Judg 8 | Geez | STEP | ወይቤልዎ ፡ ሰብአ ፡ ኤፍሬም ፡ ምንት ፡ ዝንቱ ፡ ነገር ፡ ዘገበርከ ፡ ላዕሌነ ፡ ከመ ፡ ኢትጸውዐነ ፡ አመ ፡ ሖርከ ፡ ትትቃተሎሙ ፡ ለምድያም ፡ ወተሳነኑ ፡ ምስሌሁ ፡ ዐቢየ ፡ ተስናነ ።

‏ Judges 8

1 ወይቤልዎ ፡ ሰብአ ፡ ኤፍሬም ፡ ምንት ፡ ዝንቱ ፡ ነገር ፡ ዘገበርከ ፡ ላዕሌነ ፡ ከመ ፡ ኢትጸውዐነ ፡ አመ ፡ ሖርከ ፡ ትትቃተሎሙ ፡ ለምድያም ፡ ወተሳነኑ ፡ ምስሌሁ ፡ ዐቢየ ፡ ተስናነ ። 2 ወይቤሎሙ ፡ ምንተ ፡ ገበርኩ ፡ ይእዜ ፡ ከመ ፡ ዘአንትሙ ፡ [ኢ]ትኄይ[ስ]ኒ ፡ ቈጽለ ፡ ኤፍሬም ፡ [እም]ቀሥመ ፡ አቢየዜር ። 3 [አኮኑ ፡] ውስተ ፡ እዴክሙ ፡ አግብኦሙ ፡ እግዚአብሔር ፡ ለመላእክተ ፡ ምድያም ፡ ሄሬብ ፡ ወዜብ ፡ ወምንተ ፡ ክህልኩ ፡ ገቢረ ፡ ከማክሙ ፤ ወእምዝ ፡ ኀደግዎ ፡ እንከ ፡ ወአእረፈት ፡ ነፍሶሙ ፡ እምኔሁ ፡ ሶበ ፡ ይቤሎሙ ፡ ዘንተ ፡ ቃለ ። 4 ወመጽአ ፡ ጌድዮን ፡ ኀበ ፡ ዮርዳንስ ፡ ወዐደወ ፡ ውእቱ ፡ ወክልኤቱ ፡ ምእት ፡ ብእሲ ፡ እለ ፡ ምስሌሁ ፡ ወዐንበዙ ፡ ሶበ ፡ ርኅቡ ። 5 ወይቤሎሙ ፡ ለሰብአ ፡ ሶኮት ፡ ሀብዎሙ ፡ እክለ ፡ ለሕዝብ ፡ እለ ፡ ምስሌየ ፡ እስመ ፡ ርኅቡ ፡ ወአንሰ ፡ እተልዎሙ ፡ ለዜቤሔ ፡ ወለሴልማና ፡ ነገሥተ ፡ ምድያም ። 6 ወይቤልዎ ፡ መላእክተ ፡ ሶኮት ፡ ቦኑ ፡ እዴሆሙ ፡ ለዜቤሔ ፡ ወለሴልማና ፡ ይእዜ ፡ ውስተ ፡ እዴከ ፡ ከመ ፡ ነሀቦሙ ፡ እክለ ፡ ለሰራዊትከ ። 7 ወይቤሎሙ ፡ ጌድዮን ፡ አኮ ፡ ከመዝ ፡ እምከመ ፡ አግብኦሙ ፡ እግዚአብሔር ፡ ለዜቤሔ ፡ ወለሴልማና ፡ ውስተ ፡ እዴየ ፡ እሰቅል ፡ ሥጋክሙ ፡ ውስተ ፡ ዐቀባት ፡ ዘገዳም ፡ ወውስተ ፡ ክልኤ ፡ አርቆሚን ። 8 ወዐርገ ፡ እምህየ ፡ ውስተ ፡ ፋኑሔል ፡ [ወይቤሎሙ ፡ ከመዝ ፡ ወይቤልዎ ፡] በከመ ፡ ይቤልዎ ፡ ሰብአ ፡ ሶኮት ። 9 ወይቤሎሙ ፡ ለሰብአ ፡ ፋኑሔል ፡ ሶበ ፡ ገባእኩ ፡ በዳኅን ፡ እነሥቶ ፡ ለዝንቱ ፡ ማኅፈድ ። 10 ወዜቤሔሰ ፡ ወሴልማና ፡ ውስተ ፡ ቀርቀር ፡ ወትዕይንቶሙ ፡ ምስሌሆሙ ፡ ወየአክሉ ፡ እልፈ ፡ ወኀምሳ ፡ ምእተ ፡ ኵሎሙ ፡ እለ ፡ ተርፉ ፡ እምነ ፡ ኵሉ ፡ ተዓይኒሆሙ ፡ ለደቂቀ ፡ ጽባሕ ፡ ወእለሰ ፡ ወድቁ ፡ ዐሠርቱ ፡ እልፍ ፡ ወዕሥራ ፡ ምእት ፡ ብእሲ ፡ እለ ፡ ይጸውሩ ፡ ኵናተ ። 