1Ti 4 | HUI | STEP | Ngode Datagaliwabe Dinini ibugua mo wála howa lalu, Maniore haragola wali agali marume Ngode Datagaliwabe mana wahalu polebira. Ti wahalu puwa mo hondo hagane mana hale howa damanaga mana lawai harago yu tiga bulebira.

a 4.12 Ti 3.1, 1 Pi 1.20, 2 Pi 2.1, 3.3, 1 Yo 2.18, Yu 18, Mo 9.20, 16.14

b 4.3Pig 9.3, Lm 14.6, 1 Ko 8.8, 10.30-31, Kl 2.20-21, Hi 13.4

c 4.4Pig 1.31, Ab 10.15, Lm 14.14, 14.20, 1 Ko 10.25, Ta 1.15

d 4.71 Ti 1.4, 6.20, 2 Ti 2.16, 2.23, Hi 5.14

e 4.8Iba 37.4, Md 6.33, Lm 8.28, Kl 2.23, 1 Ti 6.6

f 4.91 Ti 1.15

g 4.10Iba 36.6, 1 Ko 4.11-12, 1 Ti 2.3-4

h 4.121 Ko 16.11, Ta 2.7, 2.15, 1 Pi 5.3

i 4.14Ab 6.6, 8.17, 13.3, 19.6, 1 Ti 1.18, 2 Ti 1.6

j 4.151 Ti 5.22

k 4.16Ab 20.28, Lm 11.14, 1 Ko 9.22, Ye 5.20

‏ 1 Timothy 4

Agalime mana henene ngadagua ndo lawai haga ka, lenego ogo

1 Ngode Datagaliwabe Dinini ibugua mo wála howa lalu, Maniore haragola wali agali marume Ngode Datagaliwabe mana wahalu polebira. Ti wahalu puwa mo hondo hagane mana hale howa damanaga mana lawai harago yu tiga bulebira. ^a 2 Mana ogoni mo hondo haga agalime ke̱ howa lawai hagago irame dene motudu ngagoria amburi biagadagua tinaga miniha ko do ho haabo kagome tinaga mini amburibi ka. 3 Agali urunibime lawai halu howa agalime wali dabu bulene nawi lalubi tomo maru nolene nawi lalubi lawai haga ka. Ngode Datagaliwabehanda tomo bibahende wali agalime nelo wabini. Ani binidago manda buwa Ngode Datagaliwabehondo mini mbiraore wu karume Ngode Datagaliwabehondo turu halu ka̱i̱ lowa nolene nga. ^b 4 Ngode Datagaliwabehanda mbirale bibahende wabiniru bayale dege wabinigo uruni aria mbira waholene nawi. Iname Ngode Datagaliwabehondo turu halu ka̱i̱ lowa mo nolene nga. ^c 5 Irane Ngode Datagaliwabehanda bi lowinigomebi iname ibuhondo bi laramagomebi Ngode Datagaliwabehanda, Ogoni bayaleda, lolebira.

Keriso Yasunaga biabe bia haga bayale ogobi holene nga lenego ogo

6 Í̠na bi uruni Keriso hameiginihondo lamialu hariyagua nde Keriso Yasunaga biabe bia haga bayale holebere. Ngode Datagaliwabe mana lo ngagobi mana henene lawai harugo yu tiga bu kego mini mo hongo holene tomo ogoni í̠ni nalu haridane hondolebere. 7 Wali agali marume bi galone nawini bi anda howa lalu karu kagoria nahe í̠ wandialu habagi ho habe. Ngode Datagaliwabenaga bi mana galone ngago hangu lo manda biaabo halu habe. ^d 8 Tingini hongo helonaga bia manda biriyagua o emene karulape. Áyu kamagonagabi awe holeberamagonagabi mini ibu hongo halu bayale helo Ngode Datagaliwabenaga bi mana lo manda biaabo harimayagua o karulapeore ogoni. ^e 9 Bi henene ogo hale haiore howa yu tiga buluma̱yanaga lo nga. ^f 10 Ngode Datagaliwabe ibugua wali agali bibahendeore Pele Miaga ka. Ibugua ani bialu kago iname nde ibuhondo mini mbiraore wu kamagonaga Pele Ngiagaore ka. Irane ogoninaga iname ibuhondo mini dunu bia ho howa biabe timbuni erekuibibi biaabo halu kamagoni. ^g

11 Í̠na wali agalihondo mana uruni, Bulene nga, lalu hongo howa lamialu habe. 12 Wali agalime í̠ hondowa, Í̠ igiri emene ke, nalelo í̠na bi laregobi mana beregobi gubalini holenebi mini mbiraore wu kegobi mini gahengehe holenebi Keriso hameigini karume í̠ de handalu tibi í̠ kegobi helo habe. ^h 13 I̱ ibuliya ketambu Anduane Homogonagambugani bi lo ngago wali agali hale helo daga lowa mana ogoni lawai halu lamigi bialu habe. 14 Ngode Datagaliwabe manalatagi haga hearume mbiwia hayangibiagali ala hene miniwi hearume í̠naga haguaneni gi wiyangibi Ngode Datagaliwabe Dinini ibugua í̠hondo mugube ngiyago yu kego ha do wa nahabe. ⁱ 15 Wali agali bibahendeme mana bayale í̠ha anda harago hendelo í̠na mana uruni bu manda bialu hole í̠ni hongoheore howa bialu habe. ^j 16 Í̠nibi í̠na mana lawai haregobi bayuwa de hondo habe. Ani bialu hariyagua í̠bi í̠na wali agali mana lamerego hale hararumebi pele mulene yu holeberami. ^k