‏ Acts 7

1Pirist dnagmayi wa nya wo ge, “Aɓe ye wu lo nu.” 2Istifanus wa gna ge, “Shekwoyi ɓei wu wohin tukwo eyi dada Ibrahim aba n Irak kafin wo lo Suriya. 3Shekwoyi ɓei gna wo ge wo fa ʼkni, n wo azayi wa lo aba n wo ɓa wu wo. 4Wa fa Kaldiya ʼkni wa lo Haran. Wa sase ɓo har owo dada wa fi, Shekwoyi wa gna ge wo lo Israila kni. 5Shekwoyi to ɓo sa ekni gawo m, amma wo ɓei zhin wo Alkawali ekniyi nya vinya. Alkawali ye ɓo nu peceiye nu.

6“Shekwoyi ɓo gna wo ge owo ayawyi ɓo fa ekniye ɓo zhin bauta ekni do har aye 400. 7Amma Shekwoyi alkawali nu ge, wo ɓei kun ɓa n bauta. Wa ta ekni n kwa fi ɓa n bauta nyi.

8“N sahi nu n Shekwoyi ɓo gna Ibrahim wa zhin kachiya. Deye zhin tuze nu Shekwoyi alkawali nya. A zhin Ishaku kaciya woi na anyipyei nymwa-nyimwa. Ishaku wa ma Yakub, Yakub wa ma eyi azakwoi awo-cei-aba a Yahudiyi bye. 9Aza deye ɓa wo she n Yusufu yi, ɓa wo kun 10wa ze fyenu dna n Masar ʼkni. Amma Shekwoyi ɓei kunsun nwoi, wa gni wo nwo awahala vinya, wa zhin Firʼauna Sa-Masar yi wa ye wo. Shekwoyi wa ga Yusufu ɓeyekpe, kwa zhin Firʼauna wa gwamna ga wo n Masarʼkni, wa wo ze tukwoda n garukwo.

11“Sa fyewyi mikun laka n Kanʼana. Eyi adada to ɓa bwa nyagyi m. 12Shi Yakub ɓo wo ge nyagyi lo n Masar, wa tnu n wo aɓi ɓa lo ɓa si. 13Ba je bwa ɓayi lo, Yusufu wa wu ɓa wohin tukwo. A lo n ɓai n Firʼauna ba. 14Sai Yusuf il wa tnu wo dada ɓo ɓedo n wo azaje yi, oɓa vinya ɓa ɓei nyi 70 nu. 15Yakub wa ɓe Masar, nɓonu n wo ɓo fi n wo anugun yi. 16A ɓei la ɓa ku lo n cei n Kanʼana kni, a bi ɓa n Sakar kni n Ibrahim ɓo si nyi.

17– 18“A Yahudiyi ɓa ku mwa begye, Esa wo vi n Shekwoyi ɓa gni ba. Amma esu ho wa gyi be. To wa gye wo anuwan n Yusufu ajeyin. 19Esuhi wa gaɓa wahala, wa tu dole ɓa wu ɓa aɓi.

20“Nsayi nu aɓo ma Musa, amma shi owo azamayi ɓei gye wo zhin oɓi manayi nu ɓa wo so har apya ngun-ata. 21Shi ɓa ɓo gye ɓa tami nwo som, dole ɓa ya wo. Har Firʼauna nyigun wa wo bwa, wa wo ze owo nugun. 22Wa wu wo ɓeyekpe a Masar nya. Har Musa wa ze oza dnagmayi.

23“Musa woi na ayei 40, wa ɓe owo azaje aba. 24Shi wo ɓo lo wa gye Masar ʼza woi ga Israila za wahala, wa Masar yi za wu. 25Musa wagye ge owo azaje ɓa gye ge Shekwoyi na tnu woi, ntu ge wa bma ɓa zhin. Amma ɓa to ɓei gye lo nun.

26“Nwyihoi wa lo wa gye a Israilayi ɓai sungu ɓahin-ɓahin, wa gna kni ɓa wa gna, ‘kwo to bmiya lo fya sungu fyehin-fyehin m.’

27“Ama ɓa nya wo ge, ‘nka dna ho alkali n yi tukwa? Ngye ha nuwan n yi. 28Ho ye ha wu mi nu, n gye shi ho wui Masar yi ʼza nsu nyi.’

29“Shi Musa ɓo wa lonu wa busi wa lo Midiya kni. Har wa ku aɓi bwa n ɓo ngun-aba.

30“Shi wo ɓo bwa aye shinyi ɓo, Malaika ɓe wo aba nfwa. Wa gye ena anyitala n wu vivi n Sinai pei. 31She wo ɓo gye ceʼa wo wo n mwa, wa lo ntu ge wo gye. Wa wo begye kwoi yi wo. 32Omi nu zhin Shekwoyi oha dada Ibrahim, Ishaku, n Yakubu yi nya.” Musa wo dna wa ku awye bwi.

