‏ Psalms 83

ፍጻሜ ፡ ዘበእንተ ፡ ማኅበብት ፤ ዘደቂቀ ፡ ቆሬ ፡
መዝሙር ።
1ጥቅ ፡ ፍቁር ፡ አብያቲከ ፡ እግዚአ ፡ ኀያላን ።
ተፈሥሐት ፡ ነፍስየ ፡ በአፍቅሮ ፡ አዕጻዲከ ፡ እግዚኦ ።
2ልብየኒ ፡ ወሥጋየኒ ፡ ተፈሥሐ ፡ በእግዚአብሔር ፡ ሕያው ።
3ዖፍኒ ፡ ረከበት ፡ ላቲ ፡ ቤተ ፡
ወማዕነቅኒ ፡ ኀበ ፡ ታነብር ፡ እጐሊሃ ፤
4ምሥዋዒከ ፡ እግዚአ ፡ ኀያላን ፡ ንጉሥየኒ ፡ ወአምላኪየኒ ።
5ብፁዓን ፡ ኵሎሙ ፡ እለ ፡ ይነብሩ ፡ ውስተ ፡ ቤትከ ፤
ወለዓለመ ፡ ዓለም ፡ ይሴብሑከ ።
6ብፁዕ ፡ ብእሲ ፡ ዘእምኀቤከ ፡ ረድኤቱ ፡ እግዚኦ ፤
ወዘይሔሊ ፡ በልቡ ፡ ዘበላዕሉ ።
ውስተ ፡ ቈላተ ፡ ብካይ ፡ ብሔር ፡ ኀበ ፡ ሠራዕኮሙ ፤
7እስመ ፡ መምህረ ፡ ሕግ ፡ ይሁብ ፡ በረከተ ።
ወይሐውር ፡ እምኀይል ፡ ውስተ ፡ ኀይል ፤
ወያስተርኢ ፡ አምላከ ፡ አማልክት ፡ በጽዮን ።
8እግዚኦ ፡ አምላከ ፡ ኀያላን ፡ ስምዐኒ ፡ ጸሎትየ ፤
ወአፅምአኒ ፡ አምላኩ ፡ ለያዕቆብ ።
9ወርእየኒ ፡ እግዚኦ ፡ ተአምኖትየ ፤
ወነጽር ፡ ኀበ ፡ ገጸ ፡ መሲሕከ ።
10እስመ ፡ ትኄይስ ፡ አሐቲ ፡ ዕለት ፡ ውስተ ፡ አዕጻዲከ ፡ እምአእላፍ ፤
11አብደርኩ ፡ እትገደፍ ፡ ውስተ ፡ በተ ፡ እግዚአብሔር ፡
እምእንበር ፡ ውስተ ፡ ቤተ ፡ ኃጥኣን ።
12እስመ ፡ ጽድቀ ፡ ወምጽዋተ ፡ ያበድር ፡ እግዚአብሔር ፤
እግዚአብሔር ፡ ይሁብ ፡ ክብረ ፡ ወሞገሰ ፤
13እግዚአብሔር ፡ ኢያስተጼንሶሙ ፡ እምበረከቱ ፡ ለእለ ፡ ይሐውሩ ፡ በየዋሃት ።
እግዚኦ ፡ አምላከ ፡ ኀያለን ፤
ብፁዕ ፡ ብእሲ ፡ ዘተወከለ ፡ ኪያከ ።