2Ti 4 | HUI | STEP | Keriso Yasu ibugua dabaga howa wali agali áyu karubi homenerubi heba godi lolebira. Ibugua dai bialu Handame Haga Kini howa wali agali bibahende haru holebirago mitangi bibe. Ngode Datagaliwabebi Keriso Yasubi libu deni howa i̱na í̠hondo bi ogoni hongo howa laro.

a 4.1Ab 10.42, Lm 14.9-10, 1 Ti 5.21, 6.13

b 4.2Ab 20.20, 20.31, 1 Ti 4.13, 5.20, Ta 1.13, 2.15

c 4.31 Ti 1.10, 4.1, 2 Ti 1.13, 3.1, 3.6

d 4.41 Ti 1.4, 4.7, Ta 1.14

e 4.5Ab 21.8, Eb 4.11, 2 Ti 1.8, 2.3

f 4.6Pb 1.23, 2.17, 2 Pi 1.14

g 4.71 Ko 9.24-25, Pb 3.14, 1 Ti 6.12, Hi 12.1

h 4.81 Ko 9.24-25, 2 Ti 1.12, Ya 1.12, 1 Pi 5.4, Mo 2.10

i 4.92 Ti 1.4

j 4.102 Ko 8.23, Ga 2.3, Kl 4.14, Pm 24, Ta 1.4, 1 Yo 2.15

k 4.11Ab 12.12, 12.25, 13.13, 15.37-39, Kl 4.10, 4.14, Pm 24

l 4.12Ab 20.4, Eb 6.21-22, Kl 4.7-8

m 4.13Ab 20.6

n 4.14Iba 28.4, 62.12, Min 24.12, Ab 19.33, Lm 2.6, 1 Ti 1.20, Mo 18.6

o 4.16Ab 7.60, 2 Ti 1.15

p 4.17Iba 22.21, Dan 6.22, Ab 23.11, 27.23, 2 Pi 2.9

q 4.18Iba 121.7, Lm 11.36, Ga 1.5, Hi 13.21

r 4.19Ab 18.2, 2 Ti 1.16-17

s 4.20Ab 19.22, 20.4, 21.29, Lm 16.23

‏ 2 Timothy 4

Ngode Datagaliwabe mana henene lawai holene ngago ogo

1 Keriso Yasu ibugua dabaga howa wali agali áyu karubi homenerubi heba godi lolebira. Ibugua dai bialu Handame Haga Kini howa wali agali bibahende haru holebirago mitangi bibe. Ngode Datagaliwabebi Keriso Yasubi libu deni howa i̱na í̠hondo bi ogoni hongo howa laro. ^a 2 Mana ogoni lamialu howa horo bibahendengi lamiaabo habe. Wali agalime hale hoa hayaguabi nahayaguabi ta nabi harugo lowa ti hale hai helo lamiaabo habe. Í̠na ani lamialu howa mo tiga bialu talialubi mini elahe helo mo hongo halubi lolene ngadagua ema nabi howa hibu lalu lawai habe. ^b 3 Awe wali agali marume bi mana henene hale habe manga howa tini hame ledadagua bulebira. Tigua bi mana tara nakarulape hale hoa howa bi mana ogoninaga lawai haga karu heba mandagi mo ngoai ho holebira. ^c 4 Ngode Datagaliwabenaga bi mana henene ngago hale habe manga howa erembira mialu mamalinaga bi te tara tara nagalone ngaru hale hoa holebira. ^d 5 Anigo í̠na horo bibahendengi mini haru haabo halu tandaga nolene ngayagua hibu lalu nalu habe. Bi Mana Debene lamiaga kego Ngode Datagaliwabenaga biabe bia haga howa biabe bibahende bulene ngaru bayuwa bialu biai habe. ^e

Polonaga biabe bumaro bulene winigo ogo

6 I̱ nde i̱ni Ngode Datagaliwabehondo loma bialu bo mulene pongo bo winigo áyu ngagoni. I̱ dindini holene hamaro bule ko. ^f 7 I̱na hongo howa gerai lalu henego ai i̱ pole winigoria pu maro biru. Ngode Datagaliwabehondo mini mbiraore wulene wa nahe wiaabo kogoni. ^g 8 Anduane Homogo ibu Dabaga tigabi kago ibugua Horo Mbira pongo bo winingi i̱na bolangua harugonaga yolo wu kago i̱hondo ngulebira. Yolo ogoni Ngode Datagaliwabehanda i̱hondo, Í̠ mini tigabiwi kego, lolene wulebira. I̱ hanguhondo ndo wali agali Anduane Homogo dai bilo hame lowa hondo karu tihondobi tinaga ngago mulebira. ^h

Bi galone maru Timodihondo lamaro bialu lenego ogo

9 I̱ kogoria abaleore ibule manda bibe. ⁱ 10 Demasa ibugua dindini holene mbirale ngaru gubalini howa i̱ wahalu ibu Tesalonaiga piya. Keresenese ibu Galesia piya. Taidasa ibu Dalamesia piya. ^j 11 Lugu dege iya kaba. Maga ibu biabe biamogo bibehe kago í̠na ibu damu pialu libu haru ibalibu. ^k 12 I̱na Tiyigasa ibu Ebesa pelo ibuhondo pu laru. ^l 13 I̱ ibalu howa i̱naga aga luni Toroasani howa Kabasanaga andagani ngelarugo mo yalu mbuga ngelarugobi yalu ibabe. Mbuga maru nogo dongoneme wabinigo ngaru galone timbuniorego embeda holeni mo yabe. ^m

14 Aleganda ibu ege to̱le̱ mini gabame mbirale tara tara wabiaga biago ibugua i̱hondo handabe manga timbuniore haya. Ani biyagonaga Anduane Homogohanda ibuhondo pani karulape mulebira. ⁿ 15 Iname Ngode Datagaliwabenaga bi mana lameramaligonaga ibugua keba timbuni howa ina bo wahole manda bu kago í̠ nde de hondowa habe.

16 Godi halu mbira larimangi i̱na ladai birugola agali mbira i̱hayagi nahe bibahende wahalu piai haya. Tigua nakarulape ogoni biyago Ngode Datagaliwabehanda mitangi nabilo hame ledo. ^o 17 Anduane Homogo ibugua i̱ wahalu pu nabi i̱la haabo howa mo hongo hayagola Yu wali agali ndo tara tara hearu ti hale helo i̱na Ngode Datagaliwabe bi mana lamiai harugoni. Tigua i̱ bo homelole biyaria Anduane Homogohanda i̱ yamiya. ^p 18 Anduane Homogohanda i̱ ko bibahende ngagoria kogola i̱ yamiaabo howa dahuliya andaga ibuni Handame Ho Kagoria i̱ haru polebira. Ibunaga mini mo yaraga holene wiaaboboore bilo hamelo ko. Aniore bilo laro. ^q

19 Pirisila Aguilabi Onesiborasa ibu damenerubi i̱na ti bibahende mitangi biaabo halu ko, layiya lalu lamibe. ^r 20 Erasadasa ibu Korindini hondo haya. Torobimasa ibu warago bayagola Miledasani ngelalu piru. ^s 21 Ira yuni gilope howa dagare ibagane hororu naibidaore i̱ kogoria abale ibulene ngago ibabe. Yubulasabi Pudenesebi Lainasabi Kolodiabi Keriso hameigini bibahendemebi, Tí mitangi ho kama, layiya lalu lamibe.

22 Anduane Homogo ibu í̠naga dinini heba halu Ngode Datagaliwabenaga biamogo bia holene tí bibahendeha wiaabo helo hamelo ko.