1 Kings 5
Solomona ese Dubu Helaga haginia totona kohu ia haboua
1Hirama, Turo ena king, guna ia be Davida ena turana momokani nega ibounai. Ia ese sivarai ia kamonai Solomona be king dagi ia abia, iena tamana Davida ena gabu dekenai, vadaeni iena hesiai taudia be Solomona dekenai ia siaia. 2Solomona ese inai hereva Hirama dekenai ia siaia:3“Oi diba lauegu tamana Davida be dala lasi Dubu ta do ia haginia, Lohiabada, iena Dirava ena. Ia karaia diba lasi badina ia dekenai idia tuari taudia idia hagegea, bona idia ese ia idia tuari henia nega ibounai, ela bona Lohiabada ese kwalimu ia henia, ia dekenai idia tuari taudia ibounai dekena amo. 4To harihari Lohiabada, lauegu Dirava ese laga-ani lau dekenai ia henia kahana ibounai dekenai. Haida ese lau dekenai idia tuari henia lasi, maino ia noho, lau do ia hadikaia gauna ta be lasi. 5Lohiabada ese lauegu tamana Davida dekenai ia gwauhamata, ia gwau, ‘Oiemu natuna, oiemu gabuna dekenai king dagi do ia abia tauna ese lauegu Dubu ta do ia haginia.’ Unai dainai hari lau laloa unai Dubu do lau haginia, ia lalonai Lohiabada, lauegu Dirava do idia tomadiho henia totona.
6“Unai dainai mani emu kara oiemu gaukara taudia haida do oi siaia lao, Lebanona sida audia haida do idia utua diho, lau totona. Lauegu hesiai taudia be oiemu gaukara taudia danu do idia gaukara hebou, bona oi gwauraia hegeregere, oiemu taudia edia davana do lau henia. Oi diba vadaeni, lauegu taudia be au utua gaukara idia diba namonamo lasi, to Sidono taudia idia diba momo.”
7Hirama ese Solomona ena hereva ia kamonai neganai ia moale bada, ia gwau, “Hari dina Lohiabada do ita hanamoa. Ia ese natuna mai aonega danu Davida dekenai ia henia, inai bese badana do ia gunalaia totona.” 8Unai dainai Hirama ese Solomona dekenai hereva ia siaia, ia gwau: “Oiemu hesiai tauna ena hereva lau kamonai vadaeni, bona oi noia gauna be do lau karaia. Sida bona kasuarina audia ibounai do lau abia, bona do lau siaia lao. 9Lauegu hesiai taudia be Lebanona dekena amo do idia veria lao ela bona kone dekenai, vadaeni lauegu tatau ese audia do idia haboua, tupe do idia karaia, bona davara ena kopina dekenai do idia hure diho, ela bona oiemu ura gabuna dekenai do idia kamokau. Unuseni lauegu tatau ese audia do idia ruhaia, vadaeni oi ese do oi abidia. Unai neganai mani emu kara lauegu tatau edia aniani do oi henia.”
10Vadaeni Hirama ese Solomona ia ura henia sida bona kasuarina audia ibounai ia siaia. 11Bona Solomona ese Hirama dekenai inai aniani gaudia ia henia, iena gaukara taudia edia aniani: Uiti ena metau 2000 toni, bona olive dehoro goeva momokani 400,000 lita, lagani ta ta ibounai.
12Lohiabada ese iena gwauhamata ia badinaia, bona Solomona dekenai aonega ia henia. Bona Solomona bona Hirama edia huanai maino idia karaia, gwauhamata namona danu idia karaia hebou.
13King Solomona ese gaukara taudia Israela kahana ibounai dekena amo ia abia, unai gaukara taudia ibounai be 30,000. 14Solomona ese idia dekena amo orea toi ia karaia, orea ta ta be 10,000. Vadaeni ia ese hua ta ta lalonai Lebanona dekenai 10,000 ia siaia lao. Inai anina be, nega ibounai, 10,000 be Lebanona dekenai, bona 20,000 be edia ruma dekenai, bona tau ta ta be hua ta Lebanona dekenai idia gaukara, bona hua rua be ruma dekenai idia laga-ani. Edia gaukara biaguna ena ladana be Adonirama. 15Solomona ese danu nadi utua taudia 80,000 ororo dekenai ia siaia, bona nadi huaia mai taudia 70,000 danu.
16Solomona ena gaukara naria taudia be 3,300. Idia ese gaukara taudia idia biagua. 17King ena oda hegeregere, idia ese nadi badadia, davana bada gaudia, idia geia, nadi edia isena idia hamanadaia. Unai nadi be Dubu ena badina nadidia do idia halaoa totona.
18Unai bamona dala be Solomona ena gaukara taudia, bona Hirama ena gaukara taudia, bona Gebala hanua taudia ese nadi idia utua, bona au idia abia hegaegae, Dubu Helaga do idia haginia totona.
Copyright information for
HMO