‏ 1 Samuel 25

Samuela ia mase

1Unai neganai Samuela ia mase, bona Israela taudia ibounai idia haboua, bona ia totona idia taitai. Vadaeni iena noho gabuna dekenai idia guria, Rama hanua dekenai.

Samuela ia mase murinai, Davida, mai ena orea taudia danu idia toreisi, Parana taunimanima noho lasi gabuna dekenai idia lao.

Davida bona Abigaila

2Tau ta be Maono dekenai ia noho, iena tano bona gaukara gabuna be Karamele dekenai. Ia be kohu momo tauna, iena mamoe be 3000, bona iena nanigosi be 1000. Ia ese iena mamoe edia huina be Karamele dekenai ia utua. 3Unai tau ena ladana be Nabala, iena adavana be Abigaila. Inai hahine be mai ena aonega, bona mai ena hairaina danu. To iena tau be mai ena dagedage, bona kara dika tauna. Ia be Kaleba ena iduhu tauna.

4Davida be taunimanima noho lasi gabuna dekenai ia kamonai Nabala be iena mamoe edia huina utua totona ia lao. 5Vadaeni Davida ese iena eregabe taudia 10 ia siaia lao, ia oda henia idia dekenai, ia gwau, “Karamele dekenai do umui daekau lao, Nabala dekenai do umui lao, bona lauegu ladana dekenai hanamoa do umui henia. 6Inai bamona do umui hanamoa, do umui gwau, ‘Maino be oi dekenai, bona oiemu bese taudia dekenai, bona oi ese oi biagua gaudia ibounai dekenai. 7Davida ese ia kamonai vadaeni oiemu gaukara taudia ese oiemu mamoe edia huina idia utua noho. Bona Davida ia ura oi diba, oiemu mamoe naria taudia be aiemai orea taudia danu Karamele dekenai idia noho hebou. Ai ese idia ai hadikaia lasi, bona ai ese edia gau ta ai henaoa lasi momokani. 8Bema inai taudia oi nanadaia neganai, idia edia haere be unai bamona sibona oi dekenai. Hari oi be aria badana do oi karaia, bona Davida ia ura inai eregabe taudia dekenai do oi bogahisihisi henia. Mani emu kara, oi dekenai ia noho gauna be ai, oiemu hesiai taudia dekenai, bona oiemu natuna Davida dekenai do oi henia.’ ”

9Vadaeni Davida ena eregabe taudia idia lao, unai hereva ibounai be Nabala dekenai idia hamaoroa, Davida ena ladana dekenai. Inai murinai idia naria noho.

10Gabeai Nabala ese idia dekenai ia haere, ia gwau, “Davida be daika? Inai Iese ena natuna be daika? Inai nega lalonai hesiai taudia momo ese edia biaguna taudia dekena amo idia heau noho. 11Be, egu paraoa, bona ranu, bona vamu, lau alaia gaudia, lauegu mamoe huina utua taudia edia aniani totona gaudia, do lau abia, bona umui dekenai do lau henia, a? Lasi momokani! Umui mai gabuna danu daika ia diba?”

12Vadaeni Davida ena eregabe taudia ese Nabala idia rakatania, Davida dekenai idia giroa lao, bona Nabala ena hereva ibounai Davida dekenai idia hamaoroa.

13Davida ese iena orea taudia ia oda henia, ia gwau, “Umui emui tuari kaia umui abia hegaegae tuari totona.” Vadaeni idia ibounai ese tuari kaia idia dogoatao, Davida danu ese iena tuari kaia iena gabana dekenai ia atoa. Bona tau ibounai 400 bamona be Davida ena murinai idia raka lao, to tau 200 idia noho, idia ese Davida ena kohu idia naria.

14To Nabala ena hesiai tauna ta ese Nabala ena adavana Abigaila ia hamaoroa, ia gwau, “Oi kamonai, Davida ese hereva gwauraia taudia tano kaukau dekena amo ia siaia, iseda biaguna do ia hanamoa henia totona, to Nabala ese idia dekenai ia hereva dika henia. 15To inai Davida ena orea taudia ese kara namona ita dekenai idia karaia, dika ta ita dekenai idia karaia lasi, bona ai be idia danu tano kaukau dekenai ai noho neganai, aiemai gau ta idia henaoa lasi.

