Act 4 | HUI | STEP | Pida Yonelame wali agalihondo mana lamialu hearialoma binigo mo miaga agali hearubi Anduane Homogonaga anda mamage hagarunaga haguane heagobiSadiusi agali hearubi ibini.

a 4.1Lg 22.4, 22.52

b 4.2Md 22.23, Ab 23.8

c 4.4Ab 2.41

d 4.7Md 21.23, Ab 7.27

e 4.8Md 10.19-20

f 4.10Ab 2.24, 3.6, 3.13-16

g 4.11Iba 118.22, Ais 28.16, Md 21.42

h 4.12Md 1.21, Ab 10.43

i 4.16Yo 11.47, Ab 3.9-10

j 4.18Ab 5.28, 5.40

k 4.19Ab 5.29

l 4.20Ab 1.8, 22.15, 1Yo 1.1-3

m 4.24Har 20.11, Neh 9.6, Iba 146.6

n 4.25-26Iba 2.1-2

o 4.27Md 27.1-2, Mg 15.1, Lg 23.1, 23.7-11, Yo 18.28-29, Ab 3.13

p 4.28Ab 2.23, 3.18

q 4.29Ab 9.27, 13.46, 19.8, Eb 6.19

r 4.31Ab 2.4, 4.29, 16.26

s 4.32Ab 2.44-45, 2Ko 13.11, 1Pi 3.8

t 4.33Ab 1.8, 1.22, 2.45-47

u 4.34Ab 2.45

v 4.36Ab 11.22-26, 13.2-3

‏ Acts 4

Pida Yonela garabaya andaha helenego ogo

1 Pida Yonelame wali agalihondo mana lamialu hearialoma binigo mo miaga agali hearubi Anduane Homogonaga anda mamage hagarunaga haguane heagobiSadiusi agali hearubi ibini. ^a 2 Abosolo agali biago labome wali agalihondo lawai halu lalu, Yasu homalu mo heya hayagome wali agali homeneru bibahende mo heyu holebira, lene. Ani lawai hayago hale howa agali ibiyarume keba howa ^b 3 tigua Pida Yonela minu yalu puwa horo ogoningi alendoyagola yawi godi lole lowa garabaya andaha palelene. 4 Pida Yonela libugua bi mana lamiyago wali agali dewalime hale howa yu tiga bini. Ala yu tiga biyarubi mani yu tiga biyarubi lamaga halu daosini duria (5,000) agima hene. ^c

5 Horo mende hayagola Yu wali agalinaga haru haga hearubiagali ala hene miniwi hearubiMana lowinigo lawai haga hearubi ti Yarusalemeni ngoai hene. 6 Loma binigo mo miaga haguane timbuni Anasa heagobi ibu damene Kaiabasabi Yonebi Alegandabi maru ibu baile hearubi ngoai ho berene. 7 Ti bereagoria Pida Yonela handade ho helowa tigua libuhondo lalu, Ogoni biribidagoni agua bialu biribibe. Ainaga mininibi hongonibi ogoni biribibe, lene. ^d

8 Ani layagola Pidahanda ibuha Ngode Datagaliwabe Dinini to̱lai howa tihondo lalu, Wali agali haru haga kamirubi agali ala hene miniwi kamirubi ^e 9 te áyu laramigo agali ala kuduguhe biago mo dabi hayagonaga laramiyagua 10 nde tí bibahendebi Isaraele wali agali bibahendebi irane manda bulene nga. Nasareteali Yasu Kerisonaga mini hongome agali ogoni mo dabi hayago ibu áyu tí heba bayale o kagoni de hendedamigoni. Tígua Yasu Keriso ogoni ira bangani ba para harimigo ibu homayagola Ngode Datagaliwabehanda mo heya hene. ^f 11 Anduane Homogonagambugani bi lo ngago ogo, ^g

Tí anda biaga kamirume ege to̱le̱ mbira handabe manga ho harimigo
ege to̱le̱ ogoni timbuni duniniore ho heleda,
lalu gilibu ngago ogoni ibu Yasu ka. 12 Ibuni degeme pele ngibehe ka. Dindi bibahendeni ina pele ngulene mende nahe Yasu ibu dege Ngode Datagaliwabehanda nginigo, lalu Pidahanda lene. ^h

13 Ganisolo agali biarume Pida Yonelame gi nahe hongo howa bi lalu heago libu agali damene dege sigulu nabini howa bi tara layago hondowa mogolo hendene. Ani hondowa tigua libu Yasu heba haabo haraligo manda bini. 14 Tigua agali ala kudugu ho wini biago Pida Yonela heba bayale heago hondowa bi ladai bibe nahe hene. 15 Anigo tigua Pida Yonelahondo, Tagira pudaba, lowa tini hangu lo manda bialu lalu, 16 Agali o biago labohondo agi bimi̱yabe. Libugua agalime nabiagane ale tara timbuni biyagonaga te Yarusalemeni wali agali karu bibahendeme hale hai kago. Iname galone ndo bameyago nalabehe kama. ⁱ 17 Mana ogoni anda haame holigo iname libuhondo, Yasu mini lalu wali agali lone nalamilibu, lalu hongo howa lamimi̱ya, lene.

