Deuteronomy 22
1“Bema emui varavara Israela tauna ena boromakau o mamoe ia boio, bona bema umui ese umui itaia, do umui rakatania lasi, to do umui hakaua lao, emui varavara tauna dekenai do umui henia lou. 2To bema unai ubua gauna ena biaguna ena ruma be daudau herea, o bema umui daradara biaguna be daika, boromakau o mamoe be emui ruma dekenai do umui hakaua, unuseni do umui naria ela bona biaguna ese do ia tahua, vadaeni do umui henia lou.3“O bema iena doniki, o iena dabua, o iena gau ta bema ia boio, bona umui ese umui davaria neganai, do umui henia lou, do umui rakatania lasi. 4Bema emui varavara Israela tauna ena doniki o boromakau be dala dekenai ia moru, bona bema umui itaia, do umui rakatania lasi, to do umui durua, do umui haginia lou.
5“Tau ta ese hahine ena dabua do ia karaia lasi, hahine ta danu ese tau ena dabua do ia karaia lasi. Unai bamona idia karaia taudia be Lohiabada emui Dirava ese ia badu henidia noho.
6“Bema manu ena ruma ta umui davaria, au dekenai, o tano dekenai, bona ia lalonai be manu hahine, bona iena natuna, o iena gatoi idia noho, manu hahine be do umui abia lasi. 7Manu natudia do umui abia diba, to edia sinana do umui harohoa mauri. Unai bamona do umui karaia neganai, emui noho do ia namo, bona emui mauri dinadia do idia momo.
8“Ruma matamata do umui haginia neganai, guhi ena isena dekenai magu maragina do umui haginia, emui ruma guhi dekena amo tau ta do ia moru garina, bona iena mase be emui kerere garina.
9“Uhe idauidau be emui vain uma ena tano dekenai do umui hadoa lasi. Bema unai bamona umui karaia neganai, emui vain huahua bona unai uhe idauidau edia anina danu be helaga, do umui ania diba lasi. 10Emui tano geia totona, boromakau bona doniki ruaosi ese tano geia aurina do idia veria hebou lasi.
11“Mamoe huina bona uda varona idia hatua nega tamona dabua do umui kwatua lasi.
12“Emui dabua ena kona 4 edia isena dekenai varo do umui hatua namonamo, herahera edia toana bamona.”
Headava bona maoheni taravatu
13Ma Mose ia gwau, “Sedira tau ta ese kekeni ta ia adavaia, bona ia danu idia mahuta hebou murinai ia ura henia lasi. 14Vadaeni unai tau ese sedira hahine ena ladana hadikaia totona samania koikoi hereva do ia gwauraia, do ia gwau, ‘Inai hahine lau abia, bona ai mahuta hebou neganai lau davaria ia be rami hebou kekeni lasi.’15“Vadaeni unai hahine ena tamana bona sinana ese iena rami hebou toana do idia abia, hanua tau badadia edia vairana dekenai do idia hedinaraia, hanua ena magu iduara dekenai.
16“Vadaeni hahine ena tamana ese hanua tau badadia do ia hereva henia, do ia gwau, ‘Lauegu natuna be inai tau dekenai lau henia, do ia adavaia, to ia ura henia lasi dainai, 17ia ese ia hahemaraia, ia gwau ia be rami hebou kekeni lasi. To kekeni ena rami hebou rara ena toana be inai.’ Vadaeni unai tamana bona sinana ese unai dabua do idia kehoa, hanua tau badadia edia vairanai.
18“Vadaeni unai tau badadia ese unai tau do idia abia, bona do idia dadabaia. 19Bona iena kerere davana, siliva moni ibounai 100 be ia dekena amo do idia abia, hahine ena tamana dekenai do idia henia. Badina be unai tau ese Israela ena rami hebou kekeni ta ena ladana ia hadikaia vadaeni. Bona unai tau ese unai hahine do ia abia noho, iena adavana. Ia ese unai hahine ia negea diba lasi, iena mauri dinadia ibounai lalonai.
20“To bema unai tau ena samania hereva be momokani, bona bema unai hahine ena rami hebou rara toana be lasi neganai, 21idia ese unai hahine be iena tamana ena ruma iduara dekenai do idia hakaua lao, bona hanua taudia ese nadi dekenai do idia hodoa mase, badina be Israela dekenai ia kara dika. Ia be tamana ena ruma ia noho vadaeni, ariara hahine bamona. Unai dala dekena amo inai bamona kara dika be do umui haorea momokani.
22“Bema tau ta ese ma tau ta ena adavana danu ia heudahanai, bona idia mahuta hebou neganai, taunimanima ese idia davaria neganai, idia ruaosi be do umui alaia mase. Unai dala dekenai inai bamona kara dika do umui haorea momokani.
23“Bema rami hebou kekeni ta ia maoheni, bona bema tau ta ese hanua lalonai ia davaria, bona ia ese unai kekeni ia sihari henia, 24umui ese hanua ena murimurinai idia do umui hakaua lao, bona unuseni umui ese idia ruaosi nadi dekenai do umui hodoa mase. Kekeni be do umui hodoa mase, badina ia be hanua lalonai, to ia boiboi lasi. Bona tau be do umui hodoa mase, badina ia ese tau ta ena maoheni kekeni ia sihari henia dainai. Inai dala dekenai inai bamona kara dika do umui haorea momokani.
25“To sedira tau ta ese rami hebou kekeni, tau ta dekenai ia maoheni vadaeni kekeni be hanua ena murimurinai tano dekenai ia davaria, bona ia ese ia fosia, bona ia sihari henia kava. Unai neganai unai tau sibona do umui alaia mase. 26Unai kekeni dekenai panisia kara do umui karaia lasi, badina ia ese, ena davana mase kerere ta ia karaia lasi. Unai tau ena kara dika, be tau ta ia toreisi, iena badibadinai tauna ia alaia mase bamona. 27Badina be hanua ena murimurinai tano dekenai unai tau ese unai kekeni ia davaria, bona unai kekeni madi ia boiboi bada, to tau ta ese ia durua lasi.
28“Ma sedira tau ta ese maoheni lasi kekeni ta ia davaria, vadaeni ia fosia, ia sihari henia kava, ma taunimanima ese idia davaria. 29Unai tau ese unai kekeni ena tamana dekenai headava davana siliva moni 50 do ia henia, bona ia ese unai kekeni do ia adavaia, badina be ia ese ia fosia, bona ia sihari henia. Unai tau ese unai kekeni do ia negea diba lasi, iena mauri dinadia ibounai lalonai.
30“Tau ta ese iena tamana ena adavana ta do ia sihari henia lasi. Ia ese iena tamana do ia hahemaraia lasi.”
Copyright information for
HMO