Psa 43 | HMO | STEP | Dirava e, oi idia matauraia lasi bese taudia ese, lau idia hadikaia gwauraia. Mani emu kara lau oi durua, bona edia hereva dika do oi koua. Mani idia dekenai do oi hedinaraia, lau be kara maoromaoro tauna. Unai taudia ese hereva koikoi idia gwauraia, bona edia kara be maoro lasi. Mani oi ese edia imana dekena amo, lau do oi hamauria.

‏ Psalms 43

Iena gabu dekena amo ia noho daudau tauna ena guriguri

1 Dirava e, oi idia matauraia lasi bese taudia ese,
lau idia hadikaia gwauraia.
Mani emu kara lau oi durua,
bona edia hereva dika do oi koua.
Mani idia dekenai do oi hedinaraia,
lau be kara maoromaoro tauna.
Unai taudia ese hereva koikoi idia gwauraia,
bona edia kara be maoro lasi.
Mani oi ese edia imana dekena amo,
lau do oi hamauria.
2 Oi sibona be lauegu Dirava.
Oi dekenai lau lao diba,
vadaeni oi ese tau dikadia dekena amo lau oi gimaia momokani.
To Lohiabada e,
badina dahaka oi ese lau oi laloaboio vadaeni?
Badina dahaka lau dekenai idia dagedage taudia ese,
lau idia hadikaia,
bona lau hisihisi noho?
3 Oiemu diari bona oiemu hereva momokani,
be mani oi siaia mai,
idia ese dala maorona lau dekenai do idia hedinaraia.
Vadaeni inai diari ese maoromaoro oiemu ororo helagana,
Siona dekenai lau do idia hakaua.
Unai be oiemu Dubu Helaga, oi noho gabuna.
4 Unai neganai Dirava ena boubou patana dekenai do lau lao,
badina oi ese egu moale bona laloa namo oi havaraia noho.
Oi be lauegu Dirava momokani.
Lau ese gita dekena amo oi do lau hanamoa,
mai ane namona dekenai danu.

5 Badina dahaka lauegu lalona ia hisihisi noho?
Badina dahaka lauegu kudouna ia metau noho?
Lau ese Dirava do lau abidadama henia,
bona iena durua totona do lau naria,
badina ia be lauegu Dirava.
Unai dainai lau ese iena ladana do lau hanamoa lou.