1 Samuel 26
Davida ese Saulo ia alaia lasi, nega iharuana
1Sipi taudia be Saulo dekenai idia lao, Gibea hanua dekenai, idia gwau, “Davida be Hakila Ororo dekenai ia hunia noho, Iesimono ena dina daekau kahanai.” 2Vadaeni Saulo be maoromaoro ia toreisi, Sipi ena tano kaukau dekenai ia lao, mai Israela tuari taudia goadadia danu, idia ese Sipi ena tano kaukau dekenai Davida idia tahua gwauraia.3Saulo be Hakila Ororo dekenai ia kamepa, unai ororo be dala ena badibadinai, Iesimono ena dina daekau kahanai. To Davida be tano kaukau dekenai ia noho. Davida ese ia itaia vadaeni, Saulo be ia tahua totona tano kaukau dekenai ia mai vadaeni. 4Unai dainai Davida ese hasinadoa taudia ia siaia, bona idia hamaoroa, Saulo be ia ginidae momokani vadaeni.
5Unai neganai Davida ia toreisi, ia lao, Saulo ena kamepa gabuna dekenai ia ginidae, bona Davida ese Saulo bona Abinere edia mahuta gabuna ia itaia. Abinere be Saulo ena tuari taudia edia biaguna. Saulo be kamepa ena lalonai ia mahuta, iena tuari taudia be idia mahuta neganai, idia ese Saulo idia hagegea momokani.
6Vadaeni Davida ese Ahimeleka, Hiti tauna, bona Abisai Seruia, Ioaba ena tadina, ia nanadaia, ia gwau, “Daika be lau danu kamepa ena lalonai do ita lao, Saulo dekenai?”
Abisai ia gwau, “Lau be oi danu do ita lao.”
7Vadaeni unai hanuaboi lalonai Davida bona Abisai be Saulo ena kamepa dekenai idia vareai lao. Saulo be unuseni ia mahuta, kamepa ena huanai, iena io be tano dekenai ia gwadaia, bona ia gini maoromaoro Saulo ena kwarana badibadinai. Abinere bona tuari taudia ibounai idia mahuta noho, idia ese Saulo idia hagegea.
8Abisai ese Davida ia hamaoroa, ia gwau, “Hari hanuaboi oi dekenai ia dagedage henia tauna, be Dirava ese oiemu imana dekenai ia atoa vadaeni. Mani emu kara, harihari lau ese sibona ena io dekenai, Saulo do lau gwadaia mase, nega tamona sibona. Lau ese nega rua do lau gwadaia lasi, momokani.”
9To Davida ia gwau, “Do oi hadikaia lasi! Lohiabada ese ia abia hidi vadaeni, king totona. Bema tau ta ese Saulo ia hadikaia, Lohiabada ese unai tau do ia hadikaia momokani.” 10Ma Davida ia gwau, “Ia Mauri Noho Lohiabada ena ladana dainai, lau diba Lohiabada sibona ese Saulo do ia alaia, iena nega sibona dekenai, o tuari dekenai. 11Lohiabada ese egu dala ia koua, lau ese Lohiabada ia abia hidi king totona tauna lau hadikaia diba lasi momokani. To ita ese Saulo ena io, bona iena hodu sibona do ita abia lao.”
12Vadaeni Davida ese io bona hodu be Saulo ena badinai dekena amo ia abia, vadaeni ia bona Abisai idia raka lao. Tau ta ese idia ia itaia lasi, bona tau ta ia diba lasi, ta danu ia noga lasi, badina idia ibounai idia mahuta. Mahuta metau herea be Lohiabada ese idia ibounai edia latanai ia atoa vadaeni.
13Unai neganai Davida be kamepa ia rakatania, bona ororo ena latanai ia gini, kamepa dekena amo sisina daudau. 14Vadaeni Davida ese unai tuari taudia bona Abinere Nere dekenai ia boiboi, ia gwau, “Abinere e, oi ese lau oi kamonai diba, a?”