16“Idia be magu bamona ai dekenai. Dina bona hanuaboi dekenai idia ese ai idia naria bona gimaia, ai ese mamoe ai naridia neganai. 17Unai dainai ai ura oi diba, Davida bona iena orea taudia ese do idia mai, iseda biaguna bona iena taunimanima ibounai do idia hadikaia ore. Mani emu kara do oi laloa namonamo, bona kara ta do oi karaia, inai kerere koua totona, badina be Nabala ia dagedage dainai, aiemai hereva ia kamonai lasi.”

18Abigaila ese inai hereva ia kamonai, bona karakaraga ia ese inai aniani ia haboua: Paraoa beredi 200, bona uaina kopina rua, bona mamoe 5, idia gabua vadaeni gaudia, bona uiti kaukau bosea 5, bona vain huahuadia, idia kaukau vadaeni gaudia, ikumi 100, bona fig huahua, kaukau gaudia ikumi 200. Abigaila ese inai aniani gaudia be doniki edia doruna dekenai ia atoa. 19Vadaeni ia ese iena hesiai taudia ia hamaoroa, ia gwau, “Lauegu vairana dekenai do umui lao, lau be emui murinai do lau raka mai.” To Abigaila ese iena adavana Nabala ia hamaoroa lasi.

20Abigaila ese doniki ta dekenai ia guia, ororo ena dala dekenai ia lao, Davida do ia davaria totona. Vadaeni Davida mai ena orea taudia danu be unai dala dekenai idia hekei diho mai, vadaeni Abigaila ese idia ia davaria.

21Dala dekenai ia lao neganai, Davida be inai bamona ia laloa: “Momokani, inai tau ena gau ibounai be taunimanima noho lasi tano dekenai lau naria, bona gimaia vadaeni, bona iena gau ta ia boio lasi momokani, to lau ese anina lau davaria lasi. Badina egu kara namo ena davana, be kara dika sibona Nabala ese ia henia lou lau dekenai. 22Lau ese Nabala ena orea taudia ibounai, inai hanuaboi lalonai do lau alaia ore momokani. Bema lasi, Dirava ese lau Davida do ia alaia mase namo!”

23Abigaila ese Davida ia itaia neganai, maoromaoro doniki dekena amo ia diho, bona tano dekenai iena vairana ia atoa diho. 24Ia ese Davida ena aena badinai ia tui diho, ia gwau, “Egu lohia e, mani emu kara, inai kerere be lau sibona egu latanai do ia noho. Lau inai, oiemu hesiai hahine, mani emu kara egu hereva do oi kamonai. 25Egu lohia e, inai dagedage tauna Nabala do oi laloa lasi, badina iena kara be iena ladana hegeregerena. Iena ladana be Nabala, bona ia danu be kava tauna. To egu lohia e, oiemu eregabe taudia oi siaia neganai, lau ese idia lau itaia lasi. 26Lohia e, Lohiabada ese oi ia koua vadaeni, unai dainai oi ese oi dekenai idia dagedage henia taudia edia kerere davana oi henia lasi. Bona Lohiabada ena ladana dainai, lau ura bada oi dekenai idia dagedage henia, o oi dekenai idia hadikaia gwauraia taudia be dika do idia davaria, Nabala ese do ia davaria bamona.

27“Egu lohia e, mani emu kara inai lau mailaia harihari gauna do oi abia dae, bona oiemu murinai idia raka noho orea taudia dekenai do oi henia.

28“Lau be oiemu hesiai hahine, mani emu kara, egu kara dika do oi gwauatao. Lau diba Lohiabada ese king tauna oi do ia haginia, bona oiemu tubuna taudia danu. Badina be tuari ta Lohiabada ia ura karaia neganai, ia ese oi ia siaia noho, ia dainai unai tuari do oi tuari karaia totona. Bona lau diba oiemu mauri dinadia ibounai lalonai kara kerere ta be oiemu lalona dekenai idia do davaria lasi. 29Bema tau haida ese oi do idia tuari henia, Lohiabada, oiemu Dirava ese oi do ia naria, tau ta ese iena davana bada kohu ia naria bamona. To oi dekenai idia tuari henia taudia be Lohiabada ese do ia negedia lao daudau, tau ta ese varo dekena amo nadi ia negea bamona.