18 Ani lowa tigua libu olowa ibiyagola libuhondo hongo howa lalu, Libugua Yasu mini lalu lone wali agali lawai holene nawiore, lalu lamini. ^j

19 Ani layagola Pida Yonelame ladai bialu lalu, Iyame tígua laramidagua bulene ngabe be Ngode Datagaliwabehanda laradagua bulene ngabe. Ngode Datagaliwabehanda ogoni tigatiga lolebirago agobe tínime dabadaba. ^k 20 Iyame de handaribagobi hale haribagobi lo wahabe nahe lamiaabo holeberaba, lene. ^l

21 Ani layagola Ganisolo agali biarume Pida Yonelahondo hongo howa lalu, Lamiaabo haribiyagua iname libu pani nalibulo boleberamaore, lene. Libugua biyago hondowa wali agali bibahende hearume Ngode Datagaliwabe mini yaraga halu heago hondowabi tigua bolene irane handa walia nahe howa wahalu golope hene. 22 Agalime nabiagane ale bialu agali kudugu ho wini mo dabi hayago biago ibunaga mali pira maria (40) agima hene.

Yasu mana yu tiga biarume Ngode Datagaliwabehondo, Elahe holene ngi, lenego ogo

23 Golope haya handala Pida Yonela libu aria hearia dai buwaloma binigo mo miaga haguane biarumebiagali ala hene miniwi biarumebi libuhondo bi layago libugua ti lamiai hene. 24 Lamiai hayagola ti bibahendeme hale howa Ngode Datagaliwabehondo bi lalu, Anduane Homogo í̠na hari daligabi dindibi ibabi bibahende ogoniha ngarubi Wabiaga kegoni. ^m 25 Bamba inanaga mamali Debidi í̠naga biabe bia haga biago ibuha howa í̠ Dininime bi lariyago ogo, ⁿ

Yu wali agali ndo wali agali taratara hearume aginaga keba timbuni henebe.
Wali agali o biarume aguaore bami̱ya lalu ndi nde lalu karu irane aginagabe.
26 Dindi bibahendeni wali agalinaga kini hearume wai bule manda manda bu hagahaga bini.
Haru haga dege degerume ngoai howa
Anduane Homogohondobi ibunagaMbirali Dabo Helenegohondobi handabe manga howa ani bini,
lariyago, lalu Pidahanda lene. 27 Pida ibugua laabo halu lalu, Ogonidagua Herodobi Pondiasa Pailatebi libu haru Yu agalibi agali tara tara hearubi heba dindi ogoriani ngoai hene. Í̠naga Biabe Bia Haga Loma Biahene Yasu í̠na ibu Mbirali Dabo Helenego helo helarigo tigua ibuhondo handabe manga howa ti ani ngoai hene. ^o 28 Ti ani biyagola bambaore í̠na í̠naga hongomebi hamemebi bule manda manda bu wiridagua bibahendeore lola hai hene. ^p 29 Anigo Anduane Homogo-o tigua ina bolenaga bi hongo howa lalu hayago í̠ manda bibe. Iname í̠naga biabe bia haga kamago ti hondowa gi nahe í̠naga bi mana elahe howa loloma̱ya mo hongo habe larama. ^q 30 Warago bo ngaru mo dabi hole í̠naga gi dogolabe. Í̠naga Biabe Bia Haga Loma Biahene Yasunaga minini howa nahendene alebi agalime nabiagane alebi iname buluma̱ya mo hongo habelo hame ledama, lene.

31 Tigua Ngode Datagaliwabehondo bi lai hayagola anda ti ngoai ho bereago ema bialu dumbirumbi ale bini. Ani biyagola Ngode Datagaliwabe Dinini ibugua tiha to̱lai hayagola tigua Ngode Datagaliwabe bi mana hongo howa lamialu hene. ^r

Tinaga mbirale wiaru tale binigo ogo

32 Yasu mana yu tiga bu hearu ti minimebi gubalinimebi mbiraore ho hene. Ti mbiraore ho howa tinaga mbirale mbirale wiaru i̱ni hangunaga nale buru pale hearu talebu migi bini. ^s 33 Abosolo biarume Anduane Homogo Yasu ibu homowa mo heya ho kaore lalu hongo howa lalu hene. Ani bialu heago hondowa Ngode Datagaliwabehanda ti bibahende mo turu halu biamogo timbuniore bialu hene. ^t 34 Yasu mana yu tiga biyaru ti mbira buru palia nabi hene. Tinaga aria marume dindibi andabi yolo muwa muni miyago ^u 35 abosolo biaruhondo mini. Ani miyagola abosolo biarume wali agali maru buru pale hearuhondo mulene wiadagua talebu migi bialu hene.

36 Ogonidagua bialu agali mbira mini Yosebe ibu SaibarasaliLibai aguanene howa ibugua ibunaga dindi mbira yolo muwa muni miyago yalu ibalu abosolo biaruhondo mini. Abosolo biarume Yosebe ibu ka̱i̱ mini Banabasa laga hene. Mini ogoni inanaga bi lalu Mini mo hongo haga. ^v