ɓei gmi n Alekzandariya n Masar kni nu. 25N Masar ozado ho ɓo ku Nabari manayi gna wo ntu Yohanna Baptisma zhin yi ɓo, n wo wu-wu yi tu Yesu tukwo, wo to ɓei n Shekwoyi yekpe yi n du deye m. 26Wa ya waʼazi zhin n kala yi, n iko yi n mwa dna na duwa nyakun wa gna ge, Kristi ɓe lo fye zhin shiri fya gwo wo. Briskilia n Akila yi ɓai fi ɓai wo, shi wo ɓei ku zo ɓa yi wo, ɓa zhin wo bayani ntu Yesu ɓo. Watau wo la ɓe, woi la fi, woi la laka n vingwo, woi la gun lo eshe, woi jeze ɓelo njesun. 27Apollos wa ye ge wa lo Akaya, a Kristi yi ɓa mi wo gni ge wo lo. ʼBa ka a Kristi yi ge a gwo wo n agmadayi shi wo ɓo si ɓo. Shekwoyi wa zhin apma n woi, wa mi ikklisiya gni. 28Nɓo wa wu a Yahudiyi dna n Shekwoyi ɓeda ge, Yesu nu zhin Kristi n tna shaka.