‏ Acts 19

Agaiciyagayi Nla Zafun Gyi-gyi-yi Gwo

1Esa nu Apollos ɓo dna cei n Korinti Bulus wa duya n Turki wa lo Afisus wa sun abara hoi ɓo. 2Wa nya ɓa ge? “Fye ɓo la Zafun Gyi-gyi-yi gwo esa nu fye ɓei ga gaiciya nyi?” Ɓa gna ge, “Awo.” Yi ta kpe Zafun Gyi-gyi-yi ɓo ye lon har ge ya gwo Wo m.

3Wa nya ɓa ge, “Fye ɓo ga kniyi nu gaiciya har a zhin fye batisma?” Ɓa gna ge, “anya n Yohanna baptisma zhinyi ɓo wu nyi.”

4Bulus wa gna ɓa ge, Yohanna baptisma ɓei zhin nya nu nkwo wu abui ye n laifi. Aza na ɓei zhin ɓa baptisma nyi aɓo zhin ɓa ntu ge ɓa vi Yesu nu. Aye aza vinya ɓa fa laifi ɓa zan Shekwoyi shin.

5Avun a zhin ɓa batisma dna Yesu Kristi ye. 6Bulus wa kpe ɓa abwa na tukwo Zafun Gyi-gyi-yi wa shinkpe nɓa, Nsai-sayi ɓa daɓo anyitalayi ɓai zhin anabci. 7Abara yi ɓei nyi awocei-aba nu.

8Avun deye Bulus wa lo aduwa Inyakun cici, woi zhin waʼazi n ikoyi wo ɓei zhin lo nu n satiwyi doho-dohoi har apya ngun-ata. Woi wu ge Yesu nu zhin Kristi. 9Amma aza ho ɓa naɓo ɓai da ɓeda nukwoyi tu Yesus tukwo. Wa fa ɓa to wa jeɓa waʼazi zhi m, ama wa ye a Kristi yi zhin n Tiranus makaranta wa zhin a waʼazi fyegyi-fyegyi. 10Wo ɓei zhin waʼazi ɓo aye ngun-aba, har aza vinya n Turki n Asiya yi ɓa wo Shekwoyi ɓeda, a Yahudiyi ɓedo, a Helleniyi yi. 11Shekwoyi wa ga Bulus iko wa zhin aɓo wo-woyi n ɓo. 12Har owo amisa wunya je, sa nu a ya kwo kpe nyasanyi wa gwo kagna. Aljanu ɓai kun na za.

13Amma a Yahudiyi a zan-zan yi ho, n ɓa zan azhi gbo-gbo ɓai kun aljanu ya, ɓa zhin tunani ge ɓa kun aljanu ya dna Yesu eye. Ɓa gna, “Ma gna fye dna Yesu eye n Bulus zhin wo waʼazi nyi fye kun.” 14Aza deye ɓei zhin Sisiva aɓi nu ngun-tnaba wohin ɓei zhin a Yahudiyi prist nu. 15Shi ɓa ɓei tumwi lonu, aljanu da wa gna, mi kpe Yesu yelo, n Bulus yi, amma nyikanu n fyei ya? 16Aljanu da wa she pui ɓa ngun-aba wa lu ɓa, ɓa sakun n nyakun ntna wando fi yi n ɓahin wuwuyi.

17Nabari ye kwa gnami fi Afisus vinya, a Yahudiyi na Helleniyi ɓawo, aza ɓa wo edna n mwa ɓa la Yesu eye tu. 18Aza n ɓa ɓei ga gaiciya nyi ɓa ɓe, ɓai da ɓa laifi duk na zoku shei.

19Ɓa ɓe nɓa azoku zhe nya yi, na laya yi, ɓa kpe ɓa ena. Atakarda azoku nya nɓa ɓo kpe na nyi oɓa gyewye ɓei ɓa sun ngye ₦3,000. 20Deye ɓo wu ge ɓa la Shekwoyi ɓedo gwo n gaiciya yi dna.

