1Pe 4 | HUI | STEP | Keriso ibunaga tingini tandaga nayadagua inabi tandaga noleore kamagonida manda buwa tínaga miniha hongoho holene nga. Mbirali ibu tingininaga tandaga nayagua ibu mana ko bulenenaga henge nawulebira.

a 4.1Lm 6.2, 6.7, Ga 5.24, Kl 3.3-5

b 4.2Yo 1.13, Lm 6.11, 2 Ko 5.15, Ga 2.20, 1 Yo 2.16

c 4.3Ab 17.30, Eb 2.2-3, 4.17, Ta 3.3

d 4.4Ab 13.45, 18.6, 1 Pi 3.16

e 4.5Ab 10.42, 17.31, 1 Ko 15.51-52, Ya 5.9

f 4.6Lm 8.10, 1 Ko 5.5

g 4.7Md 24.13-14, Lg 21.34, Lm 13.11-12, 1 Ko 10.11, Pb 4.5, Kl 4.2, 2 Pi 3.9, 1 Yo 2.18

h 4.8Min 10.12, 1 Ko 13.7, Kl 3.14, Hi 13.1, Ya 5.20, 1 Pi 1.22

i 4.92 Ko 9.7, Pb 2.14, Pm 14, Hi 13.2

j 4.10Lm 12.6-8, 1 Ko 4.1-2, 4.7, Ta 1.7

k 4.111 Ko 3.10, 10.31, Eb 5.20, 1 Pi 5.11, Mo 1.6

l 4.121 Ko 3.13, 1 Pi 1.6-7

m 4.13Ab 5.41, Lm 8.17, 2 Ko 1.7, 2 Ti 2.12, Ya 1.2, 1 Pi 1.5-6, Mo 1.9

n 4.14Iba 89.50-51, Md 5.11, 2 Ko 12.10, Ya 1.12, 1 Pi 2.20

o 4.151 Te 4.11, 1 Ti 5.13, 1 Pi 2.20

p 4.16Ab 11.26, Pb 1.20

q 4.17Yar 25.29, Mal 3.5, Lg 10.12-14, 23.31, 2 Te 1.8

r 4.18Min 11.31, Lg 23.31

s 4.19Iba 31.5, Lg 23.46, 2 Ti 1.12

‏ 1 Peter 4

Mana ko wahalu Ngode Datagaliwabehanda hame ledadagua bulene ngago ogo

1 Keriso ibunaga tingini tandaga nayadagua inabi tandaga noleore kamagonida manda buwa tínaga miniha hongoho holene nga. Mbirali ibu tingininaga tandaga nayagua ibu mana ko bulenenaga henge nawulebira. ^a 2 Áyu dindi ogoriani kami tambu dindini holenenaga hame lagane ngarume tí haru helo henge nami Ngode Datagaliwabehanda hame ledagome tí haru helo halimu. ^b 3 Ngode Datagaliwabe mana manda nabi karume bua howa bialu kadagua tí nde bialu hemine horo karulapeore harimigoni. Mana ko tagabi bulenebi dongonenaga dimagoli holenebi lulu yule lulu iba nolenebi bimagamaga bu howa kayu yagayaga bulenebi lulu iba nolenaga dawe holenebi mbirale tara tarahondo bi pupu koore loa nabi ngaru wulenebi mana urunibi bialu hemiria horo piai haya. ^c 4 Wali agali Ngode Datagaliwabe manda nabi karume mana urunibi bialu howa koda mitangi nabi ti bialu kadagua bule tígua áyu ti kagoria naporamiligo ti mogolo hondowa tí mege biaga ka. ^d 5 Ngode Datagaliwabehanda áyu karubi ala homenerubi daba ki bule manda manda bu kago daba ki birangi o biarume biyaru bibahende ibuhondo lapani holeneore wulebira. ^e 6 Irane ogoninaga wali agali ala homeneru tihondo Bi Mana Debene lamini. Uruni ti dindini heangi wali agali bibahende kobi bayalebi biyagonaga dabolene ngadagua tibi dabene. Bi Mana Debene tihondo lamiyago irane tibi dinini howa Ngode Datagaliwabe heba helonaga lamini. ^f

