Deuteronomy 11
Lohiabada ena siahu badana
1Mose ma ia hereva, ia gwau, “Unai dainai Lohiabada emui Dirava do umui ura henia, bona iena Taravatu bona oda ibounai do umui kamonai henia nega ibounai. 2Hari dina Lohiabada ese umui dekenai ia hedinaraia gaudia do umui laloa noho. Lohiabada ese umui sibona dekenai inai kara badadia ia hedinaraia, emui natudia dekenai be lasi. Lohiabada emui Dirava ena matakani, iena kara badadia, bona iena siahu badana umui itaia vadaeni.3“Lohiabada ena hoa karadia danu umui itaia, Aigupito dekenai ia karaia gaudia Farao, Aigupito ena king dekenai, bona Aigupito ena tano ibounai dekenai. 4Umui laloa danu, Aigupito ena tuari taudia, mai edia hosi bona mai edia kariota, ese umui idia lulua neganai, Davara Kakakaka ena abata dekenai Lohiabada ese idia ia maloa, idia mase ore momokani. 5Lohiabada ena kara, tano kaukau dekenai umui ia durua karadia, ela bona inai gabu dekenai umui ginidae, be emui natudia idia itaia lasi.
6“Ma do umui laloa, Datana bona iena tadina Abirama, Eliaba Rubena ena natuna, edena bamona Lohiabada ese idia dekenai ia karaia. Taunimanima ibounai edia vairana dekenai tano dekenai guri badana ia kehoa, vadaeni idia, bona edia bese taudia, bona edia palai ruma, bona edia hesiai taudia, bona edia ubua gaudia be tano ese idia ia ania ore.
7“Io, umui ese, emui matana dekena amo, Lohiabada ese inai kara badadia ibounai ia karaia neganai umui itaia.”
Lohiabada ese ia gwauhamata henia tano ena namo
8Ma Mose ia gwau, “Unai dainai hari dina umui dekenai lau henia noho Taravatu ibounai do umui kamonai henia. Unai neganai goada do umui davaria, Ioridane Sinavai do umui hanaia totona, bona do umui noholaia tano do umui abia totona. 9Ma emui mauri lagani do idia momo danu, Lohiabada ese emui sene taudia ia gwauhamata henia tano dekenai. Unai tano be idia bona edia tubudia do idia abia gwauraia, be tano namona, rata bona hani dekenai ia honu.10“Inai do umui raka vareai bona abia tano be Aigupito, guna umui noho gabuna, bamona lasi. Aigupito dekenai uhe umui hadoa neganai, emui aena dekenai uma hapariparia totona umui lao, aniani ava dekenai ranu umui atoa bamona. 11To do umui abia totona Ioridane Sinavai do umui raka hanaia tano be ororo bona koura tanona, guba ena medu ese ia hapariparia tano. 12Lohiabada, emui Dirava ese inai tano ia naria noho. Lohiabada, emui Dirava ese inai tano ia itaia noho nega ibounai, lagani ia hamatamaia negana ela bona lagani ena dokona.
13“Unai dainai, hari dina umui dekenai lau henia vadaeni Taravatu do umui kamonai henia. Lohiabada emui Dirava do umui ura henia, bona iena hesiai gaukara do umui karaia, mai emui kudouna ibounai. 14Bema inai bamona umui karaia neganai, Lohiabada ese emui tano dekenai medu do ia siaia, medu ena nega korikori neganai, lahara neganai bona laurabada neganai danu. Unai dekena amo umui ese emui uiti, bona uaina, bona olive dehoro do umui haboua. 15Rei matamata danu umui dekenai do ia henia, emui boromakau bona mamoe edia. Aniani hegeregere momokani do umui davaria, bona do umui boga kunu.
