‏ 2 Kings 18

Hesekaia, Iuda ena king

1Hosea Elaha, Israela ena king ese iena king dagi ia dogoatao lagani toi neganai, Hesekaia Ahasa ese Iuda tano ia gunalaia hamatamaia. 2Hesekaia, iena mauri lagani be 25 neganai, ia ese iena king dagi ia hamatamaia, bona Ierusalema dekenai lagani 29 lalonai ia be king. Iena sinana be Abi Sekaraia. 3Hesekaia be Lohiabada ena vairanai kara maoromaoro ia karaia, iena sene tauna Davida ena kara hegeregere. 4Ia ese dirava koikoi tomadiho ataiai gabudia bona nadidia ia hamakohia, Asera ena kaivakuku ia utua diho, bona guna Mose ia karaia auri gaigai ia hamakohia maragimaragi. Unai gaigai ena ladana be Nehusitana, bona Israela taudia ese Hesekaia ena nega lalonai bonana namo muramura idia gabua ia dekenai.

5Hesekaia ese Lohiabada, Israela ena Dirava ia abidadama henia. Ia hegeregerena ta ese Iuda ia gunalaia lasi, Iuda ena king gunana ta, o Iuda ena king gabeai ta.

6Badina be Hesekaia ese Lohiabada ia badinaia namonamo, bona Lohiabada ena murinai raka ena kara dekena amo ia raka siri lasi momokani. Hesekaia ese Lohiabada ena Taravatu ibounai, Mose dekenai ia henia gaudia ibounai, ia badinaia namonamo.

7Lohiabada be Hesekaia dekenai ia noho, unai dainai iena kara ibounai lalonai Lohiabada ese kwalimu ia henia.

Hesekaia ese Asuria ena king ia kamonai henia lasi, bona iena hesiai gaukara ia karaia lasi. 8Hesekaia danu ese Pilistia taudia tuari dekenai ia halusia momokani. Edia hanua maragidia bona edia hanua badadia ibounai ia tuari henidia, bona ia kwalimu, Gasa bona Gasa ena tano danu ia halusia.

Asuria taudia ese Samaria hanua idia halusia

9King Hesekaia ese king dagi lalonai ia noho lagani 4 neganai, bona Hosea Elaha be Israela ena king lagani 7 neganai Salamanesa, Asuria ena king ese Israela ia tuari henia, bona Samaria hanua ia koua hagegea. 10Bona lagani toi idia ore neganai Asuria taudia ese Samaria idia halusia, Hesekaia be lagani 6 ia king neganai. Unai be Hosea, Israela dekenai ia king lagani 9 murinai. Asuria taudia idia kwalimu dainai, idia ese Samaria hanua idia abia. 11Asuria ena king ese Israela taudia ia abia mauri, Asuria dekenai idia ia abia lao. King ese Israela taudia haida Hala hanua badana dekenai ia siaia, idia noho, haida be Haboro, Gosana Sinavai ena badibadinai ia siaia, idia noho, bona haida be Media hanua dekenai idia noho.

12Samaria hanua bona Israela taudia be Asuria taudia ese idia halusia, badina be Israela taudia ese Lohiabada, edia Dirava ena hereva idia kamonai lasi dainai. Idia ese Lohiabada danu idia karaia gwauhamata taravatuna idia badinaia lasi, bona Lohiabada ena Taravatu, Mose ese ia henia gaudia ibounai idia utua momokani. Oibe, Lohiabada idia kamonai henia lasi dainai unai dika idia davaria.

Asuria ena king ese Iuda ia tuari henia

13King Hesekaia ese king dagi ia dogoatao lagani 14 neganai, Senakeriba, Asuria ena king ese Iuda hanua, mai edia magu hanuadia, ia tuari henia, bona ia halusidia. 14Vadaeni Hesekaia, Iuda ena king ese Asuria ena king dekenai hereva ia siaia, Lakisi hanua dekenai, ia gwau, “Lau be lau kerere vadaeni, mani emu kara tuari do oi hadokoa, vadaeni oi ese oi gwauraia moni be oi dekenai do lau henia.” Asuria ena king ia gwau, Hesekaia ese siliva moni 10,000 kilogaram bona golo 1000 kilogaram do ia siaia. 15Unai dainai Hesekaia ese Dubu Helaga bona king ena ruma dekenai ia noho siliva ibounai Senakeriba dekenai ia siaia.

16Unai neganai danu Hesekaia ese Dubu Helaga ena iduara dekenai ia noho golo ia kokia, bona iduara kahana kahana audia dekenai ia noho golo, Hesekaia sibona ese ia atoa gauna danu, Senakeriba dekenai ia siaia.

17Senakeriba ese inai golo bona siliva ia abia, to ia ese Lakisi dekena amo, iena tuari biagudia badadia, ladana Taratana, Rabesarisi, bona Rabesake, be Ierusalema dekenai ia siaia lao, mai ena tuari orea badana danu. Idia daekau lao, king Hesekaia ena gabu, Ierusalema dekenai idia ginidae. Asuria tuari taudia edia kamepa be atai dekenai ia noho ranu gabuna ena dadaira badinai idia karaia. Unai gabu be dabua idia huria taudia edia gaukara gabuna lao dalana dekenai. 18Asuria tuari biagudia ese hereva idia siaia king Hesekaia dekenai, idia ura hereva henia. Hesekaia ese iena hesiai taudia toi ia siaia, Asuria taudia danu do idia hedavari. Idia be Eliakimi Hilekaia, king ena ruma naria tauna, Sebina, toretore tauna badana, bona Ioa Asapa, king ena sivarai ia torea pepa naria tauna. Inai tau toi be Asuria taudia dekenai hereva totona idia raka lao.

