1Cor 3 | HUI | STEP | Ogonigo i̱ hamene mbaliniru-o i̱na wali agali maru tinaga bu habaneha Ngode Datagaliwabe Dininihe karuhondo bi larulidagua tí kamiruhondo ani labe nahe haru. I̱na dindi mana hangu biaga karuhondobi Keriso hameigini mini odahe ale karuhondobi larulidagua tíhondo bi ani lalu haru.

a 3.1Yo 16.12, 1 Ko 2.14-15

b 3.2Yo 16.12, Hi 5.12-14, 1 Pi 2.2

c 3.31 Ko 1.10-11, 11.18, Ga 5.20-21, Ya 3.16

d 3.41 Ko 1.12

e 3.6Ab 18.4-11, 18.24-28, 19.1, 1 Ko 1.30, 2 Ko 3.5, 10.14-15

f 3.72 Ko 12.11, Ga 6.3

g 3.8Lm 2.6, Ga 6.4-5, Mo 22.12

h 3.9Md 13.3-9, Ab 15.4, 2 Ko 6.1, Eb 2.20-22, Hi 3.3-4, 1 Pi 2.5

i 3.10Lm 15.20, 1 Ko 4.15, 15.10, 1 Pi 4.11, 2 Pi 3.15, Mo 21.14

j 3.11Ais 28.16, Md 16.18, 2 Ko 11.4, Ga 1.7, 1 Pi 2.4-6

k 3.13Lg 2.35, 1 Ko 4.5, 2 Te 1.7-10, 1 Pi 1.7, 4.12

l 3.161 Ko 6.19, 2 Ko 6.16, Eb 2.21-22, Hi 3.6, 1 Pi 2.5

m 3.18Min 3.7, Ais 5.21

n 3.19Yob 5.13, 1 Ko 1.20, 2.6

o 3.20Iba 94.11

p 3.211 Ko 1.12, 3.4-6, 2 Ko 4.5, 4.15

q 3.23Lm 14.8, 1 Ko 11.3, 2 Ko 10.7, Ga 3.29

‏ 1 Corinthians 3

Ina Ngode Datagaliwabenaga biabe bia haga kamaru ogo

1 Ogonigo i̱ hamene mbaliniru-o i̱na wali agali maru tinaga bu habaneha Ngode Datagaliwabe Dininihe karuhondo bi larulidagua tí kamiruhondo ani labe nahe haru. I̱na dindi mana hangu biaga karuhondobi Keriso hameigini mini odahe ale karuhondobi larulidagua tíhondo bi ani lalu haru. ^a 2 Tí waneigini gali ale mini boga nabi hemigo hondowa tomo daliahe nabe naheyagola i̱na tíhondo andu iba ale hangu ngirugoni. Dindi mana biagame bialu hagadagua tíguabi áyu bialu howa tomo daliahe nabe nahe kamigoni. Tígua i̱ nayido agini henge lalu bi wai bialu kamirume dindi mana biagame bialu hagadagua bialu kamigo walia haga ndobe. ^{b
,} ^c 4 Tí mbirame lalu, I̱ Polo aria kogoni, mendeme, I̱ Aboloso aria kogoni, lalu kamigo tí dindialime lalu hagadagua lalu kami ndobe. ^d

5 Anigo Aboloso ibu ai kabe. Polo i̱bi ai kobe. Iya Ngode Datagaliwabenaga biabe bia haga agali haribagome tígua Anduane Homogohondo mini mbiraore wirimi. Anduane Homogohanda biabe tara tara tale bialu inahondo ngiyago iyahondo ngiyadagua bialu harabali. 6 Ngode Datagaliwabe mana egene ale pigane i̱na hangaru. Aboloso ibugua egene hangarugoria iba odo mialu haya. Anigo egene ogoni mo anda haga Ngode Datagaliwabe ibuni hangu ka. ^e 7 Agali egene hangayago ibubi agali iba odo miyago ibubi libu haru tene ndo ka. Ngode Datagaliwabe ibugua egene mo anda hagago ibuni teneore ka. ^f 8 Egene hangayago ibubi egeneni iba odo miyago ibubi libu mbiraore kagoni. Libu biabe biyadagua Ngode Datagaliwabehanda yolo hangu hangu mulebira. ^g 9 Ogonigo iya Ngode Datagaliwabenaga biabe mandagi bialu kabago wali agali tí Ngode Datagaliwabenaga mabu ale kami. ^h