11 ወዐርገ ፡ ጌድዮን ፡ ፍኖተ ፡ እለ ፡ ይነብሩ ፡ ውስተ ፡ አዕጻዳት ፡ ጽባሓውያን ፡ እለ ፡ መንገለ ፡ ናቤት ፡ ላዕለ ፡ ዜቤሔ ፡ ወቀተለ ፡ ትዕይንቶሙ ፡ እንዘ ፡ ይትአመኑ ። 12 ወጐዩ ፡ ዜቤሔ ፡ ወሴልማና ፡ ወዴገኖሙ ፡ ወተለዎሙ ፡ ወአሐዞሙ ፡ ለክልኤሆሙ ፡ ነገሥተ ፡ ምድያም ፡ ለዜቤሔ ፡ ወለሴልማና ፡ ወለኵሉ ፡ ትዕይንቶሙ ፡ ቀጥቀጦሙ ፡ ጌድዮን ። 13 ወተመይጠ ፡ ጌድዮን ፡ ወልደ ፡ ዮአስ ፡ እምነ ፡ ፀብእ ፡ እምነ ፡ ዐቀበ ፡ አሬስ ። 14 ወአኀዙ ፡ አሐደ ፡ ወልደ ፡ እምነ ፡ ሰብአ ፡ ሶኮት ፡ ወሐተቶ ፡ ወአጽሐፎሙ ፡ [ለ]መላእክተ ፡ ሶከት ፡ ወሊቃናቲሃ ፡ ሰብዓ ፡ ወሰብዐቱ ፡ ብእሲ ። 15 ወበጽሐ ፡ [ኀበ ፡ መላእክተ ፡] ሶኮት ፡ ወይቤሎሙ ፡ ነዮሙ ፡ ዜቤሔ ፡ ወሴልማና ፡ በአለ ፡ ቦሙ ፡ ተዐየርክሙ ፡ ወትቤሉኒ ፡ ቦኑ ፡ እዴሆሙ ፡ ለዜቤሔ ፡ ወለሴልማና ፡ ይእዜ ፡ ውስተ ፡ እዴከ ፡ ከመ ፡ ነሀቦሙ ፡ እክለ ፡ ለእለ ፡ ርኅቡ ፡ ሰብእከ ። 16 ወነሥኦሙ ፡ ለሰብአ ፡ ሶኮት ፡ ለሊቃናቲሆሙ ፡ ወለመላእክቲሆሙ ፡ ወሰቀሎሙ ፡ ውስተ ፡ ዐቀባተ ፡ ገዳም ፡ ወውስተ ፡ በራቄኒም ፡ ወሰቀሎሙ ፡ ምስሌሆሙ ፡ ለሰብአ ፡ ሶኮት ። 17 ወነሠቶ ፡ ለማኅፈደ ፡ ፋኑሔል ፡ ወቀተሎሙ ፡ ለሰብአ ፡ ፋኑሔል ፡ ወለሀገሮሙ ። 18 ወይቤሎሙ ፡ ለዜቤሔ ፡ ወለሴልማና ፡ አይቴ ፡ ዕደው ፡ እለ ፡ ቀተልክሙ ፡ በታቦር ፡ ወይቤልዎ ፡ ከማከ ፡ እሙንቱ ፡ ወኪያከ ፡ ይመስሉ ፡ እሙንቱ ፡ ወከመ ፡ ርእየተ ፡ ገጸ ፡ ደቀ ፡ ነገሥት ። 19 ወይቤሎሙ ፡ ጌድዮን ፡ አኀዊየ ፡ እሙንቱ ፡ ወደቂቀ ፡ እምየ ፡ ወመሐለ ፡ ሎሙ ፡ ወይቤሎሙ ፡ ሕያው ፡ እግዚአብሔር ፡ ሶበ ፡ አሕየውክምዎሙ ፡ ከመ ፡ እምኢቀተልኩክሙ ። 20 ወይቤሎ ፡ ለዮቶር ፡ በኵሩ ፡ ተንሥእ ፡ ቅትሎሙ ፡ ወኢመልሐ ፡ መጥባሕቶ ፡ ውእቱ ፡ ሕፃን ፡ እስመ ፡ ንዑስ ፡ ውእቱ ፡ ወፈርሀ ። 21 ወይቤልዎ ፡ ዜቤሔ ፡ ወሴልማና ፡ ተንሥእ ፡ አንተ ፡ ወተራከበነ ፡ እስመ ፡ ከመ ፡ ብእሲ ፡ ውእቱ ፡ ኀይልከ ፡ ወተንሥአ ፡ ጌድዮን ፡ ወቀተሎሙ ፡ ለዜቤሔ ፡ ወለሴልማና ፡ ወነሥአ ፡ ባዝግናተ ፡ ዘውስተ ፡ ክሳዳተ ፡ አግማላቲሆሙ ። 