1Cor 1 | HUI | STEP | I̱ Polo. I̱ Keriso Yasunagaabosolo holiya Ngode Datagaliwabe ibuni hame leagome i̱ olene kogoni. I̱bi inanaga hamene Sosodenisibi iyame beba ogo tíhondo gilibu wia haraba.

a 1.2Ab 9.14, 18.1, 18.17, Lm 1.7, 10.12, 1 Ko 6.11, 2 Ti 1.9

b 1.3Lm 1.7, 2 Ko 1.2

c 1.5-61 Ko 2.1-2, 12.8, 2 Ko 8.7, 2 Ti 1.8, Mo 1.2

d 1.7Lg 17.30, Pb 3.20, 2 Te 1.7, Ta 2.13, 2 Pi 3.12

e 1.8Pb 1.6, Kl 1.22, 1 Te 3.13, 5.23

f 1.9Ais 49.7, Yo 17.21, 1 Ko 10.13, 1 Te 5.24, 1 Yo 1.3

g 1.10Lm 12.16, 2 Ko 13.11, Pb 2.2, 3.16, 1 Pi 3.8

h 1.12Yo 1.42, Ab 18.24-28, 19.1, 1 Ko 3.4

i 1.14Ab 18.8, 19.29, Lm 16.23

j 1.161 Ko 16.15

k 1.17Md 28.19, Yo 4.2, 1 Ko 2.1, 2.4, 2.13, 2 Pi 1.16

l 1.18Ab 17.18, Lm 1.16, 1 Ko 2.14, 15.2, 2 Ko 4.3

m 1.19Ais 29.14, Yar 8.9

n 1.20Yob 12.17, Ais 19.12, 33.18, 44.25, Md 11.25, Lg 10.21, Lm 1.20-21, 1.28

o 1.21Md 11.25, Lg 10.21, Lm 1.20-21, 1.28

p 1.22Md 12.38, Mg 8.11, Yo 4.48, Ab 17.18, 17.32

q 1.23Ais 8.14, Md 11.6, Yo 6.60, 6.66, Lm 9.32, 1 Ko 2.14, Ga 5.11

r 1.24Lm 1.4, 1.16, 1 Ko 1.18, Kl 2.3

s 1.252 Ko 13.4

t 1.26Md 11.25, Yo 7.48, Ya 2.1-5

u 1.27Md 11.25, Ya 2.5

v 1.29Lm 3.27, Eb 2.9

w 1.30Yar 23.5-6, Yo 17.19, 2 Ko 5.21

x 1.31Yar 9.23-24, 2 Ko 10.17

‏ 1 Corinthians 1

1 I̱ Polo. I̱ Keriso Yasunagaabosolo holiya Ngode Datagaliwabe ibuni hame leagome i̱ olene kogoni. I̱bi inanaga hamene Sosodenisibi iyame beba ogo tíhondo gilibu wia haraba.

2 Keriso hameigini Korindini kamiru bibahende Ngode Datagaliwabenaga loma bia hene halimulo ibugua tí olayaru Keriso Yasuha ho gimbu bu howa Ngode Datagaliwabenaga kami. Tíbi wali agali dindi bibahendeni karubi inabi ina bibahendenaga Anduane Homogo Yasu Kerisonaga mini olalu karume tí bibahendehondo ^a 3 inanaga Aba Ngode Datagaliwabebi Anduane Homogo Yasu Kerisobi libugua biamogo bia holenebi mo palia holenebi ngilo hamelo ko. ^b

Mo turu hagane Kerisoha ngaru ogo

4 Ngode Datagaliwabehanda Keriso Yasuha howa ibunaga biamogo bia holene tíhondo ngiyagonaga i̱na tí mitangi bialu i̱naga Ngode Datagaliwabehondo ka̱i̱ laabo halu ko. 5 Ani buwa tí Kerisoha ho gimbu bu howa mbirale bibahende karulapeore yu kami. Bi lolene bibahendebi manda bulene bibahendebi heba karulapeore yu kami. ^c 6 Kerisohanda biyago lamulene mana tígua hongo howa yu tiga bialu 7 Anduane Homogo Yasu Keriso lone ha pani helo hondo kami tambu turu holene mbira nayi ndo bibahendeore yu hai ho kami. ^d 8 Anduane Homogo Yasu Kerisonaga Horo haragola tí mbiralime ko birimi nalelo ibugua tí hongo haabo halimulo haru halu hamaro bulebira. ^e 9 Ngode Datagaliwabehanda ibu Igini inanaga Anduane Homogo Yasu Keriso heba tí mo mbiraore howa halimulo olayago Ngode Datagaliwabe ogoni ibu mini bilinaheore kagoni. ^f

Keriso hameigini biaru ti talebu baga binigo ogo

10 I̱naga hamene mbaliniru-o Anduane Homogo Yasu Kerisonaga hongoni howa i̱na tí bibahendehondo bilimulo hame ledogo ogo. Tí talebu baga nabilimu. Tí bibahendeme bi laramigo mini mbiraore howa bi lolene nga. Mitangi bulenebi hame lolenebi mo mbiraore haiore howa holene nga. ^g 11 Kalowi ibunaga damene marume, Tí lai lagalaga bialu kami, lalu i̱hondo bayuwaore langiai haya. 12 Ani langiyadagua langero. Tí hangu hangu howa bi tara tara lalu kami laya. Mbirame lalu, I̱ Polo aria kogoni, larimiya. Mendeme lalu, I̱ Aboloso aria kogoni, larimiya. Teboneme, I̱ Pida aria kogoni, larimiya. Maneme lalu, I̱ Keriso aria kogoni, larimiya lalu langiya. ^h 13 Keriso ibu dewa talebu baga bu kabe. Polohanda ira bangani ba para howa tínaga homa henebe. Tí Polonaga talima piaga howa baboraya birimibe.

