‏ Acts 2

Pantikos Nyipyeyi

1A mako ɓo ku sun ngu shi. Yesu ɓei fi. Pentikos nyipyei koi la wu vi a Yesu viyi ɓa yezhi. 2Sa fyewyi a wo aɓo ho ɓai ci ngye ogma jewyi, aɓo ci hi ɓa nu nyakun n ɓa ɓo fi nyi. 3Ɓa gye ena anyitala kwoi yakpe ɓa na tukwo. 4Oɓa vinya ɓa nu n Zafun Gyi-gyi-yi. Ɓai da ɓeda n na byei gbo-gbo n ɓa ta shin da m. Zafun Gyi-gyi-yi nu ɓo ga ɓa iko ye.

5A Yahudiyi yi ɓei fi n mwa n Urushelima n wyihi yi. Ntu ge ɓa la Shekwoyi tu n Urushelima mi. 6Shi aza ɓo wo kasun, ɓa kun ɓe ntu ge ɓa gye ɓo kwo nyi, Sai ɓa wo abara ɓai da ɓa bye, ceʼa wo ɓa.

7Ɓa nya ge, “Aza deye zhin a Galiliyi nu, ɓa mi n wuna ɓai da abye deyeʼa? 8Ya wo ɓai da ɓeda n byei nu aba n ya kun nyi. 9Eyi a Patiyayi Amidiyi, Alamitiyi, aza n ɓa kun n Mesopotamiya n Yahudayi, Kapadokiya, Pontus, Asiya. 10Filijiya, Pamfiliya, Masar n na abyei n ɓa she Libya gun nyi. Aza n Roma n ɓa zhin a Yahudiyi ɓedo n ɓai n ɓa zhin a Yahudiyayi alaloi nyi. 11Akaritayi ɓedo na, Larabawa yi. Ya wo ɓai da abye deye ɓai gna yi aɓo awo-woyi Shekwoyi nya.”

12Ca wo aza n kalayi. Ɓa gna, “kniyi nu wu la yiʼa?” 13Amma azaho ɓa kpe agye ɓa gna, “Ai ɓa ku nya nu sin.” 14Sai Bitrus n abara awo cei gmanyi (11) ɓa gna, “Efye vinya fye kna tnubua, Yi ye ya da ɓo n fyei, azhiɓeyi du na pi dai. 15Azaho n fye mi ku da ge, Yi ku onya nu sin. Ɓa to da gaiciyan sam. Aza ta sin nya n labmiyi la yim, wato karfe 9. 16Ɓeye kwa zhin nyi Joel Anabi ɓo ku ce da tunyi. 17Shekwoyi ɓo da ge, ‘Nna a nyipyeyi kmaknayi n ɓo ze omi Zafun Gyi-gyi-yi ya kpe aza, efye anugun n anyigun yi ɓa ɓo zhin anabci. Efye a samari ɓa ɓo gye aɓe-wyegye. Azakwoyi ɓo nu ana. 18Emi Zafun Gyi-gyi-yi, ɓa ɓe tu emi abara anugbayi n anyikwoyi tukwo, ɓa ɓo zhin anabci. 19N ɓo zhin aɓo awo-woyi n ʼshe n ʼkni yi, Aɓo gye ami nonayi ɓedo anyi, awu nya yi. 20Npyei ɓo ze zhi-zhiyi, epya ko ze ami. Kafin Dagayi nyipyei dnawo nya ko ɓe. 21Oza n wa ye sun-sungye wo ɓa bwa. Ai gni wo n jesun.’

22– 23“A Israilayi fye wo! Fye kpe la ge Shekwoyi nu ɓo zhin ama Yesu Nazaratiyi wa zhin aɓo wo-woyi n wo aba. Ama dna Shekwoyi shiri, wa fa fya zhin ampanyi na Roma yi, fya wu Yesu tu n zundu. 24Amma Shekwoyi ɓo la wo gmi n wahala har wa wo laka n vingwo. Efi to zhinwo nyaho m.

25“Esu Dawuda ɓo da Yesu ɓeda wa gna, ‘Mi kpe lo Dagayi kunsun n miyi cici, woi bma mi zhin. Iko Shekwoyi nya koi ce mi bwa. 26Ce nu zhin mi yi dagma. Omi ʼgbe nunu yi n wo ciciyi. Mi kpe lo ge ko mi yi fi milo wo aba nu. 27Ho ta fami dna ena m, Ho taye oho Nugun Gyi-gyi-yi nayi kwa buo m. 28Ho ɓoje mi wye-wyei ga Ha ga mi agmada n ho abye.’

29“Omi azaje Dawuda ta da wohin nu ɓo m. Dawuda ɓei la fi a wo bi, owo vingwo shi lo n ya ba. 30Dawuda ɓo zhin anabci Shekwoyi nya nu. Woi kpe ge oza ɓe lo n wo ɓa zhin Kristi dna nwa a yawyi. 31Wo ɓo gye nya ko ɓe lo nabye, wa da Kristi kalala ɓo evingwo. Wa gna Kristi wye-wyei ta dna e nam Kwo kwa buo m 32Wo ɓei da Yesu nu ɓo, yi zhin aseda da nu ge Yesu la laka evingwo.

33“Wo lo n gnisun n Shekwoyi, Dada n la iko gawo wa tnu n Zafun Gyi-gyi-yi, Elonu n fye gye n naiye.

34“Dawuda ta da wohin nu ɓo m. Woto shin gun lo ʼshen. Wa da ge, Shekwoyi wa da ɓo n mi Dagayi yi wato Kristi, wa gna, la sase nwu viyi nmiyi n latu aba. 35Har maze oho anuwuyi, oho apita kpe ʼba.

36“Ntu ce nu mi gna a Israilayi ge Yesu n fye ɓo wu nyi, Shekwoyi la wo ze Dagayi n Masihu yi.”

37Bitrus ɓeda ɓo ku lo aza sosai. Har ɓa gna, “eyi azaje, yi ɓa zhin wuna?”

38Bitrus wa gna, “Fye fa alaifi, fya yi Shekwoyi a zhin fye baptisma dna Kristi ye. 39Kristi ɓo ku alkawali zhin ga fye. Ofye n Shekwoyi la fye yi nyi, duk n fye aɓi yi, nge woɓa ga fye Zafun Gyi-gyiyi.”

40Bitrus ɓei zhin waʼazi Yesu nya wa gna ge ɓa ye abui ɓa vi Shekwoyi. 41Aza 3,000 ɓei ku gaiciya ga aku baptisma zhin ɓa. 42Ɓa ye ɓedo a Yesu viyi, abara ɓai wu ɓa nya, ɓai zhin zumun ta, ɓai zhin aduwa n gnisun.

43Ɓa ɓo wo edna n mwa cei wo ɓa. Abara n jesun ɓa zhin aɓo wo-woyi n mwa. 44A Yesu viyi ɓei zhin ɓai yezhi cici, ɓai gna anya n gnisun. 45Ɓa ɓo kun ɓa nyabwa, ɓa gna ngnisun, n aza yi n ɓa gyisan. 46Ɓai ga mwa-mwa nu aduwa nyakun, ɓai yezhi n aje puwa ntu zumunta ɓo. Ɓai gyi nyagyi ngnisun nagmadai. 47Ɓai ci Shekwoyi, Har ezhi vinya kwa dagma nɓai, har Shekwoyi woi ɓe ɓa begye fyegyi-fyegyi.