Tí Ngode Datagaliwabenaga anda alebi kami. 10 Ngode Datagaliwabehanda mugube ngiyadagua i̱ anda bulenenaga mandabi howa ina anda gene waru. Mendealime anda gene wa wirugoriani anda bialu ka. Ina hangu hangume howa biabe bayuwa berolo manda buwa bulene nga. ⁱ 11 Yasu Keriso ibuniore anda gene helo Ngode Datagaliwabehanda ibu helenego gene mende helolene nawiore. ^j 12 Marume gene o wa helayagoriani anda bialu howa ngolomebi silibamebi to̱le̱ tara tara muni dewa miaganemebi marume iramebi dangimebi widinaga iranemebi anda bulebira. 13 Kerisohanda dabolene Horo harangi biabe birimadagua bu pani holeberama. Horo ogoningi ira daragola ina hangu hangume biabe birimadagua walia holebira. Ira ogonime ina hangu hangunaga biabe birimadagua bo heda halu bayale birimadabe be ko birimadabe walia holebira. ^k 14 Mbiralime anda gene o wa helayagoriani anda biyago nade haabo hayagua ibuhondo yolo mulebira. 15 Mendealime anda gene o wa helayagoriani anda biyago irame dai hayagua ibuhondo yolo nami ibu irame doligo lowa ibuni ibida tagira pu hagadagua pu holebiragonaga pele mia dege bulebira.

Keriso hameigini karu ti ibunaga anda ka lenego ogo

16 Tí bibahende Ngode Datagaliwabenaga anda kamigo Ngode Datagaliwabe Dinini tíha kago mitangi nabiore kamibe. ^l 17 Anigo mbiralime Ngode Datagaliwabenaga anda mo ko hayagua Ngode Datagaliwabehanda o biago ibu nde mo ko holebira. Irane ibunaga anda loma bia hene kago nde ibunaga anda ogoni tíniore kamigoni.

18 Mbiralime ibuni mo hondo holene nawi. Dindini karume mitangi biagadagua tí kamigoha mbiralime, I̱ mini gigabiwi ko, mitangi bu kayagua ibu mini gigabiwiore holenaga ala ibu mini nawi ale ho dai bulene nga. ^m 19 Irane dindini karume mini gigabi nga laganego Ngode Datagaliwabehanda handalu karia galone ndodane handaga ka. Anduane Homogonagambugani lo ngadagua ogo, Agalinaga mini gigabi wulene ngagome tini gono wu kago delo Ngode Datagaliwabehanda ngelo ka, lalu gilibu nga. ⁿ 20 Ngode Datagaliwabenaga mbugani bi mende lo ngago ogo, Agali mini gigabiwi kagonaga mitangi bulene Anduane Homogohanda hondowa o ibu habane nabulenedane hondo ka, lalu gilibu nga. ^o 21 Ogonigo mbiralime dindialiru tigua biaganeru hondowa mine holene nawi. Mbirale bibahendeore ngaru tí kamirunaga ngagoni ndobe. ^p 22 Polobi Abolosobi Pidabi dindi bibahendeni karubi ngarubi holenebi homolenebi áyu ngagobi awe wulebiragobi bibahendeore ta nabi tínaga ngagoni. 23 Tí nde Kerisonaga kami. Keriso ibu nde Ngode Datagaliwabenaga ka. ^q