Deuteronomy 27
Ngode Datagaliwabenaga bi mana ege to̱le̱ni gilibu wulene nga lenego ogo
1Mosese ibugua agali haguane hearu heba howa Isaraele wali agalihondo lamialu lalu, Bi mana áyu i̱na tíhondo langerogo baya hangu talialu bialu halimu. 2Tí Iba Yodana domalu dindi Anduane Homogo inanaga Ngode Datagaliwabehanda ngiragohayagi ubaede halu pu howa horo ogoningi dege tígua ege to̱le̱ timbuni ngaru duguwa timeni wabu dambi halimu. a 3Ani buwa bi mana áyu langeroruni bibahende ege to̱le̱ ogoriani gilibu wiai halimu. Anduane Homogo ina mamalirunaga Ngode Datagaliwabehanda dindi bayale benebere ogoni inahondo nguleore lalu bi lowinigoria anda pu howa 4Iba Yodana doma edeyagi ege to̱le̱ uruni Hari Ebala kagoriani hangalimu. Ani hongowa áyu bilimu lalu langerodagua timenime wabu dambi halimu. 5Ani buwa lomabu delaga dabu mbira wabu helole tígua ege to̱le̱ maru duguwa ege to̱le̱ uruni mbirale aeaneme wabini ngagome bo tiga nabi duguarimigo ogonibioreme dabu wabu helalimu. b 6Ani bulene ngago irane Anduane Homogo inanaga Ngode Datagaliwabenaga lomabu delaga dabu bialu ege to̱le̱ poda nabini ngarume wabulene nga. Ani wabu helowa dabu ogoriani dege loma irani dai helonaga delalimu. 7Anduane Homogola ho gimbu bulene lomarubi bu delaga bialu halimu. Ani bialu nogo loma bo delaramigonaga mbiriniru nalu howa Anduane Homogo inanaga Ngode Datagaliwabenaga deni turu timbuni ho halimu. 8Ani bialu ege to̱le̱ timenime wabu dambi howa hangarimigoria Ngode Datagaliwabenaga bi mana baya hangu wále wali agalime handabehe gilibu wiai halimu, lene.9Ani lowa Mosese ibuLibai hameiginiloma binigo mo miaga bu hearu heba mandagi howa ibugua Isaraele wali agali hearu lamialu lalu, Isaraele wali agaliru-o i̱na bi ogo tí langerogo bayuwa hale hai halimu. Áyu ogoni tí bibahende Anduane Homogo inanaga Ngode Datagaliwabenaga wali agaliore ho kamigoni. 10Anigo tígua ibunaga bi mana i̱na áyu latagi harogo bayuwa hale howa talialu bialu halimu, lene.
Wali agali Anduane Homogonaga bi mana ngago mo wahararu tiha mo ko holene wulebira lenego ogo
11Mosesehanda Isaraele wali agalihondo bi lone lamialu lalu, 12Mani tí Iba Yodana domaede halu pu howa Anduane Homogohanda tí mo bayale helonaga bi larago mo yule lowa wali agali tíni hameigini aria karu Hari Gerisimi kagoria irigiho halimu. Hameigini uruni Simionobi Libaibi Yudabi Isagabi Yosebebi Beniyaminibi uruni aria tí pu halimu. c 13Ani bialu Anduane Homogohanda mo ko holenaga bi larago hale holene harangi wali agali hameigini maru karu Hari Ebala kagoha irigi holene nga. Hameigini Lubenebi Gadabi Asebi Sebulunubi Danabi Nabadalibi uruni aria tí pu halimu. 14Ani pu kagola Libai hameigini karume bi hongo howa latagi halu lolene ngago ogo.15Tigua lalu, Mbirale dama mitangi bialu bi pupu wulenaga ege to̱le̱mebi iramebi aeanemebi wabu ngago hondowa Anduane Homogo ibugua mana ogoni hame naleore kagoni. Anigo mbiralime uruni alehondo ohowa bi pupu wialu heagua nde Ngode Datagaliwabenaga mo ko holene ogoni ibuha wulebira, lolebira. d
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
16Mbiralime ibu aba ai̱yalanaga mini mo ko halu mege bialu heagua nde Ngode Datagaliwabenaga mo ko holene ogoni ibuha wulebira, lolebira. e
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
17Agali mbirame dindi tu ege to̱le̱me winigo dugu yaamu howa dindi ibu hayagua nde Ngode Datagaliwabenaga mo ko holene ogoni ibuha wulebira, lolebira. f
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
18Mbiralime wali agali de kohe mbira pialu karia hariga piagagoha ndo mendeha pu tara helo mo hondo hayagua nde Ngode Datagaliwabenaga mo ko holene ogoni ibuha wulebira, lolebira. g
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
19Mbiralime wali agali dindi taraha howa íbu hene karuhondobi waneigini ai̱ya abala homene karuhondobi agalini homene wali dalo bedaruhondobi biamogo bulene ngadagua nabi tihondo mana ko ngago bialu heagua nde Ngode Datagaliwabenaga mo ko holene ogoni ibuha wulebira, lolebira. h
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
20Mbiralime ibu aba one kayu biyagua ibu aba mo tagaore hayagonaga nde Ngode Datagaliwabenaga mo ko holene ogoni ibuha wulebira, lolebira. i
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
21Mbiralime wali agalila hagadagua nogo biangoru kayu biyagua nde Ngode Datagaliwabenaga mo ko holene ogoni ibuha wulebira, lolebira. j
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
22Mbiralime ibu mbalinila kayu biyagua nde Ngode Datagaliwabenaga mo ko holene ogoni ibuha wulebira, lolebira. k
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
23Agali mbirame ibu imane bedago kayu biyagua nde Ngode Datagaliwabenaga mo ko holene ogoni ibuha wulebira, lolebira. l
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
24Mbiralime ohowa wali agali mende kago homelo bo wahayagua nde Ngode Datagaliwabenaga mo ko holene ogoni ibuha wulebira, lolebira.
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
25Mbiralime wali agali ko mbira nabi kago homelo bo waholenaga ndelalu muni hana hayagua Ngode Datagaliwabenaga mo ko holene ogoni ibuha wulebira, lolebira.
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
26Wali agali mbirame Ngode Datagaliwabe kagonaga bi mana lo ngago mo wahayagua nde Ngode Datagaliwabenaga mo ko holene ogoni ibuha wulebira, lolebira. m
Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
Ani lolene nga lalu Mosese ibugua Isaraele wali agalihondo lamini.
Copyright information for
HUI