2Ti 2 | HUI | STEP | I̱ igini-o biamogo bia holene ina Keriso Yasuha ho gimbu bu howa kamarunaga ngago í̠ nde ogoniha hongo ho habe.

a 2.31 Ti 1.18, 2 Ti 1.8, 4.5

b 2.41 Ko 9.25

c 2.51 Ko 9.25-26, 2 Ti 4.8

d 2.61 Ko 9.7, 9.10

e 2.8Lm 1.3, 2.16, 1 Ko 15.1, 15.4, 15.20

f 2.9Ab 9.16, 28.31, Eb 3.1, 3.13, Pb 1.7, 1.12-14, Kl 4.3, 4.18

g 2.102 Ko 1.6, Eb 3.13, Kl 1.24

h 2.11Lm 6.5, 6.8, 2 Ko 4.10-11, 1 Ti 1.15

i 2.12Md 10.33, Lg 12.9, Lm 8.17, 1 Pi 4.13

j 2.13Dag 23.19, Lm 3.3-4, Ta 1.2

k 2.141 Ti 1.4, 5.21, 6.4, Ta 3.9

l 2.151 Ti 4.6, Ta 2.7-8

m 2.161 Ti 4.7, 6.20, Ta 1.14

n 2.171 Ti 1.20

o 2.19Dag 16.5, 16.26, Ais 52.11, Nah 1.7, Yo 10.14, 10.27, Lm 8.35, 1 Ko 8.3, 1 Yo 2.19

p 2.20Lm 9.21, 1 Ko 3.12, 1 Ti 3.15

q 2.212 Ti 3.17, Ta 3.1

r 2.22Ab 9.14, 1 Ko 1.2, 1 Ti 1.5, 6.11

s 2.231 Ti 4.7, 2 Ti 2.16, Ta 3.9

t 2.241 Ti 3.2-3, Ta 1.7-9, 3.2

u 2.25Ga 6.1, 1 Ti 2.4, 6.11, Ta 1.1, 1 Pi 3.15

‏ 2 Timothy 2

Keriso Yasunaga ami agali mini bilinahe habe lenego ogo

1 I̱ igini-o biamogo bia holene ina Keriso Yasuha ho gimbu bu howa kamarunaga ngago í̠ nde ogoniha hongo ho habe. 2 Wali agali dewa hale ho helowa i̱na bi lawai haga biruruni í̠ hale harigonigo í̠na bi o larugoniore agali mini bilinahe lawai haga mugube yu karuhondo lamigi bialu habe. Mani nde tigua maruhondo lamilo manda buwa lamibe.

3 Anigo erekuibi mangabiru ngangi wahalu pu nabi howa hibu lalu Keriso Yasunaga ami agali mini bilinahe howa biabe bialu habe. ^a 4 Ani howa ami agalime biabe bialu howa tinaga haru haga kago mo turu hole hame lowa tigua biabe tara mende nabiaga. ^b 5 Mbiralime gerai lagago gerai langane mana lo ngadagua biai nahayagua ibu bolangua halu yolo miaganedagua namulebira. ^c 6 Mbiralime tomo hangagago erekui biabe biragome tomo hini ngago ibuninaga wiagane. ^d 7 I̱na bi o laroru mitangi bibe. Ani mitangi bialu kegola Anduane Homogo ibugua í̠hondo mo manda bia holebira.

8 Yasu Keriso homalu lone heyu hayagobi ibu Debidi aguanene hayagobi Bi Mana Debene ogoninaga lawai haruligoni mitangi bialu habe. ^e 9 I̱na Bi Mana Debene ogoni lamialu haruligonaga agali marume i̱ mo tandaga halu ka. Agali ko biaga karu garabaya dariba hagadagua tigua i̱ dariba ho ka. Anigo Ngode Datagaliwabenaga bi mana dege dariba nahene. ^f 10 Irane ogonigo wali agali Ngode Datagaliwabehanda dabayaru mitangi bialu pele ngulenebi bayale taraore haabo holenebi Keriso Yasuha ngago tigua yu helo i̱na hibu lalu ema nabi howa tandaga na halu ko. ^g 11 Bi heneneore lagane ngago ogo ^h