Aɓona-kpaje N Afisus

21Avun Zafun Gyi-gyi-yi wa wu Bulus ge, wo lo Akaya kafin wo lo Urushelima, wa gna dole ma lo Roma. 22Amma wa tnu Timatawus ɓedo Arastis na bye ɓa lo Akaya, amma wohin wa ce dna n Turki. Aza n wo ɓo tnu nyi ɓa ɓei zhin owo abmazhin yi nu.

23N sayi wahala kwa laka na Kristi yi n Afisus. 24Pyada ho ai yi wo Dimitiriyus wo nu ɓei la wahala ka, wa gna apyada je ge ɓa zhin ashan azurfa nya a Helleniyi shekwoyi Diyana nya. 25Wa yi apyada je wa gna, tnu-tnu nkwo nyi, yi bwa nyagyi nkwonu n agyiwyei.

26N sayi fye kpe lo ge Bulus ku aza bugba wan, har eyi ashan n yi zhin nyi, ato gye ɓalo ngye a shekwoyi nu m, ntu lonu eyi abwaze, ta gyi abye m, kwoi ta to yi nu bwa ya gmanyi m, amma du akni do yi. 27N yi to zhin nyaho n za ye yin, yi ta bwi agyiwye nu nuwan gmanyin, amma du n yi Diyana yi, okwo nu aza ga kwo mwa-mwa nyi vinya, anyi ɓa ku zamwi, fye ɓa ye lo nu?

28Shi ɓa ɓei wo lonu oɓa minagyi kwa laka, n sai-sayi ɓa ya aku fi ɓa gna, “Diyana Afisus nya zhin nya Dnagmayi nu.” 29Nsai-sayi yi aza yezhi ezhi kwa totu n sunu yi. Ɓa wan Gayus ɓedo Aristakus yi ɓa lo ɓai n kwotu, nge ada ɓa wa. Ɓa gna aza deye zhin, Bulus atnu-tnu kun-zhin-yi nu. 30Bulus ɓo ye wa lo wo gye ɓa, amma a Kristi yi n Afisus to ɓa yem. 31A Romayi dan sanda tukwoda ɓa gna Bulus ge wo to lo m, kada ɓa wu wo. A dan-sanda tukwoda ye ɓei zhin Bulus anugun-do nu.

32Aza ɓai ɓowyi fi n kwotu, ngye anyasin yi, aɓo ɓa ku gmaje har azaho ma to ɓa kpe dalili nkwo zhin ɓa lo ɓo m.

33A Yahudiyi ɓa wan Alikzanda ɓa gni wo lo cei na bye. Wa ku abwa wu n she woi ye wa da ɓo. 34Amma shi aza ɓei kpe ge wo zhin Yahudiyayi zanu ɓa gna aku fi-fi har awa n gun aba. Ɓai ci ge, “Diyana Afisus nya, ko zhin nya dnagmayi nu.”

35Ezhi sakatare wa ɓe wa gna aza ge, “fye ku ce pi, fye kpe lo ge Afisus nu zhin adini Diyana nya tukwo, okwo nu nkwo degbe ɓei kaya ɓe da yi n she, 36Mi gyi fye wye shi fye ku kpe ge ko nu zhin gaiciya n Afisus. Afisus nu zhin adini tukwo njesun ntu diye ɓo fye to gyi minagyi nɓei na da nkwo tukwo m, fye to zhin nyaho dna n pye-pye m. 37Gaiciya nu oza n fya ɓe cei nyi, wo to wyi Diyana nyahom, woi to ka kwo mwa-mwa ya m, nyaho to lo nkwo ka Diyana mwa-mwa ya m, ko cewyi.

38“Ndei Dimitiriyus nɓo yi lo n ɓai, sai wa ɓe n kala yi n kwotu, alkali ɓa zo ɓa ɓeda vinya. Amma kwo bmiya fya vi owa. 39Njesun nfye aɓo do yi lo n ɓai aɓa mi a da fi n esu bokun. 40Yi wo dna lo ntu ge a Romayi Gmamnati ɓa yi yi ɓa nya yi dalili wahal a nya. Deye to kunce lo, mi ta mi ma ga ɓa dalili m.”

41Shi wo ɓo zo da lonu, wa ku aza gnami vinya.