‏ Acts 20

1Shi aɓei ku aɓo wan zhi Bulus wa zhin waʼazi amigna nya wa kpe Akaya lo. 2Bulus ɓei zhin waʼazi lo cei na zhi yakwo woi lo Akaya. 3Wo ɓei dna Akaya har apya atnu, woi zhin shiri ge wa lo Suriya, a gna wo ge a Yahudiyi ye lo ɓa wu wo. Ntu ce nu wa lo Makidoniya.

4Sopata, Pihas nugun Biriya yi za, Aristakus n Sekundus a Tasalunikayi Gayus n wo gmi n Darba nyi. Timatawus n Tikikus yi ɓedo n Tirofimus yi aza ye vinya ɓa gni lo n Bulus yi ɓa lo Turki. 5Aza deye ɓo ku lo ɓa pmi yi zhi n Turowas. 6Shi Paska ɓo ku zo, ya lo eya n Filibi ya bwa anyi-pyei ngun atnu, ya kpe Turowas si. Ya fi ɓo har mako gmanyi.

Ɓinuyi La Kaya Woi La Fi

7N Lahadi wyi a Kristiyi ɓa ye zhi ɓa gyi Dagayi tebur. Bulus wa zhin waʼazi n mwa kpa har sadu ntu ge efye ɓa gyi wa laka. 8Ena ɓei nyi n buzangna yi dai-dai n nyakun she n yi ɓei fi nyi. 9Shi Bulus ɓo gni woi daɓo Utikus woi tu woi wan gye, wa kaya n nyakun she tahi wa fi. 10Bulus wa shin lo wa la wo shi, wa gna aza ge fye to damun wo wye-wyei lo, a da aza. 11Ɓa jeze lo ɓa gyi abye n Dagayi tebur gyi yi. Bulus wa gyi abye n ɓedai har nya knaya. N labmi yi ɓa gna aje ammi. 12Sa fyewyi ɓa ɓe n Samariyi nwye-wyei, a da aza n mwa.

13Bulus wa zan-zan wa lo Asos, ama yi da ya lo eya ya ku si nwa bye. 14Shi yi ɓo sun na jei ɓo, ya knu eya lo ya lo Mitilini. 15Shi efye ɓo gyi ya si Kos, nyipyeyi do ya si Samos ya ɓe har Melitus.

Bulus Ɓeda Amigna Nya Nafisus

16Nsa deye Bulus to ɓo ye ge wa kpe gni Afisus m, Wa lo Urushelima cewo ntu Paska ɓo. 17Shi yi ɓo si Melitus, Bulus wa tnu Afisus atukwoda ɓo, ɓa she gun yi n nuwan gbe.

18Shi ɓa ɓei ɓe wa gna ɓage, “Fye kpe lo ge tunyi nyipyei kmisunyi n mi ɓei ɓe Turki har sayi. 19Mi ku Dagayi tnu-tnu zhin ntukwo gba yi, saho ma ci bwi, mi-i sun wahala. A Yahudiyi ye cici ge ɓa wu mi.

20“Amma mi to fa fye gaiciya gna ɓo m. Mi ku gaiciya gna fye naza bye har ma dna n fye a puwa. 21Nabari gmanyi nu n mi cei ntu a Yahudiyi ɓo ɓedo abye do yi, nabari ho ko nu nyi ge aza ɓa fa laifi ɓa ɓe Shekwoyi aba. Tile zaho-zahoi wa ga Yesu gaiciya.

22“N sayi mi lo Urushelima nu, ntu ge Zafun Gyi-gyi-yi na gna mi ge mi lo. Amma mita kpe nya ye lo nkwo ɓo zhin mi ɓo m. 23Amma Zafun Gyi-gyi-yi ku gna mi ge wahala lo na bye. 24Omi wye-wyei zhin gbeloyi nu sai dai ma zhin a pma n kwoi, ma zhin tnu-tnu n Shekwoyi ga mi nyi. Emi tnu-tnu nu ge ma gna azaje Shekwoyi yeye ɓo, nwo alheri yi.

25“Mi kpe lo ge zaho-zahoi nfye mi, ta je mi wye gye m. 26Gaiciya nu n mi da zaho-zahoi ami ta tu n min.

27“Ntu ge mi to so Shekwoyi ɓeda m, mi-i ku kwo gna zaho-zahoyi. 28Suku-suku, fye kpa akni Shekwoyi nya wato owo ikklisiya nwa si n wo ami yi nyi, Zafun Gyi-gyi-yi na kni fye fya ze aɓo wyednayi. 29Mi kpe lo ge shi mi fa fye a malami a nukwoyi ɓa gna fye gna-gna, ɓa zhin a cam-cam nu. 30Azaho ma nfye mi ɓa ɓa shan gaiciya do, ntu ge ɓa gni aza ga ɓahin. 31Fye dnawye fya pa ngye shi ma gye ma nuwan n fyei esa nu ma sase n fya ba, har aye ngun ata. Saho ma cibwi ntu fye ɓo. 32N sayi ma fa fye n Shekwoyi akun n wo ɓeda yi, n kwo iko yi kwa mi fye gaiciya ga, wa ga fye gado anabarka nwo cei zhin shiri a owo aza nyi. 33Mi to shin agyiwye san gyi ko aje manayi m.

34“Fye kpe lo n gye shi ma zhin tnu-tnu n ma bwai, ntu mi bukata ɓo ɓedo n ma tnu-tnu kun-zhin-yi yi. 35Mi la ze gurbi nfye aba ntu ge ma ku bma awyekwoi zhin. Ma zhin lonu ntu ge mi pa Yesu Kristi ɓeda ɓo n wa da ge, ‘Nyaga du gwo-gwo n anabarka.’ ” 36Shi wo ɓei ku ɓeda zo wa ca-kwo-kwo wa zhin aduwa n ɓai. 37Ɓa cibwi n kala yi ɓa gna je ami. 38Ɓa ɓo zhin bugba zhi-zhiyi, ntu ge wo ɓei gna ge ɓa ta je wo wye gye m. Ɓa kun lo n woi har eya aba.