14 I̱na tí baboraya nabi Karisabasa Gaiasala dege baboraya birugonaga Ngode Datagaliwabehondo turu haro. ⁱ 15 Anigo tí mbiralime Polonaga talima piaga howa baboraya bini lolene nawi. 16 O mbira embeda harudago Sebanasabi ibu damenebi ti haru i̱na baboraya biru. Ani birugo maru baboraya birube be nabibe mitangi nabi ko. ^j 17 Kerisohanda i̱hondo, Baboraya bule í̠ pu, lene ndo. Ibugua, Ngode Datagaliwabe Bi Mana Debene lamima pobe, lene. Ani lowa Keriso ira bangani howa homa henegonaga hongo yu waholilono ibugua, Mini gigabiwi karume laralidagua ndo lalu Bi Mana Debene lamima pobe, lene. ^k

Ngode Datagaliwabenaga hongo holenebi mini gigabi wulenebi Kerisoha ngago ogo

18 Keriso ira bangani howa homa henegonaga mana hale howa hariga koha pialu karume mana ogoni lulu mana ale manda biaga. Anigo ina Ngode Datagaliwabenaga pele mulene yu kamarunaga mana ogoniha Ngode Datagaliwabenaga hongo holene nga. ^l 19 Anigo Anduane Homogonagambugani bi lo ngago ogo,

Mini gigabiwi karunaga mini gigabi wulene i̱na mo waholebero.
Mana manda timbunibi karunaga manda bulene i̱na mo emene holebero,
lalu gilibu nga. ^m 20 Anigo wali agali mini gigabiwi karu mitangi bialu galone agi manda bibehebe. Mana manda timbunibi karu dindi bibahendenaga bime wai biaga karubi ti mitangi bialu galone agi manda bibehe kamabe. Dindinaga mini gigabiwi holene galone ndo mini nawi ale ngago lalu Ngode Datagaliwabehanda walia kagoni. ⁿ

21 Ngode Datagaliwabehanda ibunaga mini gigabiwiore howa wali agali tininaga mini gigabi wuleneme ibuni manda nabibehe helo wini. Ani winigo irane iname lulu mana ale lameramaligome Yasu Kerisohondo mini mbiraorewi karu Ngode Datagaliwabehanda ti pele mule manda bini. ^o 22 Yu wali agalime lalu, Agalime nabiagane ale walia ha, laga. Girigi wali agalime mini gigabi wulene hai biaga. ^p 23 Anigo iname mana lamialu howa, Keriso ira bangani homa henego, lameramali. Mana ogoni hale howa Yu wali agalime irane mitangi nabiaga ka. Girigi wali agalime hale howa galone ndo lulu mana aleda laga ka. ^q 24 Ngode Datagaliwabehanda Yu wali agalibi wali agali tara tarabi olo heleneru tigua mana ogoni hale howa Keriso ibu Ngode Datagaliwabenaga hongo holenebi ibunaga mini gigabi wulenebi mana ogoniha nga ti manda biaga. ^r 25 Tígua Ngode Datagaliwabe ibu mini nawi ale ka mitangi beramilibe. Mini nawi ale ka mitangi birimiyagua ogoni wali agalinaga mini gigabi wiaga ale ndo ibu mini gigabiorewi ka. Ngode Datagaliwabe ibu hongo nahe ka mitangi beramilibe. Hongo nahe ka mitangi birimiyagua ogoni wali agalinaga hongo ale ndo ibu hongo gibiorehe ka. ^s

26 Ogonigo hamene mbaliniru-o Ngode Datagaliwabehanda tí Kerisonaga halimulo olayangi tí abi harimibe mitangi bilimu. Dindialirume mitangi biagadagua tí mini gigabiwibi hongohebi mini lenebi dewa nahe mbira mbira hangu harimigoni. ^t 27 Dindiali karume maru mini nawi ale ka laganego wali agali urunibi karu Ngode Datagaliwabehanda mini gigabiwi karu taga helonaga ti dabo helene. Dindiali karume maru hongo nahe ka laganego wali agali urunibi karu Ngode Datagaliwabehanda hongohe karu taga helonaga ti dabo helene. ^u 28 Dindiali karume lalu, Wali agali maru ko mini nawi nakarulape habane nabulenebi ka, lagaru wali agali urunibi Ngode Datagaliwabehanda dabo helene. Ani binigo irane dindialime galonedalo mitangi biaganego tini galone ndodane hendelo ani bini. 29 Ani binigo wali agali bibahendeoreme Ngode Datagaliwabe deni howa mbiralime mine holene henge nawiore. ^v 30 Ngode Datagaliwabe ibunime tí Keriso Yasuha ho gimbu bu howa ibugua inanaga mini gigabi wulene tene Keriso ibu helo hela hene. Keriso Yasu minini howa Ngode Datagaliwabehanda inahondo, Tí mini tigabiwi kami, lene. Kerisohanda ina mo Ngode Datagaliwabenaga wali agali hela halu ina golope hene kama. ^w 31 Ani binigo Anduane Homogonaga mbugani lo ngadagua ogo, Mbiralime mbiralinaga mini mo yaraga hoa kayagua Anduane Homogohanda biyago mitangi bialu ibunaga mini hangu mo yaraga holene nga, lalu gilibu nga. ^x