‏ John 21

Labmi Nyagyi N Wyisakayi

1Nwyihoi Yesu wa je wohin tukwo wu nwo abara aba, ɓai zhi n nuwan zundna Galili nya ʼgbe.

2Aza nyi nɓa ɓei gni zhi ɓo, Siman Bitrus, n Toma yi nna yi wo ge aza ʼba nyi, n Natanailu yi n wo gmi n Kana Galili nya nyi, n Zabadi anugun yi, ɓedo abara dohoi ngun-aba.

3Siman Bitrus wa gna ɓa ge, “m ɓa lo abmiya wan.” Bahin ɓa gna ge, “Yi ɓa gni lo nhoi.” Ɓa kuka ɓa lo, ɓa lo fi n eya, sukwohi vinya to ɓa wan nyahom. 4Nfyegyibwayi ɓa gye ozaho tu n kmahi ama to ɓa kpe za ye n wo tum, ashe Yesu nu.

5Wa yi ɓa, “Omi anugundo fye ku abmiya wan?” Ɓa ci ge “awo.”

6Wa gna ɓa ge, “fye she osa ya fi n eya bwaizhebwa, fye ɓa wan abmiya.” Shi ɓa ɓo she osa ya fi, ɓa wan abmiya n mwa har to ɓa shin esa gnim, ntu abmiya shanwo ɓo.

7Bara n Yesu ye wo nyi wa gna Bitrus ge ai Dagayi nu gni! Shi wo ɓo wo ge Dagayi nu gni, wakpe wo je wolo-wolo wa she nuwan wa lo dawo nkma. 8Abara je ɓa ku ce fi n eya, ɓai gni osa ɓe cei nna bmiyai nu, ntu ge ɓa to ɓo mwakpa n kmayim, kwo ɓo bwa ce ngye yadi tagyi nu. 9She a ɓo wankma ɓa gye ena fin zhi n na bmiyai kpe ɓedo n bredi yi.

10Yesu wa gna ɓa ge, “fye ɓe nna bmiyai nfya wan nsayi ye nyi.” 11Sai Siman Bitrus wa lo dna ʼya, wa gni osa ɓe cei nkma. Abmiya adnagmayi ɓo nyi tagyi-cei-shitnu Icei-ata, ama osa to ɓo gbeya m.

12Yesu wa gna ɓa ge, “Fye ɓe fya gyi nyagyi labmi nya.” To zaho-zahoi nwo abara wa nya wo ɓo ge, “Nyikado nu gni nhoi a?” Ntu ge ɓa ɓo ku kpe ge Dagayi nu gni. 13Wa la bredi wa gna ɓa, wa je zhin lo nu n na bmiya yi. 14Shi wo ɓo laka n vingwo, bwa tahi nu ɓo nu, woi wu wohin tukwo nwo abara aba.

15Shi ɓa ɓo ku nyagyi gyi, Yesu wa nya Siman Bitrus ge, “Siman Yohanna nugun, ho ye mi lo ndu aza deye?” Wa gna, “E Dagayi ho kpe lo ge mi ye ho lo.” Yesu wa ciwo ge, “kpa oma kni.”

16Yesu wa je wo ɓo nya, “Siman Yohanna nugun ho ku mi ye lo ɓehin-hin nya?” Wa ye wa ci ge, “E, Dagayi ho kpe lo ge mi ye ho.” Yesu wa gna wo ge “kpa oma kni.”

17Waje wo bwa tahi nya ge, “Siman Yohanna nugun ho ye mi?” Bitrus bugba kwa wun ya ntu ge Yesu ɓo je wo ɓo bwa tahi nya ge, “Ho ye mi lo?” Wa ci ge “Dagayi ho kpe a ɓo ye lo vinya. Ho kpe lo ge mi ye ho lo. Yesu wa ci wo ge, kpa oma kni.” 18Esa nu ho ɓei zhin ɓinawyi, ho ɓei zhin ha mi ha zhin ɓo nho ɓa zhin, ha lo aba n ho ye ha lo; ama esa nu ho ɓo kwo, ho ɓo tabwa ga za wa wu ho zokwo, aɓo lo n hoi aba nho ta yem. 19Yesu ɓo gna wo deye nnabai wa wu wo efi pya nwo ɓo fi, kwo la Shekwoyi tu. Yesu wa gna wo ge, “vi mi.”

20Bitrus wa bmiya-wye, wa gye bara n Yesu ye cei nyi woi ɓe, barahi nwo ɓo kpema n Yesu agu esa wo kma nyagyi gyi nwo abarai nyi, nwo ɓo nya Yesu ɓo ge, “nyikanu ye wa kun ho a?” 21Shi Bitrus ɓo gye wo, wa nya Yesu ge, “Dagayi oza deye mwa?”

22Yesu wa gna wo ge, “N ma ye wa gni n wye-wyeyi har ma jeze ɓe, oho anuwan lo? Hohin dai vi mi.”

23Ɓedahi kwa gnami laɓa ge, gye Yesu wa gna ge, barahi ta fi m. Ama Yesu to ɓo da lo nu ge wo ta fim. Sai ge, “ndei ma ye ge wa gni n wye-wyeyi har ma ɓe.”

24Baraye, owo nu ɓo ku gye aɓeye owo na ka ɓa. Yi kpe lo ge owo saida zhin gaiciya nu.

25Aɓo do lo n mwa n Yesu ɓo zhin, N na gna aka ɓeho-ɓehoi vinya, mi gye kwo anyi ta bwa aba nna ɓa ya a takardai zhi m.