19Vadaeni Rabesake ese idia dekenai ia hereva, ia gwau, “Hesekaia do umui hamaoroa, umui gwau, ‘King badana, Asuria ena king be inai bamona ia gwau: Dahaka dainai lau dekenai oi gari lasi, daika oi abidadama henia, oi laloa oi do ia durua? 20Oi laloa hereva kavakava dekena amo tuari taudia goada herea do oi koua diba, a? Daika ese oi ia durua noho, vadaeni lau dekenai oi kamonai henia lasi?

21“ ‘Kamonai, oi be Aigupito dekenai oi abidadama henia, to ia be siriho, makohia gauna bamona, ia ese ia dekenai ia abidadama tauna ena imana do ia gwadaia. Farao, Aigupito ena king be unai bamona, ia dekenai idia abidadama taudia ibounai dekenai.’ ”

22Rabesake ma ia gwau, “Bema inai bamona umui gwau, ‘Ai be Lohiabada, aiemai Dirava ai abidadama henia noho,’ inai danu be hegeregere lasi. Badina be Hesekaia ese Lohiabada ena ataiai gabudia bona boubou patadia ia kokia vadaeni, bona Iuda taudia ibounai ia oda henidia Ierusalema dekenai ia noho boubou patana sibona dekenai do idia tomadiho.”

23Ma Asuria tauna Rabesake ia hereva, ia gwau, “Lauegu biaguna, Asuria ena king danu do umui gwauhamata, vadaeni lau ese Iuda taudia edia king dekenai hosi 2000 do lau henia, bema ia ese hosi guia taudia 2000 ia davaria diba! 24Asuria king ena hesiai tauna maragina ta ese umui ia halusia diba! Unai dainai, edena bamona umui laloa Aigupito taudia ese umui dekenai kariota bona hosi guia taudia do idia siaia? 25Ma inai danu: Umui laloa inai emui tano lau tuari henia kava, a? Lasi, to Lohiabada lau nanadaia guna, bona ia ese lau dekenai maoro ia henia, ia gwau, ‘Unai tano dekenai do oi raka lao, oi tuari henia, bona do oi hadikaia ore.’ ”

26Vadaeni Eliakimi Hilekaia bona Sebina bona Ioa ese Rabesake dekenai idia hereva, idia gwau, “Mani emu kara Suria gado dekena amo ai dekenai do oi hereva. Ai be unai gado ai diba. Heberu gado oi hereva lasi, magu dekenai idia helai taudia idia kamonai garina.”

27To Rabesake ese ia haere, ia gwau, “Umui laloa umui bona king Hesekaia sibona dekenai lauegu biaguna ena hereva lau gwauraia noho, a? Lasi, lauegu hereva be magu dekenai idia helai noho taudia dekenai danu. Idia ese edia kukuri do idia ania bona edia mei do idia inua, umui hegeregere.”

28Unai neganai Rabesake ia toreisi, Heberu gado dekenai ia boiboi, ia gwau, “King badana, Asuria ena king, ena hereva do umui kamonai. 29King be inai bamona ia hereva, ia gwau: Hesekaia ena hereva do umui kamonai lasi, badina be ia ese lauegu siahu dekena amo umui ia hamauria diba lasi.

30“Hesekaia ese umui dekenai ia hamaoroa, ‘Lohiabada do umui abidadama henia,’ be do umui kamonai henia lasi. Ia ese Asuria ena tuari taudia ia koua diba lasi. Asuria taudia ese emui hanua do idia halusia.

31“Hesekaia do umui kamonai henia lasi, badina be Asuria ena king be inai bamona ia hereva: Umui be lau danu maino do umui karaia. Emui hanua dekena amo do umui raka mai, mai maino danu emui tuari gaudia do umui rakatania. Unai neganai umui ibounai ese ta ta emui vain huahua, bona emui fig huahua do umui ania diba, bona ta ta emui ranu guri dekenai ranu do umui inua diba, 32ela bona Asuria ena king ese tano namona ta dekenai umui do ia abia lao. Inai tano be umui emui tano hegeregere, uiti bona uaina ena tano, paraoa bona vain umadia tanona, olive audia bona hani tanona. Unuseni do umui mauri noho, do umui mase lasi.

“Hesekaia ese umui do ia koia, do ia gwau, ‘Lohiabada ese umui do ia hamauria,’ to do umui kamonai henia lasi.

33“Bese idauidau edia dirava ta ese nega ta iena tano be Asuria ena king ena siahu dekena amo ia hamauria, a? 34Hamata bona Arapada edia dirava be edeseni? Separavaimi bona Hena bona Iva edia dirava be edeseni? Samaria be dirava ta ese ia hamauria, a?

35“Inai tano ibounai edia huanai edena tano ena dirava ese ena tano Asuria ena king ena siahu dekena amo ia hamauria? Unai dainai, Lohiabada ese Ierusalema be edena bamona Asuria dekena amo ia hamauria diba?”

36To taunimanima ese regena ta idia karaia lasi, idia haere henia lasi, badina be Hesekaia ese ia oda henia, ia gwau, “Umui haere henia lasi.”

37Vadaeni Eliakimi Hilekaia, king ena ruma naria tauna, Sebina, toretore tauna badana, bona Ioa Asapa, king ena sivarai torea pepa naria tauna ese lalohisihisi dainai edia dabua idia darea. Unai neganai Hesekaia dekenai idia giroa lou, Rabesake ena hereva idia hamaoroa.