Jude | HMO | STEP |

‏

IUDA ENA REVAREVA

‏ Jude

1 Lau Iuda, lau be Iesu Keriso ena hesiai tauna, bona Iamesi ena tadina.

Umui, Dirava ese umui ia abia hidi taudia dekenai inai revareva lau torea. Umui be Tamana Dirava ese ia lalokau henia, bona Iesu Keriso ese umui ia naria noho. 2 Dirava ese bogahisihisi bona maino bona lalokau umui dekenai do ia henia badabada.

Hadibaia koikoi taudia

3 Lauegu lalokau taudia e, iseda hamauria ena hereva totona umui dekenai do lau torea gwauraia, to hari lau laloa hereva idauna ta umui dekenai do lau torea, inai bamona: Umui ese emui abidadama lalonai do umui gini goada noho, bona Sivarai Namona idia hadikaia taudia edia hereva do umui negea. Inai abidadama be Dirava ese nega tamona sibona iena bese taudia dekenai ia henia, bona inai abidadama ena hereva be tau ta ese ia senisia diba lasi. 4 Badina be haida ese umui emui orea dekenai hunia dala dekenai idia vareai vadaeni. Gunaguna Buka Helaga ia gwau unai bamona taudia be Dirava ena Kota dekenai edia kerere davana do idia davaria momokani. Idia ese Dirava idia negea. Idia ese Dirava ena hariharibada idia hadibaia kerere, edia lebulebu karadia do idia karaia diba totona. Inai taudia ese iseda Lohiabada Iesu Keriso, iseda Biaguna tamona, idia negea vadaeni.

Sene taudia edia kara do umui laloa lou

5 Inai sivarai gunana umui diba vadaeni, to mani do umui laloa lou: Lohiabada ese Israela taudia Aigupito dekena amo ia hamauria. To gabeai Dirava ese ia dekenai idia abidadama henia lasi taudia ia alaia mase. 6 Aneru haida danu, edia dagi korikori ena maka dekenai idia noho lasi, bona edia gabu korikori idia rakatania. Unai dainai Dirava ese hel ena dibura masemase gabuna dekenai idia ia atoa. Unuseni, noho hanaihanai auri seini dekena amo idia ia guia. Bona unai gabu dekenai do idia noho, ela bona Dirava ena Kota Bada Dinana. 7 Sodoma bona Gomora, bona idia kahirakahira noho hanuadia danu be unai bamona idia karaia. Unai aneru idia karaia bamona, unai hanua edia taudia ese sihari kava bona kara bodaga idauidau idia karaia momo. Unai dainai Dirava ese edia kerere davana ia henidia, noho hanaihanai lahi ena hisihisi be unai. Edia dika davana be toana ta, ia hedinaraia ita dekenai, vadaeni ita ese idia bamona do ita karaia lasi.

8 Unai bamona danu, inai hari idia noho tau dikadia ese nihi idia abia, vadaeni sibodia edia tauanina idia hadikaia noho. Dirava ena siahu idia gwauraia be anina lasi. Idia ese danu guba noho taudia idia hereva dika henia. 9 Gunaguna, Mikaela, aneru badana momokani be Satani danu idia hepapahuahu. Idia ruaosi, daika ese Mose ena tauanina do ia abia, idia hepapahuahulaia. Unai neganai Mikaela ia hekokoroku lasi, ia ese Satani ia gwau henia lasi. Inai bamona sibona ia hereva, ia gwau, “Lohiabada ese oi do ia gwau henia.”

10 To inai hadibaia koikoi taudia ese idia diba lasi gaudia dekenai idia hereva dika noho. Idia be uda boroma bamona, mai edia lalona lasi. Unai dainai idia diba gaudia sibona idia karaia. Bona inai idia diba gaudia, inai kara dika ese ia hakaudia dainai, idia sibodia edia mauri idia hadikaia ore. 11 Madi, dika momokani do idia davaria! Kaino ena dala hegeregere idia raka vadaeni. Balama ena kerere idia karaia vadaeni, moni do idia davaria totona. Idia ese mai hekokoroku danu, Dirava idia kamonai henia lasi, Kora ia karaia bamona. Bona Kora ese dika ia davaria bamona, idia danu ese edia dika davana, mase do idia abia.