22 ወይቤልዎ ፡ ሰብአ ፡ እስራኤል ፡ ለጌድዮን ፡ ተመልአክ ፡ ለነ ፡ አንተ ፡ ወደቂቅከ ፡ እስመ ፡ አድኀንከነ ፡ እምነ ፡ እደ ፡ ምድያም ። 23 ወይቤሎሙ ፡ ጌድዮን ፡ ኢይመልክ ፡ አንሰ ፡ ለክሙ ፡ ወወልድየኒ ፡ ኢይመልክ ፡ ለክሙ ፤ እግዚአብሔር ፡ ይመልክ ፡ ለክሙ ። 24 ወይቤሎሙ ፡ ጌድዮን ፡ እስእል ፡ እምኔክሙ ፡ ስእለተ ፡ ወሀቡኒ ፡ ብእሲ ፡ ብእሲ ፡ አዕኑገ ፡ [ዘወርቅ ፡] ዘሰለበ ፡ እስመ ፡ ብዙኀ ፡ አዕኑገ ፡ ቦሙ ፡ እስመ ፡ እስማዔላውያን ፡ እሙንቱ ። 25 ወይቤሉ ፡ ውሂበ ፡ ንሁብ ፡ ወሰፍሐ ፡ ልብሶ ፡ ወገደፉ ፡ ብእሲ ፡ ብእሲ ፡ አዕኑገ ፡ ዘሰለቡ ። 26 ወኮነ ፡ ድልወተ ፡ ወርቀ ፡ አዕኑጊሁ ፡ ዘሰአሎሙ ፡ ዐሠርተ ፡ ወትስዐተ ፡ ምእተ ፡ በሰቅል ፡ ወርቁ ፡ እንበለ ፡ አውጻባት ፡ ወባዝግናት ፡ ዘኤፎት ፡ ወመዋጥሕ ፡ ዘሜላት ፡ ዘላዕለ ፡ ነገሥተ ፡ ምድያም ፡ ወእንበለ ፡ ሐብላተ ፡ ወርቅ ፡ ዘውስተ ፡ ክሳዳተ ፡ አግማላቲሆሙ ። 27 ወገብረ ፡ ሎቱ ፡ ጌድዮን ፡ ምስለ ፡ ወአቀሞ ፡ ውስተ ፡ ሀገሩ ፡ ውስተ ፡ ኤፍሬም ፡ ወዘመው ፡ ቦቱ ፡ ኵሉ ፡ እስራኤል ፡ ወተለውዎ ፡ በህየ ፡ ወኮኖ ፡ ጌጋየ ፡ ለጌድዮን ፡ ወለቤቱ ። 28 ወተ[ትሕ]ቱ ፡ ምድያም ፡ ቅድሜሆሙ ፡ ለእስራኤል ፡ ወኢደገሙ ፡ እንከ ፡ አልዕሎ ፡ ርእሶሙ ፡ ወአእረፈት ፡ ምድር ፡ ፵ዓመ ፡ በመዋዕለ ፡ ጌድዮን ። 29 ወሖረ ፡ ኢየሮቦዓም ፡ ወልደ ፡ ዮአስ ፡ ወነበረ ፡ ውስተ ፡ ቤቱ ። 30 ወቦ ፡ ጌድዮን ፡ ሰብዓ ፡ ደቂቀ ፡ እለ ፡ የሐውሩ ፡ በገቦሁ ፡ እስመ ፡ ብዙኃት ፡ አንስትያሁ ። 31 ወዕቅብቱ ፡ በውስተ ፡ ሲቂምስ ፡ ወለደት ፡ ሎቱ ፡ ወልደ ፡ ወሰመዮ ፡ ስሞ ፡ አቢሜሌክ ። 32 ወሞተ ፡ ጌድዮን ፡ ወልደ ፡ ዮአስ ፡ በሀገር ፡ ሠኔት ፡ ወተቀብረ ፡ ውስተ ፡ መቃብረ ፡ አቡሁ ፡ ዮአስ ፡ በኤፍራታ ፡ አቢየዝሪ ። 33 ወእምዝ ፡ ሶበ ፡ ሞተ ፡ ጌድዮን ፡ ወተመይጡ ፡ ደቂቀ ፡ እስራኤል ፡ ወተለው ፡ በዓልም ፡ ወተካየዱ ፡ ምስሌሁ ፡ ለበዓል ፡ ከመ ፡ ይኩኖሙ ፡ አምላኮሙ ። 34 ወኢተዘከርዎ ፡ ደቂቀ ፡ እስራኤል ፡ ለእግዚአብሔር ፡ አምላኮሙ ፡ ዘአድኀኖሙ ፡ እምእደ ፡ ኵሉ ፡ ፀሮሙ ፡ እለ ፡ ዐውዶሙ ። 35 ወኢገብሩ ፡ ምሕረተ ፡ ምስለ ፡ ቤተ ፡ ኢየሮበዓም ፡ ዘውእቱ ፡ ጌድዮን ፡ በኵሉ ፡ ሠናይት ፡ እንተ ፡ ገብረ ፡ ምስለ ፡ እስራኤል ።