33“Dagayi wa gna wo ge, ‘La ho abuada kun, ntu ge ho gni aba gyi-gyiyi nu. 34Mi ku omi aza bwi ci wo n Masar, Mi ye ma kunɓa n wahala. Ɓe ma tnu ho ha lo Masar.’ 35Oza nɓa ɓo na wo aɓo nsapa ɓai gna nyikanu na ze ho begyi-i nwadayi n yi tukwoa? Shekwoyi wa je tnu nwoi nu. A ɓei tnu n Musa yi nu wa zhin ɓa tukwoda wa gni ɓa. 36Musa ɓei ku aɓo wo-woyi zhin n Masar kafin wo kun ɓa. Ɓa pi ela byei-byei ya, ɓa zan-zan n zhabui ɓai jeze kpe har aye shinyi (40).

37“Musa ɓei gna aza ge, ʼShekwoyi ɓei ga fye anabi nwu gye mi n fye mi. 38Deye gaiciya nu, gama Musa nu ɓei dna aza tasin n Malaika yi n wo ɓei gaɓa Shekwoyi awyidna n zhabui nyi.

39“Amma eya dada ɓo la Musa aɓo na, har ma ɓai ye ge ɓa jeze lo Masar. 40Ba gna Haruna ge wo zhin ɓa eshan, n kwo ɓa je lo n ɓai n Masar, gama ɓa ta kpe nya lo n kwo ku zhin Musa, n wa kun ɓa n Masar nyi m. 41Sai ɓa zhin nakwo ɓiyi, ɓa ga kwo sadaka aminya ɓa dagma.

42“Shekwoyi kwa wa fa ɓa, har ɓa ga npyei, epya, ɓedo n akpasuyi mwa-mwa. Shekwoyi wa nya Israilayi n Amos gbe ge, Fye ɓo ga mi nu sadaka ami nya sa fye ɓei zan-zan anye shinyi n zhabui nyi? 43Awo, of ye bugba ɓei shi na ashekwoyi do aba nu. Ngye sakut n kaiwe yi. Ntuce nu nɓa tnu nfyei n bauta ndu Babila ya.

44“Eyi adada ɓei aduwa zhin ba yi shi, ɓa ɓei allo yi shi, n Shekwoyi awyidna yi ka kpe. A ɓei zhin ɓa nwu dai-dai nu ngye shi malaika ɓai wu Musa. 45Aye mwa begye avun Joshua wa sun okun n abye do yi, Ɓa aduwa zhin ɓa la ɓe n cei. Ɓa zhin ampanyi nkwoi har Esu Dawuda sa.

46“Shekwoyi ɓei la Dawuda tu anabarka, har Dawuda wa ye ntu ge wa mi nyakun ntu Shekwoyi ɓo. 47Amma Solomon nu ɓei mi nyakun yi. 48– 49Amma Shekwoyi ta dna aduwa nyakun, n na mi n abwayi m. ‘Eshe nu zhin mi asese ba. Ekni kwa zhin mi apita kpe ba.’ Nya nu n Dagayi wa da. Kni nyakun yi pya nu n ho ɓa mi, n mi ɓa mi ma dna koʼa? 50Omi nu to zhin Eshe n kni yi m?

51“Efye aza bugba kala kpe yi! Fye ɓa gyi abye fyei na Zafun Gyi-gyi-yi aɓo? Efye adada ɓo ku zhin, ekonu nfye zhin nfye hin. 52Ɓa ɓei ga anabi wahala, har ɓai wu anabi n ɓa da ge Masihu ɓelo nyi, Owo n fya ga a wu wo nyi. 53I, efyehin fya Shekwoyi awyidna wunya ko shi ko nyi fya gwo ɓa n a malaika akun.”

Ala Istifanus Wu Nna Kuta Yi

54A Yahudiyi atukwoda ɓa gyi minagyi n Istifanus yi. 55Amma Istifanus ɓei nunuyi n Zafun yi, wa shi awye ʼshe wa gye Shekwoyi mwa-mwa wye. Har n Yesu yi gni agni-gni n Shekwoyi bwai-zhe bwa. 56Wa gna, “Migye eshe lo nguya gni n Yesu yi gni a gni-gni n Shekwoyi bwai-zhe bwa.”

57Ɓa tabwa shi wo ɓai gu ɓa atnubua, ɓai ɓewyi ntuge wa cepi. 58Ɓa gni wo ɓa gmiwoya n zhi mi ntu ge ɓa kni wo akuta. Ɓa oɓa aje kmaya zhi Samari ho ai yi wo ge Bulus, woi dna Ɓa ajeyi wye.

59Shi ɓa ɓo kni wo akuta Istifanus wa zhin aduwa wa gna Dagayi Yesu gwo mi wye-wyeyi. 60Wa ce akwo-kwo wa da ɓo n kala yi wa gna, “Dagayi zhin ɓa gafara,” wa fi wo nya.