12 Umui emui ekalesia aniani hebou umui abia neganai, inai dika taudia ese emui turana dalana idia hadikaia noho. Idia edia ura sibona idia karaia. Mai mataurai lasi, edia bogana idia hahonua, haida dekenai aniani henia be idia laloa lasi. Idia be ori koremakorema, lai ese ia hodaia bamona, to ia ese medu ia hadihoa lasi. Idia be au dikadia bamona, edia huahua ena nega korikori be huahua idia atoa lasi. Bona idia be hegeregere au haida bamona, idia mase momokani vadaeni, bona taunimanima ese tano dekena amo edia ramu idia kokia vadaeni. 13 Idia ese hemarai kara idia karaia noho, bona unai hemarai be ia hedinarai, hegeregere davara hurehure bada ena gwaragwara bamona. Idia be idia moru noho hisiu bamona, dibura masemase gabuna dekenai Dirava ese do ia atodia, ela bona hanaihanai.

Edia kerere davana do idia abia

14 Enoka be tau namba 7 Adamu ena murinai ia vara. Ia ese inai tau dikadia totona peroveta hereva ia gwauraia, ia gwau, “Lohiabada do ia mai, bona iena aneru helagadia momo herea be ia danu do idia hedinarai. 15 Lohiabada ese taunimanima ibounai do ia kota henia. Ia ese Dirava idia badinaia lasi taudia edia dika davana do ia gwauraia, Dirava idia negea dainai. Ma idia momo ese Dirava idia hereva dika henia vadaeni. Idia danu be Lohiabada ese edia kerere davana do ia gwauraia.”

16 Unai dika taudia ese haida edia kara idia maumauraia noho, bona ma haida idia gwauraia kerere. Idia ese edia ura dikadia sibona idia karaia noho. Mai hekokoroku danu edia kara idia herevalaia, bona idia ese haida idia hanamoa koikoi, edia ura gaudia, kohu o gau namodia, do idia davaria totona.

Emui abidadama lalonai do umui gini goada

17 Lauegu lalokau taudia e, iseda Lohiabada Iesu Keriso ena aposetolo taudia ese umui idia hadibaia hereva do umui laloatao. 18 Umui dekenai idia hamaoroa, idia gwau, “Nega dokona dekenai dika taudia do idia hedinarai, emui guriguri kara do idia kirikirilaia. Idia ese Dirava do idia negea, bona sibodia edia ura dikadia do idia karaia.” 19 Inai taudia ese ekalesia oreadia do idia hapararaia. Edia tauanina edia ura dikadia ese edia mauri do idia biagua noho, bona idia ese Lauma Helaga do idia abia lasi.

20 To umui, lauegu lalokau taudia e, emui abidadama helagana ena latanai emui mauri do umui haginia goada. Lauma Helaga ena siahu dekena amo do umui guriguri noho. 21 Dirava ena lalokau lalonai do umui noho. Nega ibounai iseda Lohiabada Iesu Keriso do umui naria noho, mai abidadama danu. Badina be umui diba, ia ese iena bogahisihisi dainai, mauri hanaihanai umui dekenai do ia henia.

Daradara taudia haida do umui bogahisihisi henidia

22 Abidadama goada lasi taudia be do umui durua, mai bogahisihisi danu. 23 Haida be lahi dekena amo karaharaga do umui veria mauri. Ma haida do umui bogahisihisi henia, to mai emui gari danu. Haida edia tauanina edia kara dikadia bona matabodaga dainai, edia dabua be idia miro vadaeni. Umui durudia noho, to edia dabua idia hamiroa karadia do umui ura henia lasi momokani.

Dirava do ita hanamoa

24 Dirava ese umui ia naria diba, vadaeni do umui moru lasi. Ia ese umui ia hakaua diba, vadaeni iena gabu namo herea momokani dekenai umui do ia atoa, kerere ta lasi, bona mai emui moale bada danu. 25 Dirava be tamona, bona ia ese iseda Lohiabada Iesu Keriso dainai ita ia hamauria. Ita ese Dirava ena ladana do ita hanamoa bada. Ia be King Hereadaena mai hairaina, mai siahu ibounai, ia be gau ibounai edia Biaguna. Gunaguna momokani unai bamona siahu ia abia. Ma harihari danu inai siahu ia abia noho, bona do ia abia noho ela bona hanaihanai! Amen.