30“Vadaeni Lohiabada ese kara namodia ibounai, ia gwauhamata vadaeni gaudia do ia karaia haorea neganai, ia ese Israela ena king dagi oi dekenai do ia henia. 31Bona inai danu, bema oi ese tau haida oi alaia kava lasi, o oi sibona ese oiemu ura dainai, haida edia kerere davana oi henia lasi, vadaeni Lohiabada ese king dagi oi dekenai ia henia neganai, oiemu lalona do ia hisihisi lasi, bona do oi hemarai lasi. Bona egu lohia e, Lohiabada ese oi do ia hanamoa neganai, mani emu kara lau do oi laloa, badina lau be oiemu hesiai hahine.”

32Vadaeni Davida ese Abigaila ia hereva henia, ia gwau, “Lohiabada, Israela ena Dirava lau hanamoa noho inai! Badina be hari dina ia ese oi ia siaia vadaeni, bona ita ruaosi ita hedavari inai. 33Oiemu laloa maoro dainai Dirava lau tanikiu henia! Bona oi danu lau tanikiu henia, badina hari dina lau ese ala-ala do lau karaia, bona lau sibona ese Nabala ena kerere davana do lau henia, to oi ese inai bamona laloa oi hadokoa. 34Momokani, Lohiabada, Israela ena Dirava, ese lau ia koua, vadaeni oi lau hadikaia lasi. To Lohiabada, mauri Dirava ena ladana dekenai lau hereva momokani, bema lau dekenai oi mai haraga lasi, daba do ia ginidae lasi neganai, Nabala ena hesiai tauna ta be mai mauri danu do ia noho lasi.”

35Davida ese Abigaila ia mailaia gaudia ibounai ia abia dae, bona ia hamaoroa, ia gwau, “Oiemu ruma dekenai do oi giroa lou, bona do oi laloa hekwarahi lasi. Lau ese oiemu ura gauna do lau karaia, bona Nabala be do lau alaia lasi.”

36Abigaila be Nabala dekenai ia ginidae, ia itaia, ia ese iena ruma dekenai aria ta ia karaia, king tauna do ia karaia aria bamona. Nabala ena lalona be ia moale, badina ia be kekero dika herea. Unai dainai Abigaila ese ia hereva henia lasi ela bona dabai. 37Daba neganai, uaina ena siahu be Nabala ena lalona dekenai ia ore neganai, iena adavana Abigaila ese dahaka ia vara sivaraina ibounai ia hamaoroa. Nabala ese unai hereva ia kamonai, vadaeni nega tamona iena kudouna be ia dika lao, bona iena kopina ia mase. Vadaeni ia moru diho, bona nadi ena toana bamona ia mahuta noho. 38Dina 10 bamona idia lao, vadaeni Lohiabada ese Nabala ia alaia, ia mase.

39Davida ia kamonai Nabala ia mase, vadaeni ia gwau, “Lohiabada lau hanamoa noho, badina be Nabala ese lau ia hahemaraia ena davana be ia ese ia henia vadaeni. Nabala ese kara dika ia karaia, bona Lohiabada ese iena kerere davana ia henia. Bona Lohiabada ese lau, iena hesiai tauna, egu dala ia koua, vadaeni kara dika lau karaia lasi.”

Vadaeni Davida ese hereva gwauraia taudia Abigaila dekenai ia siaia. Ia gwau, ia ura Abigaila do ia adavaia. 40Davida ena hesiai taudia be Abigaila dekenai idia ginidae, Karamele dekenai. Vadaeni idia ese idia hereva henia, idia gwau, “Davida ese ai ia siaia, ia dekenai oi do ai hakaua lao, bona ia ese oi do ia adavaia, ia gwau.”

41Vadaeni hahine be ia toreisi, tano dekenai iena vairana ia atoa, ia gwau, “Lau be Davida ena hesiai hahine, bona lau noho hegaegae, lau ese iena hesiai taudia edia aena do lau huria totona.” 42Abigaila ia toreisi haraga, doniki ta dekenai ia guia, bona iena ulato 5, hesiai kekeni, be ia danu idia lao.

Unai neganai Abigaila bona iena hesiai kekeni be Davida ena hesiai taudia danu Davida dekenai idia lao. Vadaeni Abigaila bona Davida idia headava.

43Davida ese Ahinoama, Ieserele hahine, danu ia abia, hahine ruaosi be ia ese ia adavaia. 44To Saulo ese iena natuna hahine Mikala, Davida ena adavana, be Palitiela Laisi, Galimi tauna dekenai ia henia vadaeni.