Abinere ia haere, ia gwau, “Daika ia boiboi noho, king do oi hanogaia, a?”
15Davida ese Abinere ia gwau henia, ia gwau, “Oi be tau lasi, a? Daika be oi hegeregerena Israela dekenai? Badina dahaka oi ese oiemu lohia bona oiemu king oi gimaia lasi? Badina be tau ta be harihari, oiemu kamepa dekenai ia raka vareai oiemu biaguna do ia alaia totona. 16Abinere e, oi kamonai! Oiemu kara be namo lasi. Ia mauri noho Lohiabada ena ladana dekenai lau hereva momokani, oi bona oiemu tuari taudia be king ese umui do ia hamasea namo, badina emui biaguna umui gimaia lasi, Lohiabada ese ia abia hidi king tauna. Kamonai! Umui lao, king ena io bona iena hodu be guna king ena kwarana badibadinai idia noho. To inai gau ruaosi be hari edeseni idia noho?”
17Saulo ia diba Davida ena gadona ia kamonai, vadaeni ia gwau, “Lauegu natuna Davida e, unai be oiemu gadona, a?”
Davida e haere, ia gwau, “King e, lauegu lohia e, egu gadona be inai.”
18Ma Davida ia gwau, “Egu lohia e, lau be oiemu hesiai tauna, to badina dahaka lau oi lulua noho? Lau be dahaka lau karaia? Lauegu kerere be dahaka? 19Lauegu lohia bona lauegu king e, lau be oiemu hesiai tauna, mani emu kara egu hereva do oi kamonai. Bema Lohiabada ese oiemu lalona ia ha-aukaia lau dekenai, sedira bema boubou gauna do lau henia neganai, ia ese lau do ia bogahisihisi henia. To bema taunimanima ese oiemu lalona idia ha-aukaia lau dekenai, lau ura Lohiabada ese idia do ia hadikaia momokani. Badina be idia ese Lohiabada ena tano dekena amo lau idia lulua, idia ura lau be idau tano lau noho, bona idau dirava dekenai do lau tomadiho. Bona unai dainai lau be hegeregere lasi, Lohiabada ena gau namodia, iena bese taudia dekenai ia henia gaudia, do lau davaria totona. 20King e, oi ese lau alaia totona oi mai, bona lau oi tahua, tau ta ese sei ia tahua bamona, o tau ta ese ororo dekenai ia lao, uda manuna do ia pidia totona bamona. To lau ura lasi idau taudia edia tano dekenai do lau mase. Mani oi bogahisihisi lau dekenai, Lohiabada ia noho lasi tano dekenai do lau mase garina.”
21Vadaeni Saulo ia gwau, “Lau be lau kara dika vadaeni. Egu natuna Davida e, lau dekenai mani do oi lou mai, bona lau ese oi do lau hadikaia lou lasi, badina hari hanuaboi oi ese lau oi alaia lasi. Lau be lau kara kava momokani! Lau be lau kerere bada herea!”
22Davida ia haere, ia gwau, “King e, oiemu io be iniseni. Oiemu tau ta do oi siaia mai, bona do ia abia. 23Lohiabada ese kara maoromaoro taudia bona ia dekenai idia abidadama taudia ibounai edia kara dainai, davana namona ia henidia noho. Hari dina ia ese oi ia atoa egu siahu henunai, to lau ese oi lau hadikaia lasi, badina oi be Lohiabada ese ia abia hidi king tauna. 24Momokani, hari dina oiemu mauri be gau badana egu vairana dekenai. Unai bamona danu, lauegu mauri be gau badana Lohiabada ena vairana dekenai, bona ia ese dika ibounai dekena amo lau do ia hamauria!”
25Saulo ese Davida ia hamaoroa, ia gwau, “Egu natuna Davida e, Dirava ese oi do ia hanamoa! Kara badadia momo do oi karaia, bona ibounai edia anina do idia vara.”
Vadaeni Davida be iena dala dekenai ia lao, bona Saulo be iena ruma dekenai ia giroa lao.
Copyright information for
HMO