16“To do umui naria namonamo, haida ese umui do idia hakaua kerere, idau dirava dekenai do umui tomadiho henia garina, bona idau dirava edia hesiai gaukara do umui karaia garina. 17Bema unai bamona umui karaia neganai, Lohiabada ena badu umui dekenai do ia vara. Ia ese unai gabu ena medu do ia koua. Medu do ia diho lasi, bona tano ena anina do idia vara lasi. Inai Lohiabada ese umui ia henia noho tano be namo momokani, to medu bema ia siaia lasi neganai, umui be do umui mase haraga.
18“Unai dainai inai lauegu oda hereva do umui laloatao, bona emui kudouna dekenai do umui dogoatao. Inai Taravatu be do umui torea, bona toa bamona, emui imana bona baguna dekenai do umui kwatua kau. 19Emui natudia dekenai inai Taravatu do umui hadibaia. Lohiabada ena Taravatu do umui herevalaia noho, emui ruma dekenai umui noho neganai, dala dekenai umui raka neganai, umui laga-ani neganai, bona umui gaukara neganai danu. 20Emui ruma edia iduara dogoatao audia dekenai inai Taravatu do umui torea, bona emui magu iduara dekenai danu do umui torea hedinarai. 21Unai neganai emui mauri lagani bona emui natudia edia mauri lagani be do idia momo, unai tano ena lalonai. Emui sene taudia dekenai Lohiabada ese ia gwauhamata henidia tano be unai. Umui be unuseni do umui noho, ela bona guba be tanobada ena ataiai ia noho negana ibounai.
22“Lau ese umui dekenai lau henia vadaeni Taravatu ibounai do umui kamonai henia namonamo. Lohiabada emui Dirava do umui lalokau henia, iena dala ibounai lalonai do umui raka, bona Lohiabada do umui badinaia, mai momokani danu. 23Unai neganai Lohiabada ese inai bese taudia emui vairana dekenai do ia lulua lao. Bona umui ese, bese badadia, emui goada idia hereaia besedia, edia tano do umui abia.
24“Umui emui aena idia raka hanaia gabudia ibounai do umui abia, emui tano. Emui tano be inai: Tano kaukau gabuna, diho kahana dekena amo ela bona Lebanona Ororo, mirigini kahana dekenai, bona Euperate Sinavai, dina daekau kahana dekenai ela bona Davara Badana, dina diho kahana dekenai.
25“Umui lao gabudia ibounai, unai tano dekenai, Lohiabada emui Dirava ese iena gwauhamata hegeregerena, gari do ia havaraia. Vadaeni unuseni idia noho taudia ese umui dekenai do idia gari bada, bona tau ta ese umui do ia hadokoa diba lasi.
26“Hari dina umui emui vairana dekenai hanamoa dalana bona hadikaia dalana lau atoa, edena do umui abia hidi? 27Bema Lohiabada emui Dirava ena Taravatu, hari dina umui dekenai lau henia gaudia umui kamonai henia neganai, hanamoa do umui davaria. 28To bema inai Taravatu umui kamonai henia lasi, bona idau dirava, umui diba lasi dirava, dekenai umui tomadiho henia neganai, hadikaia do umui davaria.
29“Bona Lohiabada, emui Dirava ese do umui noho tano dekenai umui do ia hakaua vareai neganai, Gerisima Ororo dekenai Dirava ena hanamoa hereva do umui gwauraia, bona Ebala Ororo dekenai Dirava ena hadikaia hereva do umui gwauraia. 30Inai ororo ruaosi be Ioridane Sinavai ena dina diho kahanai, Kanana taudia, Araba dekenai idia noho, edia tano dekenai. Unai tano be Gilegala hanua kahirakahira, More ena ouki au badadia idia noho gabuna.
31“Umui ese Ioridane Sinavai do umui hanaia, Lohiabada emui Dirava ese umui ia henia noho tano do umui abia, emui tano. To unai tano do umui abia, bona ia dekenai umui noho neganai, 32do umui naria namonamo, taravatu bona oda ibounai, hari dina dekenai umui dekenai lau henia gaudia, do umui kamonai henia.”
Copyright information for
HMO