Ngode Datagaliwabehanda mugube ngiyagome iname biabe bayuwa bulene ngago ogo

7 Mbirale bibahendenaga hamaro bulene horo kaware ngago tígua Ngode Datagaliwabehondo bi loleore tíni mini haru howabi dengala howabi halimu. ^g 8 Mbirale maru dindiha lowa tíni gubalini ho hagahaga buleneore mo dunini ho halimu. Irane gubalini holeneme ko tara tara biniru la nabi biamogo bulebirago manda buwa ani bilimu. ^h 9 Manga nahe howa wali agali maru tí andaga nenege ibilo henge migimigi bialu halimu. ⁱ 10 Ngode Datagaliwabehanda tí hangu hanguhondo mugube tara tara ngiyadagua tí hangu hangume nde maru karu mo bayale hole tínaga mugube ngiyagome tíni biamogo bigibigi bulene nga. ^j 11 Mbirali mana lamiagane kayagua nde ibugua Ngode Datagaliwabe bi mana lamialu holene nga. Mbirali ibu biamogo biagane kayagua nde ibugua Ngode Datagaliwabenaga hongo miragome biamogo bialu holene nga. Uruni bibahende beramigo Yasu Kerisoni howa marume Ngode Datagaliwabenaga mini mo yaraga helo ani bialu halimu. Mini yaraga holenebi hongo holenebi kirabali ibunaga wiaaboboore bulebira. Aniore bilo laro. ^k

Keriso hameiginime tandaga nolene ngago ogo

12 I̱naga nenege turubiru-o tandaga nolene mbirame tí ba handarago hondowa mogo nalalimu. Ogoni nabiagane ale mbira birago mitangi nabilimu. ^l 13 Ani ndogo Keriso ibugua tandaga nayadagua inabi noloma̱ya ngiragonida manda bialu turu ho halimu. Irane ogo ibunaga wá taraore holene ha pani haragola tínaga bu miniha turu holene to̱lai helo ani nalu halimu. ^m 14 Marume tí Kerisonaga talima piagane kamigo hondowa mege biyagua tí turu ho holene nga. Ogoni irane Ngode Datagaliwabe Dinini wáhe kago ibu daluwa tíha kagonaga bira. ⁿ 15 Tí tandaga naramigonaga mbirali bo wahalu kamiriabi dabudabu kayu bialu kamiriabi ko timbuni ngaru bialu kamiriabi wali agali marunaga ngago yamuwa lalu kamiriabi uruni ale birimigonaga tandaga tí nolene nawilo halimu. ^o 16 Ai tí Keriso hameigini kamigonaga tandaga narimiyagua ogoninaga taga nahalimu. Taga nahe howa Kerisonaga mini yu harimada manda buwa Ngode Datagaliwabehondo ka̱i̱ lalimu. ^p

17 Wali agalime biyagonaga daba ki bulene tehinaragoni. Ani birangi Ngode Datagaliwabenaga wali agali ala daba ki bulene wulebira. Ibugua ina ala daba ki bulene ngayagua maru Bi Mana Debene yu tiga nabiaga karu ti agua hamaro bulubadabe. ^q 18 Anduane Homogonagambugani lo ngadagua ogo,

Wali agali bayale karu pele mulene yule erekuibiore nga.
Ngode Datagaliwabe mitangi nabi mini kowi karu ti agua holobadabe,
lalu gilibu nga. ^r 19 Anigo nde maru Ngode Datagaliwabehanda hame ledahayagi howa tandaga nararu tigua mana tigabi biaabo halu bibahendeore Wabiagane ibu mini bilinahe kago manda buwa ti dinini polenenaga ibugua hondo heloore holene nga. ^s