1Jo 5 | HMO | STEP | Tau ta, bema ia hamomokania Iesu be Keriso, unai tau be Dirava ena natuna ta. Bema tau ta ese tamana ta ia lalokau henia, ia ese unai tamana ena natuna do ia lalokau henia danu.

‏ 1 John 5

Tanobada dekena amo do ita kwalimu

1 Tau ta, bema ia hamomokania Iesu be Keriso, unai tau be Dirava ena natuna ta. Bema tau ta ese tamana ta ia lalokau henia, ia ese unai tamana ena natuna do ia lalokau henia danu. 2 Vadaeni, bema Dirava ita lalokau henia, bona iena taravatu ita badinaia neganai, ita diba momokani ita ese Dirava ena natuna taudia ita lalokau henia noho danu. 3 Badina be Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.

4 Badina be Dirava ena natuna ibounai ese tanobada dekena amo idia kwalimu diba. Ita ese Dirava ita abidadama henia noho, bona inai abidadama dekena amo tanobada ena kara ita halusia noho. 5 Daika ese tanobada ena kara dekena amo do ia kwalimu diba? Tau ta ia hamomokania, Iesu be Dirava ena Natuna, unai tau sibona ese.

Dirava ese iena Natuna ia gwauraia hedinarai

6 Iesu Keriso be iena bapatiso ena ranu dekena amo, bona iena rarana dekena amo ia mai, unai be iena mase satauro dekenai ena rarana. Ia mai be, ranu sibona dekena amo lasi, to ranu bona rara danu dekena amo ia hedinarai mai. Lauma Helaga ese ia gwauraia hedinarai inai be momokani, bona Lauma Helaga be momokani vadaeni. 7 Hereva momokani ena uitnesi be toi: 8 Lauma Helaga, ranu, bona rara danu. Inai toi edia uitnesi hereva be tamona. 9 Taunimanima edia uitnesi hereva ita hamomokania noho. To Dirava ena uitnesi hereva ese taunimanima edia uitnesi hereva ia hereaia momokani. Bona Dirava ese iena Natuna ia gwauraia hedinarai vadaeni. 10 Unai dainai Dirava ena Natuna ia hamomokania noho tauna ese unai Dirava ena uitnesi hereva ia dogoatao noho, iena kudouna lalonai. To Dirava ena hereva ia hamomokania lasi tauna ese Dirava ia gwauraia be koikoi tauna. Badina be inai: Dirava ena hereva momokani iena Natuna totona be unai tau ese ia hamomokania lasi dainai. 11 Unai hereva momokani be inai: Dirava ese mauri hanaihanai ita dekenai ia henia vadaeni, bona inai mauri be iena Natuna dekena amo ita davaria diba.

12 Dirava ena Natuna ia abia vadaeni tauna ese mauri ia abia. To Dirava ena Natuna ia abia lasi tauna ese mauri ia abia lasi.

Mauri hanaihanai

13 Inai revareva umui dekenai lau torea badina be inai: Do umui diba mauri hanaihanai umui abia vadaeni, Dirava ena Natuna umui abidadama henia dainai.

14 Dirava ita abidadama henia dainai, ita diba momokani, bema gau ta iena ura hegeregerena ita noia neganai, ia ese ita dekenai do ia kamonai. 15 Bona ita diba iseda noinoi ibounai ia kamonai dainai, ita diba danu ita noia gaudia do ita abia.

16 Bema tau ta ese iena Keristani varavara ta ia itaia, kara dika ia karaia noho, to lauma hamasea gauna lasi, bona ia totona Dirava ia noia, vadaeni Dirava ese unai varavara do ia hamauria. Lau herevalaia gauna be inai: Unai tau ese iena lauma do ia hamasea lasi kara dikana ta ia karaia. Badina lauma ia hamasea kara dikana ta be ia noho momokani, bona lau hereva lasi, unai bamona kara dikana totona do umui noinoi. 17 Kara kerere ibounai be kara dika, to kara dika haida ese lauma idia hamasea lasi.

18 Ita diba Dirava ena natuna taudia ibounai ese kara dika idia karaia noho lasi. Badina be Dirava ena Natuna ese idia ia naria namonamo noho, vadaeni Satani ese idia ia hadikaia diba lasi.

19 Ita diba danu, ita be Dirava ena natuna taudia, bona Satani ese tanobada taudia ibounai ia gunalaia noho.

20 Ita diba danu, Dirava ena Natuna ia mai vadaeni, bona ia ese iseda lalona ia hadiaria, vadaeni ita ese Dirava Momokani ita diba. Ita be Dirava ena lalona dekenai ita noho, badina be iena Natuna Iesu Keriso danu ena lalona dekenai ita noho. Iesu Keriso be Dirava Momokani, bona ia be mauri hanaihanai.

21 Lauegu natuna e, do umui naria namonamo, dirava koikoidia garina.