Ina ibu heba homarimayagua nde
inabi ibu heba dege haabo holeberama.
12 Ina hibu lalu ema nabi haabo harimayagua ⁱ
inabi haru haga howa ibu heba haru holeberama.
Iname ibu erembira mialu ina ibu aria ndo kama larimayagua
ibugua nde ina erembira ngialu, Tí i̱naga ndo kami, lolebira.
13 Iname mini bilinaho naharimayagua
ibu mini bilinahe dege haabo kagome
ibuni mo hondo habe nahe ka.
lagane ngago gilibu nga. ^j

Biabe biaga henene Ngode Datagaliwabehanda manda bu kago ogo

14 Í̠na bi ogo wali agali mo mitangi bia haabo halu tigua bi tara tara nahabane ngarunaga bi mo anda howa gungu buligo í̠na Ngode Datagaliwabe deni howa tihondo, De hondo halimu, lalu lamibe. Bi ogoni aleme wali agali hale hararu mo bayale nahaga mo ko hagane nga. ^k 15 Í̠na Ngode Datagaliwabenaga bi mana henene ngadagua tigatigaore lawai hole ibunaga deni howa taga nahe habe. Ngode Datagaliwabehanda í̠hondo turu howa, Bayuwaore bialu hari, lelo ani bialu habe. ^l 16 Ani howa bi nagalone lalu kagoria í̠ nahe wandialu habagi habe. Bi urunibi laragome wali agalime Ngode Datagaliwabe erembira mialu pelonaga mo manga haga. ^m 17 Mana ogoni aleme dere bidadagua bialu mo timbu howa wali agali mo ko hagane. Agali kira Haimeneasa Piledasa lalibugua mana ogonibi lawai haga ka. ⁿ 18 Libu hariga tigabi ngago wahalu ina homalu heyu holeberamagonaga libugua lalu, Ina abale heyu harimagoni, laga ka. Ani larago hale howa wali agali marume mini mbiraore ala wiyago wahowa mini tara mende wiaribia halu ka. 19 Anigo ina mini mbiraore wulene tene Ngode Datagaliwabehanda anda gene ale helenego ema nabibehe haabo kagoni. Ogoriani bi kira gilibu wini ngago mbira ogo, Anduane Homogohanda wali agali ibuninaga karu manda biai ho ka. Bi mendegome lalu, Mbiralime i̱ Anduane Homogonaga ko, layagua ogoni ibu ko ngaruhondo erembira mialu wahalu polene nga, lalu gilibu nga. ^o

20 Anda timbuniha ndisi tara tara dewa wiaganego maru ngolo silibamebi wabini wiaga. Maru nde irame wabini wialu maru nde dindi dongomame wabini wialu biaga. Ndisi maru biabe tara bulenaga dabo bagi ho ngelaga maru horo bibahendengi bulenaga wiaga. ^p 21 Mbiralime mana ko bibahende ngaru uruni wahai hayagua ibu ndisi bayale dabo bagi ho wiaganedagua ibu Ngode Datagaliwabehondo loma bia ho holebira. Ibugua ibunaga Anduane biamogo bia halu biabe bayale bibahende bule holebira. ^q 22 Igiri daliahe karume tinaga bu miniha dimagoli hagadagua nahe í̠ habagi howa agali bu miniha gahengeme Anduane Homogohanda ti biamogo bilo olaga karu baba howa mana tigabibi mini mbiraore wulenebi gubalini holenebi mo palia holenebi tai bialu habe. ^r 23 Wali agali marume mini nawi howa irane nawini bi anda halu kagoria nape ti gungu bulebirago manda buwa ti heba nahe wandialu habe. ^s 24 Ani howa Anduane Homogonaga biabe biaga karume gungu bulene nawiore. Tigua wali agali bibahende ta nabi karuhondo biamogo biagabi lawai haga mini bayalewibi kebabi nahe howa holene nga. ^t 25 Tigua wali agali Ngode Datagaliwabenaga bi mana mo wahaga karu ti bayale helonaga hendore howa mo tiga bia holene nga. Ani biyagua mani tigua mana henene ngago manda bilobi mini beregedelobi Ngode Datagaliwabehanda henge mulebira. ^u 26 Tigua mini wia dai bialu ala dama Heyolabeme hame layadagua bilo gono wedagoha ti mininigo mani gono ogoniha howa do gundu lalu ibida polebira.